Read tiv Yesaia 59 Bible Online

Yesaia 59 - tiv bible

Yesaia 59

¹Nenge, uwegh ku TER ku yina sha u Una yiman ga, ato Na kpaa yuhwa sha u ungwan ga;

²kpa ka aferakaa a en je a pav ne a Aôndo wen, shi ka asorabo a en kpaa a cir ne ishigh Nagh, er Una ungwa ga ye.

³Gadia ave a en hôngor sha awambe, man ahôaveegh a en kpaa sha iferkwagh; ityumbuzwaagh yen kpaa er aie, nombor wen kpaa ngu er kwagh sha icugh.

⁴Mô môm nan za yer ijir sha perapera ga, mô môm kpaa nan kpelan ishô sha mimi ga; mba suur sha gbilinkwagh mba er aie; ve jile iyol sha dang, ve mar ifer.

⁵Ve tsev aji a gbinde, ve tume kper u kperekpetange; u nan ye aji ve la, nan kpe; man i i hembe i yô, igbinde gema due kimi.

⁶Kwaghtumen ve la una hingir ikondo ga, vea cir ayol a ve sha ityom ve la ga; ityom ve la ka ityom i ifer, man aeren a aperagh nga sha ave ve.

⁷Angahar a ve nga zan ayem sha u za eren kwaghbo; mba zan fefa sha u za haan awambe a orishôôgh; mbamhen vev ka mbamhen mba ifer tsô, myôhôr kua mtim mba sha igbenda ve.

⁸Gbenda u bem ve fa u ga; kwagh u vough ngu sha ihange ve ga; ve er igbenda ve gbunô gbu gbunô; hanma or u nana zende sha i yô, nan fa bem ga.

⁹Ka nahan man ijirôron sha mimi i gbe ca a vese, perapera kpaa a ar sha a vese ga ye, se mba keghen iwanger, kpa ime gema ngi, se mba keghen mmondo u iwanger kpa se mba geman zenden ken angôghime.

¹⁰Se mba peven kpekpe yemen er mbaapirashe nahan; een, se mba peven er mba ve lu a ashe ga yô; iyange sha tembe kpaa se mba nôngon gbev er ka shighe u aôndoaimegh yô; se mba ken atô u mbataveryol er ka mbakpenev nahan.

¹¹Se cii, se mba te kume er udwem nahan, se mba vaan zungwen er atii nahan; ka ijirôron i mimi se keghen ye, kpa ngi ga, man myom kpaa, kpa ngu ca a vese.

¹²Gadia atindi a ase a peren ngee sha ishigh You, asorabo ase kpaa nga nan se ibo; gadia atindi a ase a peren nga a vese ityô, man aferakaa ase kpaa, se fa a,

¹³ka u peren atindi man u nyiman TER, man u geman kera den u dondon Aôndo wase ityô, u ôron kwagh u mkighir u sha ican man mhendan, u henen akaaôron a aiegh ken ishima man ôron a kpaa.

¹⁴Ijirôron i mimi kpaa, i daa i kera, i hide ijime, perapera kpaa tile ca; gadia mimi nôngo gbev gba hen tembejirigh, man perapera kpaa kera zua a gbenda u nyôron ga.

¹⁵Een, mimi ngu ga; or u nan kem iyol sha ifer yô, mba ngohol nan akaa sha apera. Tsô TER nenge, vihi Un er kwagh u jighilii a lu ga yô,

¹⁶Shi A nenge or môm lu ga, kpiligh Un iyol er ma or u nan paase kwagh nan lu ga yô; ka sha ci u nahan man uwegh Nagh ku wase Un; perapera Na kpaa suwe Un.

¹⁷A haa perapera iyol er rigautya u iyôô nahan; idyer i myom ngu Un sha ityou; A haa iyevoron iyol er ka akondo nahan, man A haa gbashima iyol er ka riga u wuhegh nahan.

¹⁸Er aeren a ve a lu la, kape Una kimbi ve je la: ishimanyoon sha mbaahendanev Nav, iyevoron sha mbaihomov Nav; Una or iyev sha ityar i hen kpe u zegemnger la.

¹⁹Nahan vea cia iti i TER, á hii shin ityôtar je, man iengem Na kpaa hii sha iyangeiduen je; gadia Una va er iwuhamnger i tiaver, i humbe u TER a mgbegh i yô.

²⁰Una va hen Shion sha u va lun Orpaan ve, kua hen ior mba Yakob mba ve gem sha u undun kwaghbo ve la, kape TER A kaa ne.

²¹TER ngu kaan nahan er: Ikuryan Yam a ve ka i ne: Jijingi Wam u A lu sha a we man akaaôron Am a M we u ken zwa, aa due u ken zwa kera mayange ga, shin sha zwa u tsombor u vor wou kpaa ga, kape TER A kaa la, hii hegen je, zan zan gbem sha won.