Read tiv Levitiku 1 Bible Online

Levitiku 1 - tiv bible

Levitiku 1

¹Tsô TER yila Mose, ôr kwagh a na ken tenti u kohol ker la, A kaa er:

²Ôr kwagh a Mbaiserael, kaa a ve wer: Aluer hanma or ken a ven á lu nan pe nan TER nagh yô, na nen nagh sha uile, sha abua kua iyôngo man ivo.

³Aluer nagh ku nan, á lu ku nanden ku sha abua yô, nana̱ na nom u a lu a ihogholough iyol ga yô, nana̱ za na hen hunda u tenti u kohol ker la, sha er TER Una rumun nan yô.

⁴Nana̱ penda uwegh sha ityough ki nagh ku nanden kura; nahan á rumun ku sha ci u nan er ku̱ hingir iwom sha ci u nan yô.

⁵Nana̱ sôngo gumbua la sha ishigh ki TER; upristi, ônov mba Aron mbala, ve̱ va a awambe, ve̱ va haa awambe la sha ambusu a atse a a lu hen hunda u tenti u kohol ker la, ve̱ ningir ve̱ tser.

⁶Nana̱ hua nagh ku nanden kura nana̱ bur ku.

⁷Ônov mba pristi Aron ve̱ penda usu sha atse a nanden nagh sha mi ve̱ wa ikon sha mi vôôr vôôr.

⁸Upristi, ônov mba Aron mbala ve̱ tar aci a inyam la kua ityough man ahôm sha inja sha inja, sha ikon i i lu sha usu u sha atse la;

⁹kpa ikav mbi kimi kua angahar yô, nana̱ ôô sha mnger; pristi a̱ gema cii a̱ nande sha atse a nanden nagh sha mi, i̱ lu nagh ku nanden, ka nagh ku usugh ku human doon ku nan TER je la.

¹⁰Man aluer nagh ku nan, ku nanden á lu sha iyôngo shin ivo yô, nana̱ na nom u a lu ihogholough iyol ga yô.

¹¹Nana̱ sôngo i vegher u atse a nanden nagh sha mi u ken imbusutarimese la, sha ishigh ki TER; upristi, ônov mba Aron ve̱ haa awambe la sha ambusuatsegh, ve̱ ningir ve̱ tser.

¹²Nana̱ bur i aci aci, ityough ki i man ahôm a i; pristi a̱ tar a sha inja sha inja sha ikon i i lu sha usu u sha atse la;

¹³kpa ikav mbi kimi kua angahar a i yô, nana̱ ôô sha mnger; pristi a̱ va a mi cii, a̱ va nande sha atse; ka nagh ku nanden ku usugh ku human doon ku nan TER je la.

¹⁴Aluer nagh ku nana na TER á lu ku nanden ku sha inyon yô, nana̱ na nagh sha mbaatii shin sha utulembamkunguv.

¹⁵Pristi la, a̱ va a mi hen atse, a̱ tôndo ityough kera, a̱ nande ki sha atse; i̱ kam awambe la sha imbusuatsegh;

¹⁶a̱ dugh kerker, shi a̱ tsuwa ingur, a̱ haa hen kpeatsegh, vegher u sha ityoughkitaregh hen ijiir i haan mtwem la.

¹⁷A̱ ande un hen akper a na, kpa a̱ de paven vegher a̱ gbe ken inya ga; pristi a̱ nande un sha atse, sha ikon i i lu sha usu la; ka nagh ku nanden ku usugh ku human doon ku nan TER.