Read tiv Levitiku 26 Bible Online

Levitiku 26 - tiv bible

Levitiku 26

¹De eren nen mbaaôndo mba gbiliniv ga, shi de gbe nen eev timin nen mbu sha ga, shin ityôgh ki iwenegh kpaa ga, shi de timin nen ma iwen i i lu a eev sha mi ken tar wen ner, né guren né civir i ga; gadia ka Mo TER M lu Aôndo wen ye.,

²Waan nen ayange a memen a Am iko; civir nen icighanjiir Wam; ka Mo TER.

³Aluer nea zenden ken akaawan Am, man nea waan atindi a Am iko, né eren sha mi kpaa yô,

⁴Mo Me nôô ne ura sha ashighe a u, inya ia doon iyiav, ikon i ken toho kpaa ia umen atam a i.

⁵Shighe u sundan iyiav la, né sundan zan zan shighe u sundan atam a wain a kuma, atam a wain kpaa, né sundan zan zan shighe u lôôn iyiav a kuma; né yaan kwaghyan á kuman ne, né tema ken tar wen.

⁶Me na bem ken tar la, né yav je, ma or u tan ne mciem iyol nana lu ga; Me er inyamikume ia bee ken tar wen, sanker kpaa una kar hen atô u tar wen ga.

⁷Me zenda mbaihomov enev, vea kpe ku u sanker sha ishigh yenegh.

⁸Ior enev utaan vea zenda ior deri, ior enev deri vea zenda ior dubu pue; mbaihomov enev kpaa, vea kpe ku u sanker sha ishigh yenegh.

⁹Me waan ne iko, Me ngee ne ônov, Me seer a seer ne iyenge, Me taver ikuryan Yam a ven.

¹⁰Né ya kwagh u ombon u tse je, né va dugh u tse la kera sha ci u u he.

¹¹Me ver tabernakel Wam hen atô wen, ishima kpaa, ia ndôhôr Mo a ven ga.

¹²Me zende hen atô wen, Me lu Aôndo wen, ne né lu ior Av.

¹³Ka Mo TER M lu Aôndo wen, u M dugh a ven ken tar u Igipiti, sha er né kera lu ikpan ve ga yô, shi M sombo amande a igbur i sha mon wen, M er ne ne zende sha nôô nôô.

¹⁴Kpa aluer nea kera ver ato hen Mo nea eren sha atindi Am ne cii ga yô,

¹⁵Man aluer nea venda akaawan Am, man akaaôron Am a jirigh aa ndôhôr ne ishima, nea kera eren sha atindi Am ga, shi nea vihi ikuryan Yam kpaa yô;

¹⁶Mo Me er a ven, Me ta ne mciem iyol, houghbar una kôr u kua angev mbu tseeyol; mbua hungwa u ashe ikôr, mbua na asema a en aa ure; né lôôn ivor yen, kpa á lu gbilin tsô, gadia ka mbaihomov enev vea va ya i ye.

¹⁷Me kera saan ishigh a ven ga, mbaihomov enev vea hemba ne; mbakôron ne ihom vea tema tor sha a ven; né gbaa yevese tsô, or kpaa nana zendan ne ga.

¹⁸Aluer nahan kpaa shi ne ver ato hen a Mo ga yô, Me seer tsahan ne kwa taankaruhar sha ci u asorabo a en.

¹⁹Me sombo agee a en a ne te ihagh a mi la, kera, Me gema kwavaôndo wen ua hingir er iyôgh ki iligh nahan, tar wen ua hingir er togula nahan;

²⁰né vihin agee a en gbilin; gadia inya yen ia doon iyiagh ga, ikon i hen tar la kpaa, ia umen atam a i ga.

²¹Aluer nea hendan a Mo, né kera rumun u veren ato hen Mo je ga yô, Me seer tsahan ne kwa taankaruhar sha asorabo a en.

²²Me tindi inyamikume her a ven ia va kôr ne ônov, ia tim ilev yenev, ia pande ne, né kera ngee ga, igbenda yen kpaa ia kpe.

²³Man aluer sha akaa ne nahan kpaa nea rumun mkôôm Wam ga, né hendan a Mo her yô,

²⁴Mo Me hendan a ven, Mo Me tsaha ne kwa taankaruhar sha ci u asorabo a en.

²⁵Me va a sanker sha a ven, una va or iyev i ikuryan, zum u ne za haa ken agar a en la, Me tindi bouange hen ven, né gema né hingir sha ikev i mbaihomov.

