Read tiv Yeremia 12 Bible Online

Yeremia 12 - tiv bible

Yeremia 12

¹TERE, We U ngu u perapera, aluer me huna U kpaa; nahan kpaa kwagh ngum u ôron a We: Ka nyi man gbenda u iferor u lu a iverene? Man ka nyi mba ve eren kwagh sha atseregh la cii, i kpe ve iyolo?

²U môôr ve, ve wa amise je; ve vese, ve ume atam je; U ngu ikua ikua a ve sha zwa ve, kpa U ngu ca a asema a ve.

³Kpa, We TERE, U fam; U ngu nengen a mo, U kar mlu u ishima yam a We. Tsuwe ve kera er ka iyôngo nahan sha ci u za sôngon, tsegha ve ver kposo sha ci u iyange i sôngon.

⁴Ka hanma iyange je man tar ua de u uren, man ahu a shin tar cii aa de u usene? Sha ci u kwaghbo u mba ve tem ken u la, ishôso ngi timin kua inyon kpaa, sha ci u ve kaan er: Una nenge mkur wase ga, yô.

⁵Aluer u gba ayem a mbazenden sha angahar kpa u vôr yô, nahan á er nan man ú nyôngoso a anyinya? Man aluer ken tar u bem kpaa ishima ngi nyian we yô, nahan ú er nan ken gborikô u Yordana?

⁶Gadia anngôôv ou, man ya u teru je kpaa, ve je kpaa, ve ya zwa sha a we; ve je kpaa ve lu camber we ijime van ye; de ne ve jighjigh ga, shin vea ôr u akaa a doon nan nan kpaa.

⁷M undu ya Wam, M gbihi dyako Wam kera, M gema u a doo uma Wam ishima la, M na sha ikev i mbaihomov nav.

⁸Dyako Wam hingir Mo er begha ken ikô nahan; a ta kume a Mo, ka nahan man M ker un ihom ye.

⁹Dyako Wam hingir Mo er inyon i tswam i muelem iyol nahana? Inyon i tswam ta sha a na kase un tsere? Za nen, za kohol nen inyamtoho cii, va nen a i, i̱ va ya inyam.

¹⁰Mbakuranilev kpishi vihim sule u ikon i wain ve ndyar kwar Wam shin akev angahar a ve, ve gema kwar Wam u doon hingir taaikôngo dang.

¹¹Ve gema un hingir ice; ngu zungwen sha ishigh Yagh, er a lu ice yô; tar la cii hingir ice, ma or kpaa nan ver ishima sha mi ga.

¹²Agungu a penem penem a ken mkôngo cii, mbatiminakaa unde sha a; gadia sanker u TER ngu wuan, hii ken vegher u tar ne zan zan ar vegher u keela; ma or u uma u zuan a bem nan kera ngu ga.

¹³Ve lôô alakema, ve gema ve sunda usaa; ve er ayol a ve ican, kpaa ve zua a ma mtsera ga; kunya u̱ kôr ne a iyiav yenev, sha ci u iyugh i tsung i TER.

¹⁴TER ngu kaan nahan er: Mba ve we ndor a Mo, ve eren kwaghbo ne cii, ve benden dyako, u M ver ior Av Iserael, ave ne, nenge, Me tsuwe ve ken tar ve kera, man Me tsuwe ya u Yuda ken atô ve kpaa.

¹⁵Tsô ken masetyô u M tsuwe ve kera yô, Me shi Me zungwe ve mhôônom; shi Me hide a ve, hanma or hen dyako u nan, man hanma or hen tar u nan.

¹⁶Tsô, aluer vea hen igbenda i ior Av sha gbashima, sha u bumun iti Yam kaan er: Er TER A lu u uma yô, er ve kpaa ve tese ior Av u bumun Baal nahan, nahan á maa ve ken atô u ior Av.

¹⁷Kpa aluer vea ver ato ga yô, Me tsuwe ikurior la kera, Me tim i kera, kape TER A kaa ne.