Read tiv Levitiku 21 Bible Online

Levitiku 21 - tiv bible

Levitiku 21

¹TER kaa a Mose er: Ôr kwagh a upristi, ônov mba Aron, kaa ve wer, hanmô ve nana̱ de gbe hôngor iyol i nan sha ikom i or u ken nongo u nan tsô ga;

²saa á lu or u ken ya u nan, á lu ngô u nan, shin ter u nan, shin wan u nan u nomso, shin wan u nan u kwase, shin anngô u nan u nomso kpaa;

³shin á lu anngô u nan u kwase u iniunugh u a lu a nan her je, a lu a er nom ga yô; un yô, nana fatyô u hôngor iyol i nan sha mi.

⁴Nana̱ de hôngor iyol i nan ga, sha ci u nan lu orhemen ken ior mba nan yô, doo u nana hôngor iyol i nan ga.

⁵Ve̱ de hondon ma ijiir sha ityou ga, man shi ve̱ de hondon indyer ve ken akpe ga, shi ve̱ de esen avav iyol kpaa ga.

⁶Ve̱ lu uicighanmbaiorov mba Aôndo je, ve̱ de hôngor a iti i Aôndo ve ga; gadia mba ne iniav mbi usuv mbi TER, ka kwaghyan u Aôndo ve je la; nahan yô, ve̱ lu uicighanmbaiorov.

⁷Ve̱ de eren kwase u a lu idyakwase ga, shin iniunkwase i i vande vihin i kpaa ga, shi ve̱ de eren kwase u a dugh hen nom u nan kpaa ga; gadia un ngu icighanor u Aôndo je.

⁸Nahan tsegha un, gadia ne nagh, ka kwaghyan u Aôndo wou je la; a̱ lu u icighanor je; gadia Mo TER u M tsegh ne ne, M ngu icighan je.

⁹Aluer wan u pristi u kwase nana hôngor iyol i nan, nana er idya yô, nan hôngor ter u nan je ve; i̱ nande nan sha usu.

¹⁰Pristi u a lu u vesen ken anmgbianev nav, u i hee un mkurem ma shighen sha ityou i tsegh un er a̱ haan akondo la yô, a̱ de lu ityough meghaa ga, shi a̱ de anden akondo na kpaa ga,

¹¹shi a̱ de ze hen ma ikom i or ga, á lu ter na shin ngô na kpaa, a̱ de hôngor iyol na sha ci ve ga;

¹²man a̱ de dugh ken icighanjiir ga, a̱ de hôngor a icighanjiir u Aôndo na kpaa ga, gadia mtsegh u mkurem ma shighen u Aôndo ngu sha a na; ka Mo TER.

¹³A̱ er kwase er nan lu iniun la je.

¹⁴Kwasecôghol shin kwase u a dugh hen nom, shin iniunkwase i i vihi i shin idyakwase, mbala yô, a̱ de eren ga; kpa i̱ lu iniunkwase i ken nongo na, a̱ er i ye.

¹⁵A̱ de hôngor a tsombor na ken nongo na ga; gadia ka Mo TER M tsegh un ye.

¹⁶TER shi ôr kwagh a Mose kaa a na er:

¹⁷Ôr kwagh a Aron kaa un wer: Á lu anti or ken tsombor wou, shin á lu ikov i ken hemen kpaa, nana lu a iwan iyol yô, nana̱ de kporom sha u nan nagh ku kwaghyan u Aôndo u nan ga.

¹⁸Gadia hanma or u nan lu a iwan iyol yô, nana̱ de kporom ga; orapirashe, shin orkeer, shin or u gban iwan sha ishi, shin u nan lihi ilyeegh ki gande ikaa inya,

¹⁹shin or u sombon nguhar, shin or u sombon uwegh,

²⁰shin or u van igundu, shin or u kanden kôhôlôô, shin or u lun a ishange ken ishe, shin or u kpesan iyol, shin or u i vihi nan ake;

²¹ma or u ken tsombor u pristi u Aron, u nan lu a iwan iyol, nana̱ de kporom er nana na iniav mbi usuv mbi TER ga, nan ngu a iwan yum; nana̱ de kporom er nana na nagh ku Aôndo u nan ga.

²²Nana ya kwaghyan u Aôndo u nan, u a lu icighankwagh u hemban cii, kua u a lu icighankwagh tsô, la,

²³kpa nana̱ de nyer ken ijiir i ikondo i yisan la ga, shi nana̱ de kporom hen atse a nanden nagh sha mi kpaa ga, sha ci u nan lu a iwan yô, sha er nana̱ de hôngor a uicighanmbaajiiriv Av ga yô, gadia ka Mo TER u M tsegh ve ne,

²⁴Kape Mose kaa Aron man ônov nav kua Mbaiserael cii la.