Read tiv Levitiku 27 Bible Online

Levitiku 27 - tiv bible

Levitiku 27

¹TER ôr kwagh a Mose, kaa er:

²Ôr kwagh a Mbaiserael, kaa a ve wer: Aluer or á tsegha zwa a TER sha or, nana̱ wa inyaregh ki paan yô,

³inyaregh ki u we la, kia lu sha nomsoor u nan kom anyom ikundu zan zan u nan kom anyom akunduatar kpaa, inyaregh ki u we la, ki̱ lu shekel mba azurfa akunduahargber, i̱ lu shekel u icighanjiir la.

⁴Nana lu kwase yô, inyaregh ki u we la, ki̱ lu ushekel ikundugber.

⁵Man aluer á lu u nan kom anyom ataan zan zan u nan kom anyom ikundu yô, inyaregh ki u we la, á lu nomsoor yô, ki̱ lu ushekel ikundu, man á lu kwase yô, ki̱ lu ushekel pue.

⁶Man aluer á lu u nan kom uwer môm zan zan u nan kom anyom ataan yô, inyaregh ki u we la, á lu nomsoor yô, ki̱ lu ushekel mba azurfa utaan, man á lu kwase yô, ki̱ lu ushekel mba azurfa utar.

⁷Man aluer á lu u nan kom anyom akunduatar shin u nan hembe nahan kpaa, á lu nomsoor yô, inyaregh ki̱ u we la, ki̱ lu ushekel pue kar utaan, man á lu kwase yô, ki̱ lu ushekel pue vough.

⁸Man aluer nana gba ican, inyaregh ki u we la kia hemba nan yô, i̱ va a nan sha ishigh ki pristi, pristi a̱ wa nan inyaregh, pristi a̱ wa nan inyaregh er or u nan tsegh zwa la, nana fatyô yô.

⁹Á lu ilegh yô, inja i ka i va na TER nagh a mi la yô, hanma kwagh u or nana na TER la cii yô, a hingir icighankwagh je.

¹⁰Nana̱ de veren kwagh ugen sha ityough ki kila ga, shi nana̱ de musan ki, va nan ki dedoo sha ityough ki ki doo ga kila, shin nan ki doon ga, sha ityough ki ki dedoo kila kpaa ga; aluer nahan kpaa nana̱ tôô ilegh kila nana̱ musan kigen a mi yô, kila kua ki i musan ki ami la, mbi cii mbia hingir icighankwagh.

¹¹Man aluer ka ma ilegh ki ki lu wang ga, inja i i ne TER nagh a mi ga la yô, nana̱ va ver ilegh kila sha ishigh ki pristi.

¹²Nahan pristi a̱ wa ki inyaregh sha mlu u ki, kia lu ki dedoo shin kia lu ki doon ga kpaa, er we pristi u we ki inyaregh la, ka pe a lu je la.

¹³Man á lu pe nana paa ki keng yô, nana̱ seer u môm-ken-utaan sha inyaregh ki u we ki la.

¹⁴Aluer or nana tsegha iyou i nan sha u i̱ hingir icighankwagh u TER yô, pristi a̱ wa inyaregh sha mlu u i, shin ia lu i dedoo shin ia lu i̱ dedoo ga kpaa, er pristi a we i inyaregh la ka pe á lu je la.

¹⁵Man aluer u nan tsegh i la, á sar nan pe paan iyou i nan yô, nana̱ seer u môm-ken-utaan sha inyaregh ki u we i la, nahan ia hingir i nan.

¹⁶Aluer or nana tsegha vegher u sule u nan, sha ci u TER yô, inyaregh ki u we un la, ki̱ lu sha mngee u ivor i á lôô her yô, sam u shair, homer môm yô, i̱ wa inyaregh ki̱ kuma ushekel mba azurfa akunduahargber.

¹⁷Aluer nana tsegha sule u nan sha inyom i jubilii yô, er u we u inyaregh la, kape á lu je la.

¹⁸Man aluer nana tsegha sule u nan ken ijime i inyom i jubilii yô, pristi a̱ wa nan inyaregh sha anyom a a shi u aren ken inyom i jubilii la, nahan inyaregh ki u we la, á pande ki.

¹⁹Man aluer or u nan tsegh sule la, á sar nan u paan u kpee yô, nana̱ seer u môm-ken-utaan sha inyaregh ki u we u la, nahan ua hingir u nan.

²⁰Man aluer á sar nan u paan sule la ga, shin aluer nana vande teen orgen sule la yô, á kera paa u mayange ga.

²¹Zum u sule la ua va due ken inyom i jubilii yô, ua hingir icighankwagh u TER, er ka sule u i tswer u nahan, ua hingir kwagh u pristi.

²²Man aluer nana tsegha TER ma sule ugen u nan yam, man u lu sule u nan iyol i nan jim ga yô,

²³pristi a̱ wa nan inyaregh ki kia kuma sha ishe i u we la zan zan i̱ ar sha inyom i jubilii, nana̱ na ishe i u we la sha iyange la je, ka icighankwagh u TER.

²⁴Sha inyom i jubilii la, sule ua hide sha ikev i, u yan i yam u vea nan la, ka or u i lu sule u nan je la.

²⁵Ishe i u we la cii, i̱ lu shekel u ken icighanjiir, shekel môm ka ugera ikundu.

²⁶Kpa waniunda u uzendenya u sha mmar na je i mar un er a̱ lu waniunda u TER yô, ma or nana̱ de tsegh un ga; shin a lu bua, shin a lu iyôngo kpaa, ka kwagh u TER je.

²⁷Aluer á lu zendenya u wang ga yô, nana̱ paa un sha inyaregh ki u we nan yô, man nana̱ seer u môm-ken-utaan u ishe i i we la, sha mi; aluer á paa un ga yô, i̱ tee un sha inyaregh ki u we yô.

²⁸Ma icighankwagh u or nana tsegha TER ken akaa a nan lu a mi cii, shin a lu or, shin a lu zendenya, shin a lu sule u u lu kwagh u nan jim kpaa, i̱ de tee ga, mpaa kpaa, i̱ de paan ga; hanma icighankwagh ka icighankwagh u TER, u hemban cii.

²⁹Ma or u i we nan ifan i dugh nan ken ior kera yô, i̱ de paan nan ga, i̱ wua nan kpee je.

³⁰Môm-ken-upue u inyaregh cii, shin a lu iyiagh ki inyaagh, shin atam a ikon, ka u TER je; ka icighankwagh u TER.

³¹Man aluer á sar or pe paan ma kwagh ken u môm-ken-upue la yô, nana̱ seer u môm-ken-utaan sha mi.

³²Môm-ken-upue u ikum i uile i abua man i iyôngo kpaa, hanma kwagh u i hur sha gbo yô, môm-ken-upue na, una hingir icighankwagh u TER.

³³Nana̱ de tim sha mi er nana fa shin a lu u dedoo, shin a lu u dedoo ga kpaa ga, nana̱ de musan un kpaa ga; kpa aluer nana musan un yô, un kua kwagh u i musan un a mi la, ve cii vea hingir uicighanmbaakaav; i̱ de paan un ga.

³⁴Ka atindiakaa a TER lu na Mose sha ci u Mbaiserael hen uwo u Senai je ne.