Read tiv Levitiku 22 Bible Online

Levitiku 22 - tiv bible

Levitiku 22

¹TER shi ôr kwagh a Mose, A kaa er:

²Ôr kwagh a Aron man ônov nav, ve̱ ver ishima sha uicighanmbaakaav mba Mbaiserael ve tsegh sha ci Wam la, sha er ve̱ de hôngor a icighanti Wam ga yô; ka Mo TER.

³Kaa a ve wer: Hanmô u ken ikov yen cii, u ken tsombor wen cii, u nana kporom hen uicighanmbaakaav mba Mbaiserael ve tsegh sha ci u TER, zum u nan lu wang ga la yô, i̱ dugh or la sha ishigh Yagh kera; ka Mo TER.

⁴Hanma or u ken tsombor u Aron u nan lu orimande, shin u nan dugh ihyelegh iyol, nana̱ de ye uicighanmbaakaav ga, saa nana vande hingir wang ve. Man shi hanmô u nan bende a ma kwagh u a hôngor sha ikomor, shin or u ityujer i dugh nan kpaa,

⁵shin hanmô u nan bende a ma kwagh u a kper a kpela inya, u nana zua a hôngor sha mi yô, shin u nan bende a or nan tee hôngor hen a nan, hanma inja i hôngorough i nan lu a mi yô,

⁶or u nana bende a hanma injakwagh i nahan, nana kera lu wang ga, zan zan iyange ia kar been; mye kpaa nana̱ de ye uicighanmbaakaav ga, saa nana vande ôôn iyol i nan sha mnger kera ve.

⁷Zum u iyange ia bee yô, nana hingir wang; ken masetyô yô, nana ya uicighanmbaakaav, gadia ka kwaghyan u nan je.

⁸Kwagh u a gbe kpen tsô yô, shin u inyamikume i woo yô, nana̱ de ye, nana̱ hôngor iyol i nan sha mi ga, ka Mo TER.

⁹Yô, ve̱ waan kwagh u M we ve ne iko, sha er ve̱ de kper ibo, ve̱ hee iyol, ve̱ kpeen zum u ve hôngor a mi la ga; ka Mo TER u M tsegh ve ne.

¹⁰Ma or u ken inya, nana̱ de ye icighankwagh ga; ma shiror u hen ya u pristi shin or u va eren tom sha tôndo kpaa, nana̱ de ye icighankwagh ga.

¹¹Kpa aluer pristi una yam ma or sha inyaregh nagh yô, nana̱ ya, kua mba i mar hen ya na cii kpaa, ve̱ ya kwaghyan na.

¹²Aluer wan u pristi u kwase nana er or u ken inya yô, nana̱ de ye nagh ku kenden sha, ku uicighanmbaakaav la ga.

¹³Kpa aluer wan u pristi u kwase nana hingir kwasecôghol shin nana due ken nom man nana lu a wan ga, man nana hide hen ya u ter u nan, er yan nan lu iyev la nahan yô, nana yaan kwaghyan u ter u nan la, kpa ma or u ken inya yô, nana̱ de ye ga.

¹⁴Man aluer or nana ya icighankwagh abu yô, nana̱ seer u môm-ken-utaan sha mi, nana̱ hide a icighankwagh, nana̱ na pristi.

¹⁵Ve̱ de hôngor a uicighanmbaakaav mba Mbaiserael ve ne TER la ga;

¹⁶ve̱ de kper ibo, ve̱ hee iyol, sha er ve̱ kuma u yan mtsaha, zum u ve ye uicighanmbaakaav vev la ga, gadia ka Mo TER u M tsegh ve ne.

¹⁷TER ôr kwagh a Mose kaa er:

¹⁸Ôr kwagh a Aron man ônov nav kua Mbaiserael cii, kaa a ve wer: Hanma or u ken ya u Iserael shin u ken ushirmbaiorov mba ken Iserael, u nan ve a nagh ku nan, shin a lu uiceghzwa vev, shin a lu iniav vev mbi sha ishima i dedoo mbi ve ne TER, sha ci u nagh ku nanden yô,

¹⁹sha er á rumun ne yô i̱ lu nomile u a lu a ihogholough iyol ga yô, bua shin iyôngo shin ivo.

²⁰Kpa hanma kwagh u a lu a ihogholough iyol yô, de ve nen a mi ga, gadia una na, á kera rumun ne ga.

²¹Man shi hanmô u nana va na TER nagh ku sôngon ku bem, sha i kuren iceghzwa, shin sha ci u nagh ku sha ishima i dedoo, shin á lu bua, shin á lu iyôngo kpaa yô, ku̱ lu tsembelee, sha er á rumun ku yô, ma ihogholough ki̱ de luun sha mi ga.

²²Kwagh u pirin ashe, shin u sombon shin u keer, shin u lun a avav, shin u kpesan iyol, shin u kuran iyol yô, de ne nen TER ga, de ne nen TER nagh ku usugh mi sha atse a nanden nagh sha mi la ga.

²³Gumbua shin gumiyôngo u a lu a ilyeegh ki ki lihi ki gande inya, shin ki ki yen yô, u fatyô u va nan nagh ku sha ishima i dedoo mi, kpa a lu nagh ku sha iceghzwa yô, á rumun un ga.

²⁴Kwagh u i vihi un ake shin i cagh a, shin i ande a, shin i tende a yô, de ne nen TER nagh a mi ga; man de eren nen ken tar wen nahan ga.

²⁵Man de ngohol nen anza la sha ikev i or u tar gen sha u va nan nagh ku kwaghyan u Aôndo a mi ga; gadia mlu u a u wang ga la ngu ken a; ihogholough ki sha a, á rumun a sha ci wen ga.

²⁶TER shi ôr kwagh a Mose, kaa er:

²⁷Zum u bua shin iyôngo shin ivo á mar wan yô, wan la a̱ lu a ngô na ayange ataankarahar; hii sha iyange i anigheni la, zan zan ken hemen yô, á rumun un sha nagh ku usugh ku nan TER.

²⁸Shin a lu ngôbua shin ngôiyôngo kpaa, de senge nen un a wan na imôngo sha iyange i môm ga.

²⁹Man zum u nea sôngo TER nagh ku iwuese yô, na nen ku er á rumun ne yô.

³⁰Ka sha iyange la je, á ya ku ye, de deen nen ma kwagh u ku, a̱ tsa her zan zan sev mbu aven ga; ka Mo TER.

³¹Waan nen atindi a Am iko, eren nen sha mi; ka Mo TER.

³²De hôngor nen a icighanti Wam ga; i̱ tseghan Mo ken Mbaiserael; ka Mo TER u M tsegh ne,

³³M due a ven ken tar u Igipiti, sha u Me lu Aôndo wen ne ye; ka Mo TER.