Read tiv Yeremia 21 Bible Online

Yeremia 21 - tiv bible

Yeremia 21

¹Kwaghôron ne due hen TER va hen Yeremia, zum u tor Sedekia tindi Pashur wan u Malkia her a na kua Sefania wan u pristi Maaseya la, er:

²Shi pine ase ishima i TER; gadia Nebukadinesar, tor u Babilon ngu nôngon ityav a vese; alaghga TER Una er a vese sha aeren a Na a kpilighyol la cii, sha er una mough her a vese kera yô.

³Nahan Yeremia kaa a ver er: Kaa nen Sedekia nahan ner:

⁴TER, Aôndo u Iserael, ngu kaan nahan er: Nenge, Me hide a ikav mbi utyav mbi mbi lu sha ikev yen la ijime, mbi ne nôngo ityav a mi ken won gar a tor u Babilon, man a Mbakaldi, mba ve kase ne la, Me kohol mbi ken atô u gar ne.

⁵Mo iyol Yam je Me nôngo ityav a ven sha uwegh ku naregh man sha uwegh ku ageegh, á lu sha ishima i nyoon man sha iyugh, kua sha ishima i vihin tsung je.

⁶Me tsaha mba ve tem ken gar ne, or kua zendenya; bouange u vesen una wua ve.

⁷Ken masetyô la yô, kape TER A kaa ne, Me gema Sedekia tor u Yuda man mbatomov nav, kua ior mba ken gar ne mba ve wer bouange man sanker kua ijen la, Me na ve sha ikev i Nebukadinesar tor u Babilon man sha ikev i mbaihomov vev, kua sha ikev i mba ve keren uma ve, una wua ve sha zwa u sanker, una de ve uma ga, mhôônom maa kôr un a ve ga, man una zungwe ve mhôônom kpaa ga.

⁸Kaa ior mban wer: TER ngu kaan nahan er: Nenge, M ngu veren ne gbenda u uma kua gbenda u kuugh sha ishi:

⁹Or u nan hanger akughul ken gar ne yô, nana kpe ku u sha sanker man u sha ijen kua u sha bouange; kpa or u nan dugh nan za hingir sha ikev i Mbakaldi, mba ve kase ne sha utya la yô, ka nan nana lu uma ye, man uma u nan una hingir nan er ka ishar nan ye yô.

¹⁰Gadia M gema ishigh M ver sha gar ne, ka sha u eren un kwagh u vihin, ka kwagh u dedoo ga, kape TER A kaa ne: á gema un á na sha ikev i tor u Babilon, una nande un sha usu.

¹¹Sha kwagh u ya u tor u Yuda yô, ungwa nen kwaghôron u TER:

¹²We, ya u Davidi, TER ngu kaan nahan er: Ôron ijir sha mimi pepe, yiman mba i nzughul a ve sha ikev i ipilaor la, sha er iyugh Yam i̱ de dugh er usu nahan u̱ hia zan zan ma or nana̱ fatyô u pirin u ga ze, sha ci u iferkwagh i aeren a en la.

¹³Nenge, M ngu num a we, we u u tem shin pev, we vande u shin pev la, kape TER A kaa ne; ne mba ne kaa ner: Ka an je nana va ta num sha a vese? Man shi ka anti nana fatyô u nyôron shin ajiir a ase a temana?

¹⁴Tsô Me tsaha ne sha atam a aeren a en vough, kape TER A kaa ne; Me keer usu ken ikô na, ua hia hanma kwagh u a kase un cii.