Read tiv Levitiku 10 Bible Online

Levitiku 10 - tiv bible

Levitiku 10

¹Tsô Nadabi vea Abihu ônov mba Aron, ve tôô ugbande mba usuv, hanmô tôô u nan, nan wa usu shimi, shi nan wa kwaghhumandoon shimi, kpa nan va a usu ugen kposo sha ishigh ki TER, u A ne ve zwa sha u ga yô.

²Tsô usu due sha ishigh ki TER va hia ve, ve kpe sha ishigh ki TER.

³Tsô Mose kaa a Aron er: Ka kwagh u TER A kaa je la, er: Ka hen mba ve mgbôghom a Mo la, Me pase icighanmlu Wam ye, shi Me pase icivir Yam sha ishigh ki iorough cii kpaa ye. Kpa Aron lu ving.

⁴Nahan Mose yila Mishael man Elesafan ônov mba Ushiel anngô u ter u Aron la, a kaa a ve er: Kporom nen heen, va tôô nen anngôôv enev hen icighanjiir kera, yem nen a mi ken akôngoafogh.

⁵Tsô ve kporom ve va tôô ve a akondo a ve iyol, ve due a mi ken akôngoafogh er Mose kaa nahan.

⁶Mose gema kaa a Aron man ônov nav Eleasar man Itamar, er: De lu nen ityough meghaa ga, man de anden nen akondo a en kpaa ga, sha er né kpe ga, man A̱ de yugh ior cii kpaa ga yô; kpa anmgbianev enev, ya u Iserael cii yô, ve̱ gba vaan usu u TER A nande la tsô.

⁷De dugh nen hen hunda u tenti u kohol ker la ga, sha er né kpe ga yô; gadia mkurem ma shighen ma TER ma ne iyol. Tsô ve kpaa ve er, er Mose kaa ve nahan je.

⁸TER shi ôr kwagh a Aron, kaa er:

⁹Msôrom, shin ma kwaghman u taver yô, de me nen ga, we kua ônov ou kpaa, zum u nea nyôron ken tenti u kohol ker la, sha er né kpe ga yô; ka tindi u eren sha mi gbem sha ikov ikov;

¹⁰sha er ne̱ pav icighankwagh kposo, a kwagh u a lu icighankwagh ga yô, kua kwagh u a lu wang ga yô, a kwagh u a lu wang yô.

¹¹Man sha er ne̱ tese Mbaiserael akaawan a TER, a Mose ôr ve la cii yô.

¹²Tsô Mose ôr kwagh a Aron man a Eleasar man Itamar ônov nav mba ve shi her la, a kaa a ve er: Tôô nen nagh ku sha samuyia ku iniav mbi usuv mbi TER ku ku shi her la, ya nen ku hen kpeatsegh, kwa u̱ de lu shimi ga; gadia ka icighankwagh u hemban je;

¹³yaan nen ku ken icighanjiir, gadia ka kwar wou a ônov ou, u i dugh ken iniav mbi usuv mbi TER je la; gadia kape i kaam la.

¹⁴Man gugu u cian kua namegh ku kenden sha yô, yaan nen ken ijiir i wang, we kua ônov ou mba nomso man mba kasev kpaa, gadia i na u, ka kwar wou a ônov ou, u i dugh ken iniav mbi bem mbi Mbaiserael je la.

¹⁵Namegh ku kenden sha man gugu u cian la yô, ve̱ vaan a mi a iniav mbi usuv mbi sha ahôm mbila imôngo, sha er vea na nagh ku cian mi sha ishigh ki TER, i̱ hingir kwagh wou a ônov ou, ka kwar wen u gbem je la, er TER kaa nahan.

¹⁶Tsô Mose ker ivo i nagh ku isholibo tsung, kpa i vande nanden i kera ve; nahan ishima vihi un a Eleasar man Itamar, ônov mba Aron, mba ve shi her la, a kaa er:

¹⁷Inja na nan ne kera ye nagh ku isholibo ken icighanjiir ga? Gadia ka icighankwagh u hemban cii je; A na ne ku sha u ne̱ tôô ibo i ior kera man ne̱ na iwom sha ci ve sha ishigh ki TER.

¹⁸Nenge, i va a awambe a ku ken atô u icighanjiir ga; yô ka u ma ne ye ku ken icighanjiir je, er m kaa nahan.

¹⁹Tsô Aron ôr kwagh a Mose, kaa er: Nenge, nyian ve na nagh vegh ku isholibo kua nagh vegh ku nanden sha ishigh ki TER; man nenge, imbakwagh i i tserem ne; mea ye nagh ku isholibo nyian nahan ma i doo TERE he?

²⁰Mose ongo nahan yô, doo un.