Read tiv Yesaia 58 Bible Online

Yesaia 58 - tiv bible

Yesaia 58

¹Genger imo, de deen ga, kende imo you sha er ka ikpamkor nahan, pase ior Av kwaghbo ve, kua ya u Yakob asorabo a ve.

²Nahan kpaa mba keren Mo ayange ayange man sar ve u fan igbenda Yam, bee er ikurior i eren kwagh u perapera man i undun akaawan a Aôndo ve ga yô, ve gema ve pinem akaawan a perapera, u kporom hen Aôndo kpaa doo ve.

³Ka sha ci u nyi man se her kwaghyan, kpa U kera nenge ga? Ka sha ci u nyi se er uma wase ican, kpa U kera we iko ga? Nenge, sha iyange yen i hôron kwaghyan la, ne gema ne mba eren akaa a en tsô, man ne tsule mbatomov enev cii sha u ve̱ er tom.

⁴Nenge, ne mba her kwaghyan sha ci u num u nôngon man zwazôhôn, man sha ci u tan iju sha dang, ne mba kera her kwaghyan hegen sha u á ungwa imo yen Sha ga.

⁵Ka imbakwaghyan i hôron i M tsough la ha? Iyange i or nana er uma u nan ican, je nana wa ityough inya er ikenaika nahan, man nana tar abaasôhô man mtwem hingir gambe u nana? Ka kwagh u u yer wer, kwaghyan u hôron man iyange i doon TER ishima je nee?

⁶Kwaghyan u hôron u M tsough yô, kera ka u né sagh ikangenev mbi iferkwagh kera, man né poso igbur, né na mba i kighir ve la ian u yemen, man shi né kever hanma igbur gaa?

⁷Shi ka u karen mbagenev kwaghyan wou, man u van a mbaatsanev mba ve lu a ape suur ga hen ya wou gaa?

⁸Nahan iwanger you ia due er ka sev mbu aven nahan, man mkpeyol wou una va fefa, perapera wou kpaa una za u sha ishi, iengem i TER kpaa ia yisa u ken ijime.

⁹Nahan wea yila, TER kpaa Una rumun; wea genger imo kpaa, Una kaa er: Mo ne. Aluer wea dugh igbur i hen a we la kera, man shi hôwe u dughun sha ilyahan kua u ôron kwagh sha ifer kpaa yô;

¹⁰aluer ú na mbagenev kwagh u we kpaa a doo u la, man ú na icanor nan ide, nahan iwanger you ia wanger ken ime, ime You kpaa ia hingir er ka atetan nahan;

¹¹TER kpaa Una hemen we gbenda gbem zan zan je, Una na uma wou una ide ken ajiir a ombor, Una taver akuhe ou; nahan wea hingir er ka sule u i ur u mngerem yô, man er ka imbor i i om mngerem mayange ga yô.

¹²Mba ou vea hile á maa agar a ngise i yôhôl la; amagh a ikov i ngise la ú shi ú maa a heregh; á yila u er: Orsôron ukpekpe mba hemben, ornderen igbenda i gar sha ci u teman her.

¹³Aluer wea hide a nguhar wou ijime sha iyange i memen, wea kera er tom wou sha icighanyange Yam ga, aluer wea yila iyange i memen wer: Ka kwagh u saren mo, man ka icighanyange i TER, kwagh u icivirigh je, man ú civir i, er ú kera za sha igbenda you ga, shin ú ker ian sha ci u tom wou ga, shi ú kera ôr akaa a ou kpaa ga yô,

¹⁴nahan ú ember ken TER kpishi, Mo kpaa Me na er ú unde sha ajiir a taven sha, a shin tar, Me koso u sha dyako u teru Yakob kpaa; gadia kape zwa u TER je u kaa ne.