Read tiv Yesaia 33 Bible Online

Yesaia 33 - tiv bible

Yesaia 33

¹Kwagh á tser u, we or u vihin ior akaa kera, kpa we yô, i vihi u akaa kera ga, we u u eren atseregh, kpa we yô, i er atseregh a we ga. Zum u ú mem u vihin ior akaa kera la, á vihi u kera; man zum u ú de u eren atseregh yô, á er atseregh a we.

²TERE, zungwe se mhôônom; se mba keghen We; lu uwegh asegh hanma sev, myom wase kpaa sha shighe u ican.

³Sha ayôôso a baver baver la, akuraior sambe; sha mkende u iyol You sha yô, akuraior sambe saratete.

⁴Á kura ishar yen kera, er ikomon ka i kura akaa nahan, man er ahungwa ka a tsuwen nahan, kape vea tsuwe vea ta sha i la.

⁵I kende a TER sha; gadia A tema sha, A iv Shion a ijirôron i mimi kua perapera.

⁶Akaa aa lu taveraa sha ayange a ou la, myom una lu wuee kua kwagh fan man mfe kpaa; mcie u cian TER ka kwagh na u injaa je la.

⁷Nenge, anomaior a ve nga geren imo ken won; mbatyomov mba i tindin ve u keren bem, mba geren mliam tsung.

⁸Akômaigbinda nga gbilin or u zenden nan ngu ga. A vihi ikuryan, a laha agar a tamen, a wa or iko ga.

⁹Tar ngu zungwen, ngu usen; Lebanon va ahenge, a use; Sharon hingir er desereti nahan; Bashan man Karmel ve ndoor ika kera.

¹⁰Hegen yô, Me mough sha, kape TER A kaa ne; hegen Me kende iyol Yam sha; hegen Me tile sha.

¹¹Ne wa iyav mbu akoouwua, né mar atighir; iôôn yen ka usu u hian ne je.

¹²Akuraior aa hingir er mnande u alie, er usaa mba i paa kera, i nande sha usu nahan.

¹³Ungwa nen, ne mba ne lu ken ica, kwagh u M er yô; man shi ne mba ne lu ikua kpaa, rumun nen er M lu a tahav yô.

¹⁴Mbaeren asorabo ken Shion mba cian; mba ve we Aôndo iko ga la, akarkase gbidye ve iyol. Ka anti wase nana fatyô u teman a usu u hian imôngo? Ka anti wase nana fatyô u teman a icôronmhie imôngoo?

¹⁵Ka u nan zenden sha perapera la, man nan er kwagh sha mimi, shi nan lahan mtsera u sha apera, nan nduur ave a nan, nan vende u ngohol inyaregh ki yamen ishô la, nan kondon ato a nan sha u nan ungwa kwagh u iwooor ga, man nan kusu ashe a nan sha u nana nenge iferkwagh kpaa ga yô;

¹⁶ka nan nana tema sha ijiir i sha ye, gar u sha avande ka ijiir i nan i waren ker; á na nan kwaghyan u nan mngerem ma nan ma manem maa lu keng je.

¹⁷Ashe a ou aa nenge a Tor ken iengem Na, aa nenge tar u gbangese zan zan ca ca.

¹⁸Ishima you ia gba henen ican i cieryol, ia kaa er: Wen u a er iyenge la ngu hana, man wen u a karen myohom la yô, ngu hana? Wen u a er iyenge i ayou a taven gôgônan la yô, ngu hana?

¹⁹Ikurior i i ye kwagh ishe ga la, ú kera nenge a i ga, ikurior i lamen zwa u cimin u u kav ga, sha nombor ugen kposo u u fatyô u kaven u ga la.

²⁰Kenger Shion gar u mkohol u uiniongo asev; ashe a ou aa nenge Yerusalem, ijiir i teman i bem, er tenti u a kporom a na ijiir igen ga, amande a na kpaa á tsuwa a mayange ga, ma kor na môm kpaa ua tôndo ga.

²¹TER Una lu se kwagh u icivirigh heregh je, ijiir i uifi man iwagh i gbangese, utso mba nahan vea kar sha mi ga, man tso u vesen kpaa ga.

²²Gadia TER ka Orjir wase, TER ka Orwan se atindi, TER ka Tor wase; ka Un je Una yima se ye.

²³Ikor you gba dur; i fatyô u taver ityôgh ki tsogh ga, i fatyô u samber ikondo ga. Tsô maa á kar ishar i ngeen yum la, mbaawanev kpaa ya ishar.

²⁴Ma or u nan tem ker kpaa nana kera kaa er: Kwagh nyoon mo, ga; ior mba ve tem heregh kpaa, á de ve asorabo a ve.