Read tiv Levitiku 5 Bible Online

Levitiku 5 - tiv bible

Levitiku 5

¹Aluer hanma or nana er isholibo sha er nan ongo imo i sha mbum, er nan lu orshiada nan nenge shi nan fe kwagh la, kpa nana rumun u pasen ga yô, nan hingir u lun a ibo iyol ve.

²Shin aluer hanma or nana bende a ma kwagh u a lu wang ga, shin a lu gundu u ma swase u u lu wang ga, shin gundu u ma ilegh ki ki lu wang ga, shin gundu u ma kwagh u a kper a kpera inya, u a lu wang ga, man nana fa ga yô, nan kera ngu wang ga, nan hingir u lun a ibo iyol ve.

³Shin aluer nana bende a kwagh u a lu wang ga, u or, a lu hanma kwagh u wang ga u or á fatyô u hingir wang ga a mi la, man nana fa ga yô, man nana va kav nahan yô, nan hingir u lun a ibo iyol ve.

⁴Shin aluer anti or nana gba bumun gagh sha zwa u nan sha u eren kwagh u bo shin u dedoo; nyityô kwagh i or nana kaa fefa sha mbum, man nan fa ga yô; kpa nana va kav nahan yô, nan hingir u lun a ibo iyol sha ma kwagh u ken akaa la ve.

⁵Nahan zum u ibo ia kôr nan sha ma kwagh yô, nana̱ pase isholibo i nan,

⁶nana̱ va na TER nagh sha ci u isholibo i nan er yô, mgbianile, tuleiyôngo shin tuleivo, i̱ lu nagh ku isholibo; pristi a̱ na iwom sha ci u nan sha ci u isholibo i nan er la.

⁷Kpa aluer inyaregh ki nan kia kuma iyôngo shin ivo ga yô, nana̱ va na TER nagh sha ci u isholibo i nan er la sha mbaatii uhar shin utulembamkunguv uhar, u môm sha ci u nagh ku isholibo, ugen sha ci u nagh ku nanden.

⁸Nana̱ va na pristi; a̱ gema u a lu sha ci u nagh ku isholibo la, a̱ vande nan nagh a mi, a̱ tôndo un gôngor ikua ikua a ityough, kpa ki de gbe inya ga;

⁹a̱ pande awambe a nagh ku isholibo la, a̱ mishi sha imbusuatsegh, awambe a a shi ker la, a̱ kam a hen ityôatsegh; ka nagh ku isholibo.

¹⁰A̱ gema u sha uhar la, a̱ na nagh ku nanden a mi, sha tindi; pristi a̱ na iwom sha ci u isholibo i nan er la, nahan á de nan isholibo i nan.

¹¹Kpa aluer inyaregh ki nan kia kuma mbaatii uhar, shin utulembamkunguv uhar ga yô, nana̱ va na nagh sha ci u isholibo i nan er la, sha mwem ma kengese ma ma kom môm-ken-upue u efa, sha ci u nagh ku isholibo; nana̱ de we mkurem sha mi ga, man nana̱ de we ma libano u human doon sha mi kpaa ga, gadia ka nagh ku isholibo.

¹²Nana̱ va a mi hen pristi, pristi a̱ ongo ikevwe poo, i̱ lu nagh ku umbur, a̱ nande sha atse sha iniav mbi usuv mbi TER; ka nagh ku isholibo je.

¹³Pristi a̱ na iwom sha ci u nan, sha ci u isholibo i nan er sha ma kwagh u ken akaa ne yô, nahan á de nan isholibo i nan; kwagh u a shi la, a̱ hingir u pristi, er i eren a nagh ku sha samuyia nahan.

¹⁴TER ôr kwagh a Mose, kaa er:

¹⁵Aluer hanma or nana er kwagh sha mimin ga, nana er isholibo abu, nana nzughul sha akaa a i tsegh a sha ci u TER yô, nana̱ va na TER nagh sha nomiyôngo shin kpev u a lu a ihogholough iyol ga yô, u a kom sha ishe i u we, sha ushekel mba azurfa yô, i̱ lu shekel u icighanjiir la, sha ci u nagh ku iboogh;

¹⁶nana̱ hide a kwagh u nan nzughul sha akaa a i tsegh a la, shi nana̱ seer môm-ken-utaan sha mi, nana̱ na pristi; pristi a̱ na iwom sha ci u nan, sha nomiyôngo u nagh ku iboogh la, nahan á de nan isholibo i nan.

¹⁷Aluer anti or nana er isholibo, nana er ma kwagh u TER A yange er i̱ de eren ga la, abu yô, man nana ya ibo, nana hingir u lun a ibo iyol yô,

¹⁸nana̱ va na pristi nomiyôngo, shin kpev u a lu a ihogholough iyol ga yô, sha ishe i u we yô, sha ci u nagh ku iboogh; pristi a̱ na iwom sha ci u nan, sha kwagh u nan er abu nan fe ga la, nahan á de nan isholibo i nan.

¹⁹Ka nagh ku iboogh je la; nan ngu a ibo sha ishigh ki TER kpee je.