Read tiv Yeremia 17 Bible Online

Yeremia 17 - tiv bible

Yeremia 17

¹Isholibo i Yuda yô, i nger i sha pensel u iyôgh man sha diamondi u horon zwa; i gber i sha kpande u ishima ve, kua sha ikor i atse a ve a nanden nagh sha mi kpaa,

²er ônov vev ve umbur atse a ve a nanden nagh sha mi man Asherim ve hen ikon i hômon ika sha agungu a taven,

³sha iwo i ken ikôngo. Akaa a ou kua inyaregh you Me gema Me na, á ya ishar sha mi kua ajiir a ou a taven sha kpaa, sha ci u isholibo i ken tar wou la cii.

⁴Man we ú gema ú pase uwegh ough sha dyako wou u M ne u la kera; man shi Me na, ú er mbaihomov ou tom ken tar u u fe u ga yô; gadia ne keer usu sha iyugh Yam, u ua tsôron hian yô.

⁵TER ngu kaan nahan er: Or u nan suur sha or man nan gem inyamyolough i̱ hingir agee, a nan, man ishima i nan i pav a TER yô, nan ngu a ifan iyol.

⁶Gadia nana hingir er anihu u ken desereti u lun tsaasaa nahan, nana nenge a shighe u mkpeyol a ve ga, kpa nana tema ken ajiir a tseghe tseghe a ken taaikôngo, tar u inya i bar u ma or tem ker ga yô.

⁷Or u nan suur sha TER yô, saan nan iyol, u TER A lu ishuur u nan yô.

⁸Gadia nana hingir er kon u i môôr u hen kpemnger, u u samber amise a u, a za ar shin kungômnger, u u cie mtsee u iyange ga, kpa ika i u i lu ndor shough shough; inyom i icegh ki ze kpaa, ishima ia nyian u ga, man shi ua de u umen atam kpaa ga.

⁹Ishima i wa atseregh je hemba hanma kwagh cii, i vihi je gande; ka an nana fatyô u fan i?

¹⁰Mo TER M tev ishima, M kar ahi, sha u Me na hanma or sha igbenda i nan, sha inja i atam a aeren a nan.

¹¹Er ikuna i ka i tsev aji a i lu i, i te a ga yô, kape or u nan kohol inyaregh, kpa i lu sha gbenda u mimi ga, nan lu la; ken atô u ayange a nan nana undu ki man sha mkur u nan yô, nana hingir ibumeor.

¹²Ikônough ki torough ki icivirigh, ki i kende ki sha sha hiihii je, ka icighanjiir wase.

¹³We TERE, ishimaverenkeghen i Iserael, mba ve undu U cii vea va ahenge. Mba ve pav a Mo cii, á nger ve hen inya, sha ci u ve undu TER, imbor i mngerem ma umam la.

¹⁴Beem angev, TERE, tsô me hingir dedoo; yimam, tsô me war; iwuese yam ka We je.

¹⁵Nenge, mba kaan a mo er, Kwaghôron u TER ngu hana? A̱ va ase!

¹⁶Mo yô, m torough a We mer va a kwagh u bo ga, iyange i bo kpaa m tôm i ga; U fa, kwagh u a due ken zwa wam yô, lu sha ishigh You.

¹⁷De hingir mo kwagh u cieryol; ga; U ngu ijiir yam i yeren je sha iyange i kwaghbo.

¹⁸Mba ve tevem a ican ve̱ va ahenge, kpa mo yô, de rumun m̱ va ahenga ga; ve yô, mciem ma̱ haa ve iyol, kpa mo yô, mciem ma̱ de heem iyol ga; va a kwaghbo sha a ve, sombo ve vughô vughô.

¹⁹TER kaa a mo nahan er: Za, za tile hen hunda u ônov mba iorov, u utor mba Yuda ve nyer min shi ve dugh min kpaa la, kua hen ihinda i Yerusalem cii;

²⁰kaa a ve wer: Ungwa nen kwaghôron u TER, ne utor mba Yuda, man Mbayuda cii kua mba ve tem ken Yerusalem cii, ne mba ne nyer ken ihinda ne cii;

²¹TER ngu kaan nahan er: Ver nen ishima sha ci u uma wen, de tee nen ma ikav sha iyange i memen ga, man shi de nyer nen a mi sha ihinda i Yerusalem kpaa ga.

²²Man shi de tee nen ma ikav ken uya enev, duen a mi sha iyange i memen ga, man shi de eren nen ma tom kpaa ga, kpa tseghan nen iyange i memen er lu M kaa uter enev nahan.

²³Kpa ve wa iko ga, man shi ve ver ato kpaa ga, ve nômbo ikôr ve her, sha u vea ungwa ga, man sha u vea ngohol ityesen kpaa ga yô.

²⁴Tsô, aluer nea ungwam mimi mimi, kape TER A kaa ne, man nea kera nyôron a ikav sha ihinda i gar ne sha iyange i memen ga, kpa nea tsegha iyange i memen, sha u eren ma tom sha i ga yô;

²⁵nahan sha ihinda i gar ne utor man atiator vea nyôr, mbateman sha ikônough ki torough ki Davidi man, mbateman sha akekeautya kua sha anyinya, ve man atiator a ve man nomsombaiorov mba Yuda, man mba ve tem ken Yerusalem kpaa; man gar ne una hingir igbekeke.

²⁶Á due ken agar a Yuda, man ken iningirtar i Yerusalem, man ken tar u Benyamin, man shin pev, man sha iwo kua ken Imbusutariyan la, á va a iniav mbi nanden man iniav mbi sôngon man iniav mbi sha samuyia kua kwaghhumandoon man shi á va a iniav mbi ishughun hen iyou i TER kpaa.

²⁷Kpa aluer nea ungwam ga, nea rumun u tseghan iyange i memen ga, man u den ikav mbi tôôn nyôron a mi hen ihinda i Yerusalem sha iyange i memen ga, nahan Me keer usu hen ihinda na, ua hia ayou a utor a Yerusalem, á kera pir u kpaa ga.