Read tiv Levitiku 23 Bible Online

Levitiku 23 - tiv bible

Levitiku 23

¹TER shi ôr kwagh a Mose, kaa er:

²Ôr kwagh a Mbaiserael, kaa a ve wer: Uiniongo mba TER mba né yôô, sha u ve̱ lu uicighanmbamkohol yô, ka ve ne, ka uiniongo Av je:

³I̱ eren tom ayange ataratar, kpa iyange i ataankarahar la, ka iyange i memen i kôron ma tom ave ga, ka icighanmkohol; de eren nen ma tom ga; ka iyange i memen i TER ken ajiir a en a ne tem cii.

⁴Mban ka uiniongo mba TER, ka uicighanmbamkohol mba né yôôn sha ashighe a i ver yô:

⁵Uwer u hiihii ayange a u pue kar anyiin, aikighe, ka Paseka u TER.

⁶Uwer la ayange a u pue kar ataan la, ka iniongo i TER, i bredi u i we kwa sha mi ga yô.

⁷Sha iyange i hiihii la er icighanmkohol; de eren nen ma tom u ican ga.

⁸Naan nen TER nagh ku usugh, ayange ataankarahar la cii; sha iyange i ataankarahar la, á er icighanmkohol, de eren nen ma tom u ican ga.

⁹TER shi or kwagh a Mose, kaa er:

¹⁰Ôr kwagh a Mbaiserael, kaa a ve wer: Zum u né va nyôr ken tar u M lu nan ne ne, nea sundan iyiav mbi ken u yô, né va a ile u iyiagh ki tsutswagh ki ne sondo la, hen pristi,

¹¹a̱ cia ile la sha ishigh ki TER, sha er á rumun ne yô; kpernan iyange i dondon sha iyange i memen la, pristi a̱ cia u.

¹²Iyange i ne cie ile la, va nen a gumiyôngo u lun a ihogholough iyol ga, u a kom inyom i môm yô, sha u nan TER nagh ku nanden a mi,

¹³kua nagh ku sha samuyia ku ku, mwem ma kengese ma ma kom uikaren uhar-ken-upue, ma i nongo mkurem sha mi yô, ka nagh ku usugh ku nan TER ku human doon je la; man shi nagh ku man ku ku, sha wain u a kom ikaren u môm-ken-unyiin u hin.

¹⁴De ye nen bredi ga, shin iyiagh ki kaan a kaa kpaa ga, shin asagher a he kpaa ga, zan zan iyange la i̱ kar kuman, saa ne vande van a nagh ku Aôndo wen ve; ka tindi u gbem sha ikov ikov, ken a jiir a en a ne tem cii.

¹⁵Ôr nen iyenge, i̱ hii sha iyange i dondon sha iyange i memen, ka iyange i né va a ile u nagh ku cian la je la, ulahadi utaankaruhar ve̱ iv vough;

¹⁶ka ayange akunduahargber je, né er a la, zan zan ar sha iyange i dondon sha iyange i memen i sha utaankaruhar la, man né na TER nagh ku sha samuyia sha iyiav mbi hev ye.

¹⁷Tôô nen ubredi mba cian a mi uhar, ken ajiir a ne tem cii, va nen a mi, mba i er ve sha mwem ma kengese ma ma kom uikaren uhar-ken-upue, i̱ kaa ve i̱ wa kwa sha mi, ve̱ lu iyiav mbi tsutswav mbi nan TER.

¹⁸Va nen a agumaiyôngo ataankarahar a a lu a ihogholough iyol ga, a a kom inyom i môm i môm yô, man gumbua môm kua anomaiyôngo ahar, a ubredi mbala imôngo, i̱ na TER nagh ku nanden mi, a nagh vegh ku sha samuyia, kua iniav mbi man imôngo cii ka nagh ku usugh ku human doon ku nan TER je la.

¹⁹Na nen nagh ku isholibo sha kpev, shi ne nen nagh ku bem sha agumaiyôngo ahar, a a kom inyom i môm i môm yô.

²⁰Pristi a̱ cia a mi, a ubredi mba iyiav mbi tsutswav la imôngo, i̱ lu nagh ku cian sha ishigh ki TER, a agumaiyôngo ahar la imôngo, i̱ lu icighankwagh u TER sha ci u pristi.

