Read tiv Yeremia 22 Bible Online

Yeremia 22 - tiv bible

Yeremia 22

¹TER kaa er: Sen shin ya u tor u Yuda, za ôr kwagh ne her,

²kaa wer: Ungwa kwaghôron u TER, we tor u Yuda, u u tem sha ikônough ki torough ki Davidi ne, we man mbatomov ou, kua ior ou mba ve nyer sha ihinda ne.

³TER ngu kaan nahan er: Ôron nen ijir sha mimi man perapera, yiman mba i nzughul a ve sha ikev i ipilaor; de kera eren orvannya shin ancôghol shin kwasecôghol kwagh u bo shin kwagh u iperagh ga, man shi de kera haan awambe a orishôôgh inya hen ijiir ne ga.

⁴Gadia aluer ú er kwagh ne keng yô, nahan utor mba ve tem sha ikônough ki torough ki Davidi, mba ve zenden a akekeautya man ve hende anyinya yô, vea nyôr hen ihinda i ya ne; un a mbatomov nav, kua ior nav.

⁵Kpa aluer nea ungwa kwaghôron ne ga yô, M bum sha iyol Yam je, kape TER A kaa ne, ya ne una hingir ice je.

⁶Gadia TER ngu kaan sha kwagh u ya u tor u Yuda nahan er: U hingir Mo Gileadi, ityough ki Lebanon je; nahan kpaa Me gema u ú hingir taaikôngo je man er agar a a lu a ma or u teman ker ga yô.

⁷Man shi Me ver mba vea tim u la, hanmô ve a ikav mbi tswamev mbi nan; vea gber usedar ou mba hemban doon mbala, vea haa ve ken usu.

⁸Akuraior kpishi aa kar hen gar ne, aa kaa ayol a a er: Ka sha ci u nyi man TER A shi er a zegegar ne nahana?

⁹Vea gema á kaa er: Ka sha ci u ve gbihi ikuryan i TER, Aôndo ve, man ve gur ve civir mbaaôndo mbagenev, ve eren ve tom kpaa yô.

¹⁰De vaan nen u a kpe la ga, man shi de zungu un kpa ga; kpa vaa nen tsung sha ci u wen u a yem la, gadia una kera hide ga, una kera nenge a tar u i mar un ker la kpaa ga.

¹¹Gadia TER ngu kaan sha kwagh u Shalum wan u Yoshia, tor u Yuda u a tema tor sha ityough ki ter na Yoshia, u a mough hen ijiir ne kera ne, er: Una kera hide mayange ga;

¹²kpa ijiir i i yem a na uikangen her la, ka ker je una kpe ye, una kera nenge tar ne ashe ga.

¹³Kwagh á tser or u nan maa ya u nan sha perapera ga la, man ukpombaayoughouv mba nan kpaa sha mimi ga la; u nan ne orgen tom, nan eren nan gbilin, injar i nan kpaa nan kimbi nan ga la;

¹⁴U nan kaa er: Me maa zegeyou, me tôndo ukpo mba shaav ve̱ gbangese, man nan gber uwindou, nan cir un ikon i sedar, nan shighe un icigh ki nyian.

¹⁵Nahan u tema tor je ve he, er u nenge u hemban sha ikon i sedar la zee! Teru lu yan kwagh man man kwagh man eren akaa a mimi, kua a perapera gaa? Nahan kpe un iyol.

¹⁶A wa iko sha ijir i mbaatsanev kua mbaibanave, nahan tar doo. Kera ka u fan Mo je la gaa? Kape TER A kaa ne.

¹⁷Kpa ishe you kua ishima you mba sha ma kwagh ugen ga saa mtsera u dang man u haan awambe a orishôôgh, man u eren kwagh sha mkighir man u ngohol kwagh sha apera.

¹⁸Nahan yô, TER ngu kaan sha kwagh u Yehoyakim wan u Yoshia, tor u Yuda la, nahan er: Á kera vaa un er: Aye, anngômô! Shin: Aye, anngôm u kwase! kpaa ga. Á kera vaa un er: Aye, Tere! Shin: Aye, orcivirigh! kpaa ga.

¹⁹Á ii un sha inja i m-ii u jaki, á kpela un á ta kera ca a ihinda i Yerusalem.

²⁰Za unde sha Lebanon, za vaa; genger imo you sha Bashan; vaa shin Abarim; gadia i tim mba ve doo u ishima la cii.

²¹M ôr u kwagh zum u u tema kpe u iyol la; u gema u kaa wer: Me ungwa ga. Ka inja you je la, hii iyev wou je, u venda u ungwa imo Yam.

²²Mbakuranilev ou cii ahumbe aa kar a ve kera mba ve doo u ishima á yem a ve uikangen; nahan ú va ahenge keng, ú ya kunya sha ci u iferkwagh you cii.

²³We or u u tem sha Lebanon, u wa iya you sha ikon i sedar ne, nenge imbamtoghol i ú toghol sha shighe u ican i va tser u yô, bee er ka mnyoonom ma kwase u toghol mar nahan!

²⁴Er M lu u uma ne, kape TER A kaa ne: Shin Konia wan u Yehoyakim tor u Yuda una lu kunya u veren ikav a mi sha uwegh Agh ku yanegh je kpaa, nahan kpaa Me tsuwa u kera,

²⁵Me na u sha ikev i mba ve keren uma wou, man sha ikev i mba u cie ve yô, ka sha ikev i tor Nebukadinesar tor u Babilon, man sha ikev Mbakaldi je la.

²⁶Me ta u kera, kua ngôu, u a mar u la kpaa, ken tar ugen, u i mar ne ker ga la, ka keregh né za kpe ye.

²⁷Kpa tar u u sar uma ve u hiden hen u la, vea hide her ga.

²⁸Nahan Konia shon ne, ka kokotye u lahana? Ityegh ki lun a inja ga zee? Hii nan man i te ve kera, un kua vor na, i te ve ken tar u ve fe u ga nahana?

²⁹We tar, tara, tara, ungwa ase imo i TER.

³⁰TER ngu kaan nahan er: Nger wer: Or ne ngu a wan ga, ka or u tar ua wa un sha ayange a na ga, gadia ma wan na u ikôr i lagh nan, nana tema sha ikônough ki torough ki Davidi, nana ya tor ken Yuda, nana lu ga.