Read tiv Levitiku 13 Bible Online

Levitiku 13 - tiv bible

Levitiku 13

¹TER shi ôr kwagh a Mose man Aron kaa er:

²Aluer or á lu a imor sha kwavyolough u nan, shin iyolkuran, shin ma ibeenegh man á hingir angev mbu imandev sha kwavyolough u nan yô, i̱ va a nan hen Aron, shin hen mô u ken ônov nav, upristi;

³pristi a̱ nenge angev mbu mbu lu nan sha kwavyolough la; aluer ice i heregh ia hingir pupuu man aluer mbua lu er mbu saa sha kwavyolough tseegh ga, mbu nyôr kimi yô, ka angev mbu imandev je la; pristi una nengen nahan yô, a̱ pase er nan kera lu wang ga yô.

⁴Aluer ibeenegh kila kia kungu sha kwavyolough u nan man aluer kia lu er ki saa sha kwavyolough, kia nyôr kimi ga, man ice i heregh kpaa ia hingir pupuu ga yô, pristi a̱ wuhe or u kwagh a dugh nan iyol la ayange ataankarahar;

⁵pristi a̱ shi a̱ nenge nan sha iyange i ataankarahar la; yô, aluer nan nenge, á lu nan er angev mbula mbu her nahan tsô, mbu seer sha kwav u nan ga yô, pristi a̱ shi a̱ wuhe nan ayange ataankarahar;

⁶sha iyange i ataankarahar la, pristi a̱ shi a̱ nenge nan, nahan aluer kwagh u a dugh nan iyol la una hingir fing, una seer a seer sha kwavyolough ga yô, pristi a̱ pase er nan ngu wang; ka iyolkuran tsô, nana̱ ôô akondo a nan, tsô nana lu wang.

⁷Kpa aluer iyolkuran la ia seer a seer sha kwavyolough er nan vande tesen pristi iyol i nan sha u i̱ wanger nan kera la yô, shi nana̱ kimbir u tesen pristi iyol i nan;

⁸pristi a̱ nenge, aluer iyolkuran la ia seer a seer sha kwavyolough yô, pristi a̱ pase er nan ngu wang ga, ka imande je.

⁹Aluer angev mbu imandev mbua lu or iyol yô, i̱ va a nan hen ishigh ki pristi;

¹⁰pristi a̱ nenge, aluer una nenge imor i pupuu sha kwavyolough man ia gema ice ia hingir pupuu yô, man sha imor la a lu azoghol azoghol yô,

¹¹ka tse imande je a lu sha kwavyolough u nan ye, pristi a̱ pase er nan ngu wang ga, a̱ de wuhu nan ga, gadia nan kera ngu wang ga.

¹²Aluer imande ia samber sha kwavyolough zan zan ia cir kwavyolough u oruange la cii, á hii sha ityough ki nan je, á ar shin angahar a nan, sha ashe a pristi er a nenge yô,

¹³pristi una nenge imande la i cir nan kwavyolough cii yô, a̱ pase er or la nan ngu wang, nan gema nan hingir pupuu cii, nan ngu wang je.

¹⁴Kpa aluer azoghol a va due nan iyol yô, nan ngu wang ga.

¹⁵Pristi una nenge a azoghol la yô, ka kwagh u wang ga, ka imande je.

¹⁶Aluer azoghol la a mire a gema a hingir pupuu yô, nana̱ va hen pristi;

¹⁷pristi a̱ nenge nan, aluer una nenge angev mbula mbu gema mbua hingir pupuu yô, pristi a̱ pase er oruange la nan ngu wang; nan ngu wang je.

¹⁸Aluer nana lu a ivav sha kwavyolough u nan man ia va bee,

¹⁹man sha ijiir i ivavegh la imor i pupuu ia gema á due, shin ibeenegh ki nyian daalaa yô, i̱ tese pristi;

²⁰pristi a̱ nenge, aluer kia lu er ki saa sha kwavyolough ga, man ice i her kpaa ia gema á hingir pupuu yô, pristi a̱ pase er nan ngu wang ga, ka angev mbu imandev je, mbu hii sha ivav ye.

