Read tiv Levitiku 2 Bible Online

Levitiku 2 - tiv bible

Levitiku 2

¹Aluer a̱ lu anti or ka nan TER nagh ku sha samuyia yô, nagh ku nan ku̱ lu sha mwem ma kengese; nana̱ haa mkurem sha mi, shi nana̱ penda libano u human doon sha mi kpaa;

²nana̱ va a mi hen upristi, ônov mba Aron; pristi a̱ ongo mwem ma kengese kua mkurem mara, ikevwe poo, shi a̱ kura libano u human doon u a lu sha mi la cii, a̱ nande sha usu, i̱ lu nagh ku umbur; ka nagh ku usugh ku human doon ku nan TER.

³Nagh ku sha samuyia ku ku shi la yô, ku̱ hingir kwagh u Aron a ônov nav, ka icighankwagh u hemban cii ken iniav mbi usuv mbi nan TER la.

⁴Zum u wea naan nagh ku sha samuyia ku kaan a kaa sha atse yô, i̱ lu umasa mba i we kwa sha mi ga, mba sha mwem ma kengese ma i nongo mkurem sha mi yô, gayô, i̱ lu umasa mba par par mba i we kwa sha mi ga, mba i shigh a shighe mkurem sha mi yô.

⁵Aluer nagh ough kua lu nagh ku sha samuyia ku kaan sha icenge yô, i̱ lu mwem ma kengese ma i nongo mkurem sha mi, i we kwa sha mi ga yô.

⁶Vur ku avur avur, haa mkurem sha mi, ka nagh ku sha samuyia je la.

⁷Man aluer nagh ough kua lu nagh ku sha samuyia ku kaan shin icenge i tumuu yô, i̱ er ku sha mwem ma kengese i̱ wa mkurem sha mi.

⁸Va a nagh ku sha samuyia ku i er ku sha akaa ne yô, hen TER; i̱ va na pristi, a̱ za a mi hen atse.

⁹Pristi a̱ kura nagh ku umbur ku nagh ku sha samuyia la, a̱ nande ku sha atse; ka nagh ku usugh ku human doon ku nan TER je la.

¹⁰Nagh ku usugh ku ku shi la yô, ku̱ hingir kwagh u Aron a ônov nav; ka icighankwagh u hemban cii ken iniav mbi usuv mbi nan TER la.

¹¹Ma nagh ku sha samuyia ku ne va na TER nagh a mi cii, i̱ de eren ku sha kwagh u i we kwa sha mi ga, kwa man iyough yô, de nanden nen TER nagh ku usugh sha mi ga.

¹²Na nen TER nagh a mi er ka iyiav mbi tsutswav yô, kpa hen atse yô, i̱ de ve a mi er ka kwaghhumandoon ga.

¹³Hanma nagh ough ku sha samuyia yô, ú wa bar sha mi; bar u ikuryan i Aôndo wou a̱ de banen sha nagh ough ku sha samuyia ga; iniav youv cii, i̱ va a mbi a bar imôngo.

¹⁴Aluer wea naan TER nagh ku sha samuyia sha iyiav mbi tsutswav yô, va a asagher a mgbaghen sha usu, asange a alakema u he a i johol a, va na nagh ku sha samuyia ku sha iyiav mbi tsutswav you a mi;

¹⁵haa mkurem sha mi, shi haa libano u human doon sha mi kpaa; ka nagh ku sha samuyia.

¹⁶Pristi a̱ pande asange a alakema a i johol a la kua mkurem, shi a̱ kura libano u human doon la cii, a̱ nande sha usu, i̱ lu nagh ku umbur; ka nagh ku usugh ku nan TER.