Read tiv Yesaia 39 Bible Online

Yesaia 39 - tiv bible

Yesaia 39

¹Hen shighe la je, Merodaki-baladan, wan u Baladan, tor u Babilon, tindi mbatyomov hen Hesekia a washika kua iwua; gadia a ungwa er a gbe angev, man a shi a wer yô.

²Tsô Hesekia kpaa ember ve, a tese ve iyou na i koson akaa ker cii, azurfa man zenaria man ilyôghonov man mkurem ma injaam, man iyou na i ikav mbi utyav cii, man akaa a a lu ken ayou a na a koson ikav ker cii; ma kwagh u ken iyou na shin ken tartor na cii, u Hesekia de tesen ve yô, lu ga.

³Tsô profeti Yesaia va hen tor Hesekia, va pine un er: Ior mban kaa nana? Man ka han ve dugh man ve ve her a wee? Hesekia kaa er: Ve due ken tar u icaa, ve ve her a mo, ka ken Babilon je.

⁴Shi a pine er: Ka nyi ve nenge a mi ken ya wouwe? Hesekia gema kaa er: Akaa a a lu ken ya wam cii, ve nenge a mi, ma kwagh môm u a lu ken ayou am a koson ikav ker cii u m tese ve ga yô, ngu ga.

⁵Tsô Yesaia kaa a Hesekia er: Ungwa kwaghôron u TER u akum a Sha:

⁶Nenge, ayange nga van a kaa a a lu ken ya wou cii, man akaa a uter ou ve koso cii zan zan nyian ne, á kura a, á yem a mi ken Babilon, kwagh môm una shi ga, kape TER A kaa la.

⁷Ônov ou mba vea due ken a we, mba wea mar ve je, á kôr mbagenev á yem a ve, vea za hingir mbaerentom ken ya u tor u Babilon.

⁸Hesekia gema kaa a Yesaia er: Imo i TER i u kaa la i dio tsô. Shi a kaa er: Gayô, sha ayange am yô, bem man mkpeyol vea lu.