²¹Kpa aluer pristi una nenge sha mi man una zua a ice i pupuu sha mi ga, man kia saa sha kwavyolough, kia gba lun fing nahan tsô yô, pristi a̱ wuhe nan ayange ataankarahar;

²²man aluer kia samber a samber sha kwavyolough yô, pristi a̱ pase er nan ngu wang ga, ka angev je.

²³Kpa aluer ibeenegh kila kia saa heregh kia samber ga yô, ka iyolough ku ivavegh tsô; pristi a̱ pase er nan ngu wang.

²⁴Shin aluer usu u hia or sha kwavyolough man iyolough ku usugh kura kua hingir ibeenegh ki nyian daalaa, shin ki pupuu yô,

²⁵pristi a̱ nenge ijiir la, aluer ice i hen ibeenegh kila ia gema ia hingir pupuu man kia lu er ki saa sha kwavyolough ga, ki mire kimi yô, ka imande je; i hii sha mhie u usu la ye, pristi a̱ pase er nan ngu wang ga, ka angev mbu imandev je.

²⁶Kpa aluer pristi una nenge sha mi, man una nenge a ice i pupuu sha ibeenegh kila ga, man kia saa sha kwavyolough kia gba lun fing nahan, pristi a̱ wuhe nan ayange ataankarahar;

²⁷sha iyange i ataankarahar la, pristi a̱ shi a̱ nenge nan, aluer kwagh la una seer a seer sha kwavyolough yô, pristi a̱ pase er nan ngu wang ga; ka angev mbu imandev je.

²⁸Kpa aluer ibeenegh kila kia lu di her nahan tsô, kia seer a seer sha kwavyolough ga, kia lu fing yô, ka imor i mhie u usu la tsô, pristi a̱ pase er nan ngu wang; gadia ka iyolough ku usugh tsô.

²⁹Aluer nomsoor shin kwase vea lu a angev sha ityou shin sha indyer yô,

³⁰pristi a̱ nenge angev mbula; aluer mbua lu er mbu saa sha kwavyolough ga, mbu nyôr kimi, man ice i her la, ia lu vende vende ia nyian er ayaikure yô, pristi a̱ pase er nan ngu wang ga, ka lagh je, ka imande i sha ityou, shin i sha indyer.

³¹Man aluer pristi una nenge lagh la una lu er a saa sha kwavyolough ga, man ice i il kpaa ia lu sha mi ga yô, pristi a̱ wuhe or u lagh a er nan la ayange ataankarahar.

³²Sha iyange i ataankarahar la, pristi a̱ nenge angev mbula; aluer una nenge lagh la una seer a seer ga, man ice i nyian er ayaikure nahan ia lu sha mi ga, man shi aluer lagh la una lu er a saa sha kwavyolough tsô yô,

³³nana̱ hondo ityough kpa nana̱ de hondon lagh la ga, pristi a̱ shi a wuhwe or u lagh a er nan la, ayange ataankarahar.

³⁴Sha iyange i ataankarahar la, pristi a̱ nenge lagh la; aluer lagh una seer a seer sha kwavyolough ga, man aluer una lu er a saa sha kwavyolough yô, pristi a̱ pase er nan ngu wang, nana̱ ôô akondo a nan, tsô nana lu wang je.

³⁵Kpa aluer lagh la una gema á seer a seer sha kwavyolough er i vande pasen er nan ngu wang yô,

³⁶pristi a̱ nenge nan, aluer una nenge lagh la, a seer a seer sha kwavyolough yô, pristi a̱ de kera ker ice i i nyian er ayaikure nahan ga, nan ngu wang ga.

³⁷Kpa aluer sha mnenge na, lagh la una lu di her nahan tsô, man ice i il kpaa ia mende sha mi yô; lagh la bee je ve, nan ngu wang; pristi a̱ pase er nan ngu wang je.

³⁸Man shi aluer nomsoor shin kwase nana lu a abeen sha kwavyolough u nan, pung yô,

³⁹pristi a̱ nenge, man aluer una nenge abeen a sha kwavyolough ve la, a kungu fuwee yô, ka iyolkuran tsô i dugh sha kwavyolough ye, nan ngu wang.

⁴⁰Aluer ice i or la ia tsor nan sha ihaghtyo yô, nan kpur ityough; nan ngu wang.

⁴¹Man aluer ice i nan ia tsor nan hen icul yô, nan kpur icul; nan ngu wang.

