Read tiv Yesaia 9 Bible Online

Yesaia 9 - tiv bible

Yesaia 9

¹Ime kera ngi sha ci u un u a lu ken ican la ga. Sha ayange a ngise la A gema tar u Sebulon kua u Nafetali, hingir kwagh u iheenegh; kpa sha ayange a masetyô yô, Una civir ian i yemen shin zegemnger, yande Yordan, veghertar u akuraior la.

²Ior mba ve zenden ken ime, ve nenge iwanger i vesen; mba ve tem ken tar u mure u kuugh la kpaa, iwanger ta sha a ve.

³U seer ikurior ne, i ngee, U seer ve iember kpishi kpaa; mba ember sha ishigh You sha inja i m-ember i sha iyange i sunda, er ior ve ember shighe u ka vea karen kwar sha ishar yô.

⁴Gadia igber i i yoho un man gbough ku sha ijime na kua kwagir u or u kighir un a ican la, U sombo kera er sha iyange i Midian yô.

⁵Gadia hanma ikôvough ki nguhar ki orutya ki ki lu karen a m-ov, man ikondo i haan iyol, i i gem i i shigh i awambe la yô, á nande kera, á hingir kwagh u keer usu a mi.

⁶Gadia i mar se Wan, i na se Wan u nomso; tarkuran ngu sha vandegh Nagh; mba yer iti Na er: Orwasenmhen u Kpilighyol, Aôndo u Ageegh, Ter u Tsôron, Wantor u Bem.

⁷Mseer u tarkuran kua bem vea lu a ikighir je ga, sha ikônough ki torough ki Davidi man sha tartor na kpaa, sha er á ver u dông u̱ lu taveraa sha ijirôron i vough kua sha perapera, hii hegen je zan zan gbem sha won. Gbashima u TER u akum a Sha una er kwagh ne.

⁸Ter tindi a kwaghôron ken Yakob a gba ken Iserael.

⁹Ior cii vea fa, ka Eferaim man mba ve tem ken Samaria, mba ve er kwagh ken ishima sha iyolgengese kua sha ishima i iceenegh, ve kaan er:

¹⁰Akam yôhôl, kpa sea maa sha awen a kuan; i gber utur, kpa sea gema sé ver usedar sha ityouv vev.

¹¹Nahan TER va a mbaahendanev mba Reshin sha a ve, A tor mbaihomov nav ityô:

¹²ka Mbashiria sha vegher u sha ityoughkitaregh man Mbafiliti vegher u shin ityôtar la; ve gema ve aver zwa, ve mena Iserael. Nahan kpaa iyugh Na ngi a kar kera ga, kpa uwegh Nagh ku naregh ku di her tsô.

¹³Nahan kpaa ior gema her a Na, u A tsaha ve la, ga; shi ve ker TER u akum a Sha kpaa ga.

¹⁴Nahan TER gber Iserael ityough kua tsa man ndaregh ku ivilegh kua ikenaika, sha iyange i môm je.

¹⁵Orvesen u lun a icivir ka nan nan lu ityough ye, man profeti u tesen ior aie la, ka un a lu tsa ye.

¹⁶Gadia ve mba ve hemen ior ne, ve gema ve hingir mba nan mtsum, man shi mba i hemen ve la ve gba ken mtsum la.

¹⁷Ka nahan man Ter Una kera ember ikaior ve ga, man shi Una zungwe ancôgholov vev kua kasev vev mba côgholov mhôônom kpaa ga ye, gadia hanmô ve ka dangor man u eren ifer tsô, hanma zwa kpaa ngu ôron iferkwagh. Nahan kpaa iyugh Na ngi a kar kera ga, kpa uwegh Nagh ku naregh ku di her tsô.

¹⁸Gadia ifer hie er usu nahan, i nande ukôrakondo kua usaa kera; mimi je, ngu hie ikô i i we mgbigh mgbigh yô, zan zan i kôndo sha er mnyim ma ma vingir ma yem sha nahan.

¹⁹Sha iyugh i TER u akum a Sha yô, inya hia kera, ior kpaa ve hingir er kwagh u keer usu a mi yô; or zungwe anngô u nan ga.

²⁰Mba tsugh kwagh vegher u ken uwegh ku yanegh, nahan kpaa ijen ngi kôron ve her, mba ye kwagh ken uwegh ku imesegh kpa ka kom ve ga; vea ya inyam, hanma or inyam i uwegh ku nan iyol i nan;

²¹Manase ya Eferaim, Eferaim di Manase, ve imôngo cii ve kôr Yuda ihom. Nahan kpaa iyugh Na ngi a kar kera ga kpa uwegh Nagh ku naregh ku di her tsô.