Read tiv Yesaia 41 Bible Online

Yesaia 41 - tiv bible

Yesaia 41

¹Ne ityar i shin kpe u zegemnger, ver nen ato sha Mo ving; akuraior a̱ hide a agee a a her; ve̱ kporom, ve̱ ôr kwagh; sé za nen imôngo hen ijirôron.

²Ka an nan kpoghol or la vegher u sha iyangeiduen, u mhembe va kohol un sha hanma iaven i nguhar na la? Ka an nan gem akuraior nan ne a sha ikev na er a̱ ndyar utor shin angahar, a̱ er ve, ve̱ hingir er ihundu nahan sha sanker na, man er imough i purugh nahan, sha ada na la?

³A zenda ve ityô, a kar doo doo, sha gbenda u a lu a vande karen sha u ga je kpaa.

⁴Ka an je nan er kwagh ne nan kur unu? Ka Un u A yila ikov hii sha mhii je; Mo, TER u hiihii je, man hen mbamasetyô kpaa, Me lu her nahan vough.

⁵Ityar i hen kpezegemnger nenge, nahan i cia, akighir a tar cii gbidye akarkase iyol; ve gba kporom ikua, van.

⁶Hanma or nan wase ugen, nan kaa a anngô u nan er: Taver ishima!

⁷Or u gban kwagh, taver or u varen zenaria ishima; or u caghen kwagh sha msabe ngu taver or u gbidyen sha ijôv ishima, nan wuese er, mvar la doo; man a mande un sha ukusa, sha u a̱ de tenger ga yô.

⁸Kpa we, Iserael, wanakiriki Wam, Yakob, u M tsough yô, tsombor u huror Wam Aberaham,

⁹uwe, u M kôr u, M tôô u sha akighir a tar je, M yila u sha azongo a u, M kaa a we Mer: We, u ngu wanakiriki Wam, M tsuwa u, M ta u kera ga,

¹⁰de cie ga, gadia M ngu a we; de enger kenger sha mcie ga, gadia Mo M ngu Aôndo wou, M taver we, shi M wasen we, man M tuur we sha uwegh Agh ku yanegh ku yiman a yima la.

¹¹Nenge, mba asema a vihi ve a we cii, vea va ahenge, vea hingir kwaghkunya; man mba ve hendan a we kpaa, vea lu ma kwagh ga, vea saa ishe je.

¹²Ú ker mba ve nenge num a we la, kpa ú zua a ve ga; mba ve nenge ityav a we la, vea hingir er ka ma kwagh ga yô, man er gbilinkwagh kpaa.

¹³Gadia Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we.

¹⁴De cie ga, we Yakob, ananyigôgh, ne ior mba Iserael! Ka Mo M wasen we ye, kape TER A kaa ne, Orpaan wou ka Icighan u Iserael je.

¹⁵Nenge, geman Yam we, ú hingir ikyekye i he i gbidyen alakema, i horon, i lun a anyi kpishi; ú gbidye iwo, ú hembe i avur avur, ú gema agungu, aa hingir er imough yô.

¹⁶Ú peer ve, ahumbe aa purugh a mi kera, hiar una sambe ve kera; kpa we yô, ú ember ken TER, ú ta ihagh sha Icighan u Iserael.

¹⁷Mbaatsanev man mbaibanave ker mgerem, kpa ma ga, nombor ve uma sha ci u imura; Mo, TER, Me ungwa imo ve, Mo, Aôndo u Iserael, Me undu ve ga.

¹⁸Me bugh uifi sha agungu a kpuun kpuun man amboramnger shin apev; Me gema desereti una hingir ityungumnger, tar u ombor kpaa ua hingir amboramnger.

¹⁹Me môôr kon u sedar ken desereti, man shi kon u akashia man mertel kua kon u olev u ken toho kpaa; ken taaikôngo Me môôr kon u fer man u pelane a u ouki imôngo,

²⁰sha u ve̱ nenge, ve̱ fa, ve̱ hen sha mi, ve̱ kar imôngo cii er i lu uwegh ku TER ku er nahan yô, ka Icighan u Iserael A gbe akaa ne ye.

²¹Due nen a ijir yen, kape TER A kaa la; va nen a atôakaa a en, kape Tor u Yakob A kaa la.

²²Ve̱ due a a, ve̱ pase se kwagh u una va er yô. Pase nen akaa a ngise, er a lu yô, sha er se̱ hen sha a, se̱ fa mkur u a; shin tese se akaa a aa va er yô;

²³pase nen se akaa a a va er ken hemen yô, sha er se̱ fa er ne lu mbaaôndo yô; er nen ma kwagh, shin a lu u dedoo, shin a lu u bo, sha er i̱ kondo se iyol, sé gba kenger imôngo tsô yô.

²⁴Nenge, ne mba ma kwagh ga, tom wen kpaa ka gbilinkwagh tsô; or u nan tsough ne la kpaa nan ngu kwagh u ndôhôrshima.

²⁵M kpoghol orgen sha imbusutarimese, a va je; sha vegher u sha iyangeiduen je, or u una yila sha iti Yam; una ndyar mbatarev er ka inyandor nahan, er ormaantyegh ka nan kume inyaityuu nahan.

²⁶Ka an nan vande pasen kwagh la sha hiihii je, sha u se̱ fa, man tsuaa kpaa, sha er ma se kaa ser: Nan kaa mimi je yôô? Een, ma or u pasen nan ngu ga, ma or u tesen kpaa nan ngu ga, ma or u ungwan kwaghôron wen kpaa nan ngu ga.

²⁷Mo M vande kaan a Shion, Mer: Nenge, nenge mban; Me na Yerusalem oryôôn loho u dedoo.

²⁸Zum u M jinge yô, or lu ga; ken a ve je kpaa ma or u wasen mhen nan ngu ga, sha u ma M pin ve kwagh, ma ve kaam yô.

²⁹Nenge, ve cii, mba ma kwagh je ga, ityom ve kpaa ka gbilinkwagh tsô, ieev mbi keren a ker kpaa ka ahumbe man gbilinkwagh dang tsô.