²¹Sha iyange la je, i̱ yôô i̱ lu ne icighanmkohol, de eren nen ma tom u ican ga; ngun ka tindi u gbem sha ajiir a ne tem cii sha ikov ikov.

²²Zum u nea sunda iyiav mbi ken ishule yen yô, de sondo ken ikpisule you been ga, shi de yaren twar ken akumbe a ou kpaa ga, undu her sha ci u icanor kua shiror; ka Mo TER M lu Aôndo wen ye.

²³TER shi ôr kwagh a Mose, kaa er:

²⁴Ôr kwagh a Mbaiserael, kaa a ve wer, uwer u sha utaankaruhar, sha iyange i hiihii i u la, mem nen iyol, ka kwagh u umbur sha ikor i tôngon, ka icighanmkohol.

²⁵De eren nen ma tom u ican ga; na nen TER nagh ku usugh.

²⁶TER shi ôr kwagh a Mose, kaa er:

²⁷Uwer u sha utaankaruhar sha ayange a u pue la, ka iyange i nan iwom, i̱ lu ne icighanmkohol, ule nen, na nen TER nagh ku usugh.

²⁸De eren nen ma tom sha iyange la ga, gadia ka iyange i nan iwom, á na iwom sha ci wen sha ishigh ki TER, Aôndo wen.

²⁹Gadia hanma or u nana ule sha iyange la ga yô, á dugh nan ken nongo u nan kera.

³⁰Man hanma or u nana er ma tom sha iyange la yô, Me tim or la ken nongo u nan kera.

³¹De eren nen ma tom ga; ka tindi u gbem sha ikov yen, sha ajiir a en a ne tem cii.

³²I̱ lu ne iyange i memen i̱ kôron ma tom ave ga, ule nen; uwer la, sha ayange a u ataankaranyiin la, iyange i been, hii sha iyange i been zan zan za kure kpernan iyange i been, mem nen sha iyange i memen yen.

³³TER shi ôr kwagh a Mose, kaa er:

³⁴Ôr kwagh a Mbaiserael, kaa a ve wer: Uwer u sha utaankaruhar, ayange a u pue kar ataan la, i̱ er iniongo i atumbe i TER, ayange ataankarahar.

³⁵Sha iyange i hiihii la, i̱ er icighanmkohol, de eren nen ma tom u ican ga.

³⁶Ayange a ataankarahar la cii, naan nen TER nagh ku usugh, sha iyange i anigheni la, né er icighanmkohol; na nen TER nagh ku usugh; ka iyange i iniongo, de eren nen ma tom u ican ga.

³⁷Ka uiniongo mba TER, mba i ver, mba né yôô ner ka uicighanmbamkohol sha u nan TER nagh ku usugh, nagh ku nanden, man nagh ku sha samuyia, man nagh ku sôngon, kua iniav mbi man, hanmôgh sha iyange i ku;

³⁸kua shi ayange a memen a TER cii, man iwua yen, man uiceghzwa enev cii, kua iniav yenev cii mbi sha ishima i dedoo mbi né naan TER yô.

³⁹Kpa sha uwer u sha utaankaruhar, ayange a u pue kar ahar la, shighe u ne vande sundan iyiav mbi ken ishule la yô, er nen iniongo i TER, ayange ataankarahar; sha iyange i hiihii la, i̱ mem iyol, man sha iyange i anigheni kpaa, shi i̱ mem iyol.

⁴⁰Sha iyange i hiihii la yô, tôô nen atam a ikon i doon ashe man andaravilegh kpaa, man agbaa a ikon i ngeen a ika man ikon i nelem agbaa i ken mnger; ember nen sha ishigh ki TER, Aôndo wen, ayange ataankarahar la cii.

⁴¹Eren nen i, i̱ lu iniongo i TER hanma inyom; i̱ eren i ayange ataankarahar; ka tindi u gbem u sha ikov yen; er nen i ken uwer u sha utaankaruhar la.

⁴²Tema nen ken atumbe ayange ataankarahar; mba i mar ve ken Mbaiserael cii, ve̱ tema ken atumbe,

⁴³sha er ikov yen i̱ fa, Mo M na Mbaiserael ve tema ken atumbe, zum u M due a ven ken tar u Igipiti la; ka Mo TER M lu Aôndo wen ye.

⁴⁴Tsô Mose pase Mbaiserael uiniongo mba TER mba i ver la.