²⁶Zum u Me vihi kwaghyan wen u ne suur sha mi la kera yô, kasev pue vea kaa bredi wen ken atse môm, vea kar bredi wen myohom man vea hide á na ne yô; né ya, kpa á kuma ne ga.

²⁷Man aluer nahan kpaa, nea ver ato her a Mo ga, nea hendan a Mo her yô,

²⁸Mo Me henda a ven sha ishima i nyoon je, Mo Me tsaha ne kwa taankaruhar sha ci u asorabo a en.

²⁹Né ya inyam i ônov enev mba nomso; inyam i ônov enev mba kasev kpaa, né ya.

³⁰Shi Me vihi ajiir a en a taven sha la, Me vihi atse a en a nanden kwaghhumandoon sha mi la kera, Me haa akom a en sha akom a mbaaôndo enev mba gbiliniv; ishima ia ndôhôr Mo a ven.

³¹Me gema agar a en á hingir atse, Me vihi uicighanmbaajiiriv enev kera; Me ungwa ihuma i kwaghhumandoon wen la ga.

³²Me tim tar la, je mbaihomov enev mba ve tem ken u, á kpiligh ve iyol sha kwagh la.

³³Me sambe ne ken akuraior, Me tsuwa sanker Me tôv ne ijime, tar wen ua hingir ikôngough gbilin, agar a en kpaa aa hingir atse.

³⁴Nahan á kpe tar iyol sha ayange a memen a u, sha ayange a u lu ikôngough gbilin la; man né gema né lu ken tar u mbaihomov enev la; nahan tar ua mem, á kpe u iyol sha ayange a memen a u.

³⁵Ayange a u lu ikôngough gbilin la cii, ua zua a mmem, ka mmem u yan u zuan a mi ga la, sha ayange a memen a en zum u ne tema ker la.

³⁶Ior enev mba ve shi her yô, Me er asema a ve aa lu per per ken ityar i mbaihomov vev, shin iov i kwa u ahumbe a purugh a mi tsô kpaa, ia num ve; vea yevese er ka i yevese sanker nahan, vea gba, kpa or a lu zendan ve ijime kpaa ga.

³⁷Vea tan sha ayol a ve, vea nôngon gbev er ka sha ishigh ki sanker nahan, or kpaa nana lu zendan ve ityô ga; né lu a agee a né hendan a mbaihomov enev ga.

³⁸Né tim ken akuraior, tar u mbaihomov enev ua ya ne.

³⁹Ior enev mba ve shi her yô, vea hingir seelee sha ci u afer a ve, ken tar u mbaihomov enev, kua sha ci u afer a uter vev kpaa, vea hingir seelee er ve nahan.

⁴⁰Zum la vea pase afer a ve man afer a uter vev sha mimi ga ve, u ve er a Mo sha mimin ga la, man shi er ve lu hendan a Mo kpaa yô,

⁴¹nahan Mo kpaa M hendan a ve, M va a ve ken tar u mbaihomov vev; aluer shighe la ishima ve i ve tsenge ga la, ia hide ijime, vea rumun mtsaha u sha ifer ve yô,

⁴²zum la Me umbur ikuryan Yam a Yakob; ikuryan Yam a Isaka man ikuryan Yam a Aberaham kpaa, Me umbur i; tar la kpaa Me umbur u.

⁴³Tar la yô, vea undu u, á kpe u iyol a ayange a memen a u, shighe u ua hingir ikôngough gbilin, zum u vea lu ga la; ve kpaa vea ngohol mtsaha u sha ifer ve, sha ci u ve vende akaaôron Am a jirigh, man akaawan a Am a ndôhôr ve ishima kpaa yô.

⁴⁴Nahan kpaa er vea lu ken tar u mbaihomov vev la kpaa, Me ta ve kera ga, vea ndôhôr Mo ishima je er Me tim ve kera ca ca Me bunde ikuryan Yam a ve ga; gadia ka Mo TER M lu Aôndo ve ye.

⁴⁵Ka sha ci ve man Me umbur ikuryan i uter, mba M dugh a ve ken Igipiti sha ishigh ki akuraior sha u Me lu Aôndo ve ye, ka Mo TER.

⁴⁶Ka akaawan man akaaôron a jirigh man atindi a TER wa hen atô Na a Mbaiserael sha uwo u Senai sha ikev i Mose je ne.