Read tiv Yesaia 25 Bible Online

Yesaia 25 - tiv bible

Yesaia 25

¹TERE, ka We, U lu Aôndo wam ye; me kende U sha, me wuese iti You; gadia U er akaakpilighyol, ka mbamhen mba tsuaa je, sha mimi kua jighjigh.

²Gadia U gema gar u tamen hingir tihi u alôgh, gar u taveraa hingir ice; garutya u ior mba tar ugen hingir er ka gar ga yô, á kera maa un mayange ga.

³Ka nahan ikurior i taver agee ia civir We, gar u akuraior a cier iyol kpaa una cia U ye.

⁴Gadia U hingir ijiir i waren i mbaatsanev, ijiir i waren i oribanave ken ican i nan, ijiir i yeren uraahumbe man mure u yeren oo, gadia kumetan u uipirambaiorov ngu er uraahumbe u tan sha kpekpe yô.

⁵Er mtsee ken iombortar nahan, kape U yange ayôôso a ior mba tar ugen la; er mtsee a hide ijime sha mure u ibeen nahan, kape á hide a icam i mhembe i uipirambaiorov ijime la.

⁶Sha uwo ne TER u akum a Sha Una yôr akuraior cii iwer sha akaa a wan ahôm, iwer i sha wain u atse a akase na, sha akaa a ahômough a a mgbough a mshiam, sha wain u tse u i kase un dedoo yô.

⁷Man shi sha uwo ne Una vihi ikondo i cirin kera, i i cir sha ior cii la, kua ikondo i yisan i i samber i sha akuraior cii la.

⁸Una tim ku sha won kera; Ter AÔNDO Una ese mliam sha ishiv mbi iorov cii, man shi Una hide a ilyahan sha ior Nav kera sha won cii; gadia ka TER je, A er kwagh ne ye.

⁹Tsô sha iyange la, á kaa er: Nenge, ngun ka Aôndo wase u se lu veren ashe Na ser, A̱ va yima se je ne; ka TER je u se lu veren ashe Na; sé lu nen saan saan, sé ember nen myom Na.

¹⁰Gadia ka sha uwo ne uwegh ku TER kua mem ye, kpa á ndyar Moabi hen ijiir na, er ka i ndyar ayer shin mngerem ma ihungwa i uihôgh nahan.

¹¹Una naregh ave na ken atô u ma er orôônwe ka nan naregh ave a nan sha u ôôn uwe nahan, kpa Una hide a iyolgengese na ijime cii, shin er ave na a fe eev nahan kpaa.

¹²Iyouutya i taven sha, i sha gilgar la, Una yôhôl i, Una haa i inya, Una samber i inya zan zan shin vuulevu je.