⁴²Kpa aluer sha ityough ki kpurun kila shin sha icul i kpurun la, ijiir i nyian fing ia lu her yô, ka imande je i dugh nan sha ityough ki kpurun kila, shin sha icul i kpurun la ye.

⁴³Pristi a̱ nenge nan, aluer imor i hen ijiir la, ia nyian fing sha mkpur u ityough ki kpurun ki nan, shin sha icul i kpurun i nan, er imande ka i lu sha kwavyolough nahan yô,

⁴⁴ka orimande je, nan ngu wang ga, pristi a̱ pase kpee er nan lu wang ga yô; angev mbu nan sha ityou.

⁴⁵Orimande u nan lu a angev yô, i̱ ande akondo a nan, nana̱ lu ityough meghaa, nana̱ cir gbemzwa u nan u sha, nana̱ genger imo nana̱ kaa er: Wang ga, wang ga!

⁴⁶Ayange a angev mbu lu nan iyol la cii, nana lu wang ga, nan ngu wang ga; nana̱ teman tswen; ka ken akôngoafogh man ijiir i teman i nan ia lu ye.

⁴⁷Aluer angev mbu imandev mbua lu sha ikondo yô, shin a lu ikondo i sha ul shin i sha mou kpaa,

⁴⁸shin mbua lu sha zermou shin sha abamou u ikondo i mou shin i ul la, shin mbua lu sha ikôv, shin sha hanma kwagh u i er sha ikôv;

⁴⁹aluer angev mbua lu sha ikondo kwel, shou shou, shin mbua lu nyian kpaa, shin sha ikôv, shin sha zermou, shin sha abamou, shin sha hanma kwagh u i er sha ikôv kpaa yô, ka angev mbu imandev je; i̱ tese pristi.

⁵⁰Pristi a̱ nenge angev mbula, a̱ wuhe kwagh u a lu a angev la ayange ataankarahar;

⁵¹sha iyange i ataankarahar la a̱ nenge angev mbula; aluer angev mbua seer a seer sha ikondo, shin sha zermou, shin sha abamou, shin sha ikôv, hanma kwagh u i er sha ikôv cii kpaa, ka imande i bo je, ka kwagh u wang ga.

⁵²A̱ nande ikondo, shin a lu zermou, shin a lu abamou, shin a lu i sha ul shin i sha mou, shin hanma kwagh u i er sha ikôv u angev mbu lu sha mi la, gadia ka boimande a̱ nande sha usu.

⁵³Kpa aluer pristi una nenge angev mbua seer a seer sha ikondo, shin sha zermou, shin sha abamou, shin sha hanma kwagh u i er sha ikôv la ga yô,

⁵⁴pristi a̱ kaa, i̱ kile kwagh u angev mbu lu sha mi la, shi a̱ wuhe un ayange ataankarahar;

⁵⁵tsô pristi a̱ nenge er i kir angev mbula kera yô, aluer una nenge angev mbula mbua gema mluashe u mbu ga, shin mbua samber ga kpaa, ka kwagh u wang ga; nande un sha usu je, mbu yan a ya je, shin a lu kimi, shin ken won kpaa.

⁵⁶Aluer pristi una nenge, man angev mbula mbua hingir fing er i kir mbu kera yô, a̱ ande a̱ dugh mbu, shin a lu sha ikondo, shin sha ikôv, shin sha zermou, shin sha abamou kpaa;

⁵⁷aluer nahan kpaa, shi mbua due ken igbar sha ikondo, shin sha zermou, shin sha abamou, shin sha hanma kwagh u i er sha ikôv yô, mbu duen a due je, nande kwagh shon u angev mbu lu sha mi la sha usu je.

⁵⁸Ikondo, shin zermou, shin abamou, shin hanma kwagh u i er sha ikôv u u kir un la, aluer angev mbua bee sha mi yô, i̱ kimbir u kilen, nahan una hingir wang.

⁵⁹Ka tindi u angev mbu imandev je ne, sha ikondo, shin a lu i ul, shin a lu i mou, shin sha zermou, shin sha abamou, shin hanma kwagh u i er sha ikôv, sha u pasen er ka kwagh u wang, shin u pasen er ka kwagh u wang ga.