Read tiv Yesaia 46 Bible Online

Yesaia 46 - tiv bible

Yesaia 46

¹Bel gba inya, Nebo ngurum; ieev vev mbi sha uzendenya kua sha uile; akaa a ne tee ne zenden a mi la, hingir ikav mbi yuhwan uzendenya mba ve ver yô.

²Mba ngurum, gulen inya nongo, ve fatyô u yiman ikav mbila ga, ve ayol a ve je kpaa i yem a ve uikangen.

³Ver ato her a Mo, we ya u Yakob, man asande a hen ya u Iserael a a shi her la, ne mba M tee ne, hii sha mmar wen je, mba M tee ne hii ken uya je;

⁴zan zan iyol i been kpaa Me lu her nahan vough man zan zan ivu je kpaa, Me tôô ne; ka Mo M lu eren nahan ye, Mo Me tôô, Mo Me kôr, shi Me yima kpaa.

⁵Ka an, né karem sha a nana, man né verem vough a nana; né karem sha mluyol u ana er se̱ lu kwagh mômô?

⁶Ve mba ve haa zenaria u ken ikpa hen inya, man shi ve karen azurfa sha iyôgh ki karen kwagh a min la, ka ve er tôndo a orvarenzenaria er nana̱ er aôndo a mi; maa ve gule inya ve civir!

⁷Ka ve tôô un sha avande, ve za a na, ve za ver hen ijiir na; a tile sha, moughon hen ijiir na kera mayange ga. Or á yila un kpaa, una rumun ga, una yima nan ken ican i nan kpaa ga.

⁸Umbur nen kwagh ne, lu nen nomso; shi hen nen ken ishima, ne mba ne peren atindi.

⁹Umbur nen aerenakaa a tsuaa la; gadia Mo M ngu Aôndo, mô ugen ngu ga; Mo Aôndo je, mô ugen ngu er Mo nahan ga,

¹⁰u M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la; M kaa Mer: Awashima Wam una lu je, Me er kwagh u a doom ken ishima u eren la cii;

¹¹M yila inyon i tswam sha ityoughkitaregh, or u sha awashima Wam ken tar u caa; M ôr kwagh, Me kure un sha mi vough kpaa; M vande veren ishima sha kwagh, shi Me er un kpaa.

¹²Ver nen ato her a Mo, ne mbacighirasema, ne mba ne gbe ca a perapera la.

¹³M ngu kporom a perapera Wam, a gba ca ga, myom Wam kpaa una ngôôr ga, Me na myom ken Shion sha ci u Iserael icivir Yam.