Read tiv Yeremia 13 Bible Online

Yeremia 13 - tiv bible

Yeremia 13

¹TER kaam nahan er: Za, za yam tsar sha ci wou u i tum sha mou yô, kange un shin iwenge, kpa de we un shin mnger ga.

²Nahan m yam tsar sha imo i TER, m kange un shin iwenge.

³Tsô kwaghôron u TER va her a mo u sha kwa har, er:

⁴Tôô tsar u u yam, u a lu u shin iwenge la, mough za hen Uferati, za yer un ken kwevande.

⁵Nahan m za, m za yer un hen Uferati, er TER kaam nahan.

⁶Tsô ayange nga kar kpishi yô, TER kaa a mo er: Mough, za hen Uferati, za tôô tsar u M kaa u Mer, za koso ker la.

⁷Nahan m za hen Uferati, m za time, m tôô tsar la hen ijiir i m koso un la; kpa nenge, tsar vihi, kera lu a ma inja ga.

⁸Tsô kwaghôron u TER va her a mo, kaa er:

⁹TER ngu kaan nahan er: Kape Me vihi iyolmoron i Yuda man iyolmoron i vesen i Yerusalem kera la.

¹⁰Aferaior a a vende u veren ato sha akaaôron Am ne, a zenden sha mcighir u ishima i a, man shi a dondon mbaaôndo mbagenev sha u eren ve tom, man u guren civir ve, aa hingir vough er tsar ne nahan, u alu a ma inja ga ne.

¹¹Gadia er tsar ka a var or shin iwenge nahan, kape M er ya u Iserael cii kua ya u Yuda cii, Mer, ve̱ var a Mo ne, kape TER A kaa ne; sha u ve̱ lum nongo man iti, man iwuese, man icivir; kpa ve venda u ungwan.

¹²Nahan yô, ôr ve imo ne, wer: TER, Aôndo u Iserael, ngu kaan nahan er: Hanma ikpe á iv i a zar u wain; tsô vea kaa a we er: Se se fa er á iv hanma ikpe a zar u wain ga ha?

¹³Nahan ú kaa ve wer: TER ngu kaan nahan er: Nenge, mbatamen ken tar ne cii: utor mba ve tem sha ikônough ki torough ki Davidi man upristi man uprofeti kua mba ve tem ken Yerusalem cii, Me iv ve a ihundugh ki msôr.

¹⁴Me kôr hanma or, Me ta sha ugen, uter a ônov mba nomso imôngo, kape TER A kaa ne; Me zungwe mhôônom ga; mhôônom maa kôrom er Me de u timin ve kpaa ga.

¹⁵Ungwa nen, ver nen ato; de moron nen iyol ga, gadia TER ôr kwagh.

¹⁶Na nen TER, Aôndo wen, icivir, er A lu a er ime i wa ga ne, man er ne lu a ta angahar kera sha iwo i wan ime la ga ne, man er ne lu keren iwanger yô, A gema i i hingir mure u kuugh man shi angôghime.

¹⁷Kpa aluer ne venda u ungwan un yô, uma wam una vaa ken myer sha ci u iyolmoron la; man ashe am aa vaa tsung, mliam maa haa, sha ci u i kôr ikumuile i TER, i kange i, i yem a mi yô.

¹⁸Ôr kwagh a tor man ngô u tor, kaa wer: Shar nen inya; gadia atsar a en a sha ityou, sagh kera, ka tsar u icivir yen je la.

¹⁹Agar a ken tar u Imbusutariyan la i wuhe a, man or u bughun a nan ngu ga; i kange Yuda i yem a mi eleghaa, i yem a ve kera ci ca cii.

²⁰Kende ashe ou Sha, nenge mba ve lu van shin tar u Imbusutarimese la; ikumuile i i ne u, i i doo yum la, ngi hana?

²¹Tsô ú kaa nana, aluer Una gema Una ver mba u ye ikar a ve la, er ve̱ tema tor sha a wee? Mtoghor una tser u er kwase u togholmar nahan gaa?

²²Aluer u kaa ken ishima you wer: Ka nyi man ambaakaa angan a tsereme? Ka sha ci u ifer you i vesen, i kôvor ikondo you, man akishiangahar a ou kpaa a zua a ican i aperagh ye.

²³Oretiopia nana fatyô u geman kwavyolough u nan hingir kposo kpa? Shin anyam yô, una gema amian a na? Aluer ka nahan yô, ne kpaa né er kwagh u dedoo, ne mba iferkwagh i hool ne ne.

²⁴Ka nahan man Me sambe ve kera, er atighir a uwua a ahumbe a hir a purugh a mi kera nahan.

²⁵Ka kwar wou je ne, ka kwar u u zough a mi her a Mo ne, kape TER A kaa ne, sha ci u M hungul we man u gema u lian sha aie yô.

²⁶Nahan Mo iyol Yam je, Me kôvor ikondo you je ia va ar u sha ishi, idyelegh wou una due ken igbar.

²⁷M nenge akaa a ou a ndôhôrshima ka idya you, man mngor wou sha inja i nyinya la, man ijimba you, sha agungu a ken toho. Kwagh á tser u! We Yerusalem. Ka hanma shighe man ú va hingir wang ase?