Read tiv Yeremia 16 Bible Online

Yeremia 16 - tiv bible

Yeremia 16

¹Kwaghôron u TER shi va her a mo er:

²De eren kwase ga, man shi de luun a ônov mba nomso shin mba kasev hen ijiir ne ga.

³Gadia sha kwagh u ônov mba nomso man ônov mba kasev mba i mar ve hen ijiir ne, man sha ungô vev mba ve mar ve kua uter vev mba ve Mar ve ken tar ne yô, TER ngu kaan nahan er:

⁴Angev mbu bov mbua wua ve, á vaa ve ga, man á ii ve kpaa ga; vea hingir er atihi a ihôghonov mbi sôron sule a min hen inya nahan; ka sha sanker kua sha ijen á tim ve kera ye; akom a ve aa hingir kwaghyan u inyon i sha man inyamikume i shin tar.

⁵Gadia TER ngu kaan nahan er: De nyer ken iyou i mzungu ga man shi de ze sha ci u za vaan shin sha ci u za zungwen ve ga, gadia M ngohol bem Wam hen ior mban kera, kape TER A kaa ne, ka erdoo kua mhôônom ma zungwen je la.

⁶Mbavesen kua mbakiriki cii vea kpe ken tar ne; á ii ve ga, man shi á zungwe ve kpaa ga, á gber ivav iyol ga, shin á torough ityough sha ci ve kpaa ga;

⁷á coon kwaghyan u zungwen ku, sha u á sur or ishima a mi ga; man á na or iyongo i surun ishima sha u nana ma sha ci u ter u nan, shin ngô u nan kpaa ga.

⁸Man shi de nyer ken ya u iniongo sha u teman a ve imôngo sha u yan man u man kwagh ga.

⁹Gadia TER u akum a Sha, Aôndo u Iserael ngu kaan nahan er: Nenge, Me er sha ashe a en man ken ayange a en kpaa, er imo i ahan man imo i iember man imo i orkwasehe kua imo i kwasehe ia bee hen ijiir ne.

¹⁰Tsô, zum u ú pase ior mban akaaôron angan cii yô, man vea kaa a we er: Ka nyi man TER A shi ter zegekwaghbo ne cii nahana? Iferkwagh yase ka nyi? Man kwaghbo u se er TER, Aôndo wase, ka nyi?

¹¹Yô, ú kaa ve wer: Ka sha ci u uter enev ve tem kera yô, kape TER A kaa ne, man ve dondon mbaaôndo mbagenev, ve eren ve tom, ve gur ve civir ve, Mo yô, ve gemam ve ta kera, atindiakaa Am kpaa ve wa iko ga;

¹²kpa ne yô, ne er ifer hemba uter enev; gadia nenge, hanmô wen nan zenden sha mcighir u ishima i nan i bo, je yô, ne kera ver ato her a Mo ga;

¹³nahan yô, Me gbihi ne ken tar ne kera, né yem ken tar u ne kua uter enev kpaa ne fe u ga yô; ka keela né eren mbaaôndo mbagenev tom tugh man tetan ye; gadia Me zungwe ne mhôônom côhin tsô kpaa ga.

¹⁴Nahan yô, nenge, ayange nga van, kape TER A kaa ne, a á kera kaa er: Er TER u A dugh a Mbaiserael ken tar u Igipiti A lu u uma ne, ga;

¹⁵kpa á kaa er: Er TER u A dugh a Mbaiserael shin imbusutarimese man ken ityar i A zende ve ve yem ker la cii A lu u uma ne. Een, Me shi Me hide a ve ken tar u lu M na uter vev la yô.

¹⁶Nenge, Me tindi, á yila mbakôronishu kpishi, kape TER A kaa ne, vea va kôr ve; ken masetyô Me tindi, á yila mbayarenikôr kpishi, vea num ve sha hanma uwo man sha hanma igungu man ken ikwe i avande kpaa.

¹⁷Gadia ashe Am ne nga sha igbenda ve cii, ngi myer sha ishigh Yagh ga, man iferkwagh ve kpaa ngi myer sha ashe Am ga.

¹⁸Nahan Me vande oron ve iyev á kuma kwa har sha iferkwagh ve kua isholibo ve, sha ci u ve hôngor tar Wam sha akom a akaa a ve a ndôhôr shima, man ve mgbough dyako Wam a akaa a ve a hôngorough la.

¹⁹TERE, agee am man garutya wam man ijiir yam i yeren ker sha iyange i ican, ka her a We akuraior aa due ken akighir a tar aa va ye, aa kaa er: Ka aie tseegh a lu dyako u uter asev ve ye ye; ka agbilinakaa, kwagh môm u lun a inja ngu ker ga.

²⁰Or nana fatyô u eren mbaaôndo sha ci u nana? Mbala ka mbaaôndo ga.

²¹Ka sha ci u nahan, nenge, Me na, vea fa, hen shighe ne je, vea fa uwegh Agh kua tahav Av; man shi vea fa er iti Yam i lu TER je yô.