Read tiv Yeremia 23 Bible Online

Yeremia 23 - tiv bible

Yeremia 23

¹Kwagh tser mbakuranilev mba ve timin iyôngo shi ve sambe i hen ijiir yam i sôôso ilev la! Kape TER A kaa la.

²Nahan yô, TER, Aôndo u Iserael ngu kaan sha kwagh u mbakuranilev mba ve koson ior Av ne, nahan er: Ne gema ne sambe ikumuile Yam, ne zenda i kera, ne kera nenge sha i ga; nenge Me va tsaha ne sha ifer i aeren a en la, kape TER A kaa ne.

³Mo Me kohol asande a ikumuile Yam a a shi her la, ken ityar i M zende i i yem ker la cii, Me shi Me hire a i hen ajiir a i; ia ngee kpishi, ia seer a seer.

⁴Me shi Me ver mbakuranilev sha i, mba vea sôôso i yô; ia kera cia kwagh ga, shin kwagh á cier i iyol kpaa ga, hanmôgh kia kera ban ken i ga, kape TER A kaa ne.

⁵Nenge, ayange nga van, kape TER A kaa ne, a Me mough Davidi a Gbaa u perapera, Una tema tor, Una eren kwagh sha kwaghfan, Una ôr ijir sha mimi man Una er perapera sha tar.

⁶Sha ayange Na, Yuda una war, man Iserael kpaa una tema bem bem; iti i á yilan Un a mi je yô, er: TER KA PERAPERA WASE.

⁷Nahan yô, nenge ayange nga van, kape TER A kaa ne, a á kera kaa er: Er TER u A dugh a Mbaiserael ken tar u Igipiti A lu u uma ne, ga,

⁸kpa á kaa er: Er TER u A dugh man A hemen vor u ya u Iserael shin tar u Imbusutarimese man ken ityar i M zende ve, ve yem ker la cii A lu u uma ne. Vea tema ken tar ve jim.

⁹Sha kwagh u uprofeti: Ishima vihim ker cii, akuhe am cii tenger; m hingir er orhumdenmsôrom nahan, man er or u wain a ker nan yô; sha ci u TER man sha ci u akaaôron a Na a tseghan la.

¹⁰Gadia tar ne iv a udyambaiorov; ifan gema na tar mzungu; ajiir a yan toho a ken taaikôngo uma cii; kwagh u ve ze her ayem yô, saa ka u bo; gbenda u ve keren tahav a mi yô, ka u mimi ga.

¹¹Gadia profeti kua pristi ve uhar cii mba we Aôndo iko ga; ken iyou Yam je kpaa M tser a ifer ve, kape TER A kaa ne.

¹²Nahan yô, gbenda ve ua hingir ve er ka ajiir a lyemen ken ime; á mgbegha ve vea gba shimi; gadia Me haa kwaghbo sha a ve sha inyom i á va tsaha ve la, kape TER A kaa ne.

¹³M nenge a udangmbaakaav hen uprofeti mba Samaria: mba ôron kwagh pasen ken iti i Baal, ve na ior Av Iserael ve tsume gbenda.

¹⁴Kpa ken uprofeti mba Yerusalem yô, M nenge a kwagh u ndôhôrshima; ka ve er idya, ve zenden sha aie, ve taver ave a mbaerenifer, je ma or môm u geman undun ifer i nan nan ngu ga; ve cii ve hingir Mo er Sodom nahan, man mba ve tem ken a na er Gomora yô.

¹⁵Nahan yô, TER u akum a Sha ngu kaan sha kwagh u uprofeti nahan er: Nenge, Me na ve kon u yuwan, ve̱ ya, man shi Me na ve mngerem ma meghem, ve̱ ma; gadia ka ken uprofeti mba Yerusalem je u wan Aôndo iko ga a dugh a nyer ken tar la cii ye.

¹⁶TER u akum a Sha ngu kaan nahan er: De we nen iko sha akaaôron a uprofeti mba ve ôron ne kwagh la ga; mba tesen ne u veren ishima sha gbilinkwagh; kwagh u ve nenge a mi, ve er na la, ka u sha asema a ve tsô, ka kwagh u sha zwa u TER ga.

¹⁷Mba zeren kaan a mbalahan Mo mbala er: TER kaa er: nea lu a bem; man hanma or u nan zenden sha mcighir u ishima i nan, ve kaa a nan er: Ma kwaghbo una tser u ga.

¹⁸Gadia ka anti nan til ken mhen u TER sha u nana nenge man nana ungwa kwaghôron Naa? Ka anti nan ver ato sha kwaghôron Na, nan ongo Unu?

¹⁹Nenge, zegeahumbe u TER, ka iyugh je la, i dugh, ka hiar je; ka sha ityough ki mbaaferev je una va ta ye.

²⁰Ishima i vihin i TER ia hide ga, saa Una kure man Una er sha awashima Na; ka sha ayange a masetyô man né va kav inja i kwagh ne wanger wanger ye.

²¹M tindi uprofeti mban ga, nahan kpaa ve gba zan tsô; M ôr kwagh a ve ga, nahan kpaa mba gbe ôron kwaghôron u uprofeti tsô.

²²Kpa aluer yan vea til ken mhen Wam yô, ma ve ne ior Av ma ve ongo akaaôron Am, ma ve gem ve sha gbenda ve u bo la kera, kua sha ifer i aeren a ve kpaa.

²³Mo M ngu Aôndo u ikuaa? Kape TER A kaa ne, kera ka Aôndo u caa gaa?

²⁴Ma or nana fatyô u za yeren ken ajiir a ken iuv je er Mo Me nenge a nan ga yôô? Kape TER a kaa ne. M iv Sha man tar gaa? Kape TER A kaa ne.

²⁵M ungwa kwagh u uprofeti ve kaa la, mba ve ôron kwaghôron u uprofeti sha aie ken iti Yam, er: Mnyam ciem, mnyam ciem la.

²⁶Shi nan je man kwagh ne una bee uprofeti mba ve ôron kwaghôron u profeti sha aie ken asema, uprofeti mba sha icugh i asema ve la,

²⁷mba ve ver ishima u nan ior Av, iti Yam i̱ hungul ve sha mnyam vem ma ve er ayol a ve la, er uter vev kpaa, iti Yam lu hungul ve, sha ci u Baal nahana?

²⁸Profeti u a lu a mnyam ma cien yô, a̱ ôr ase mnyam shi un di u a lu a kwaghôron Wam kpaa, a̱ ôr kwaghôron Wam sha mimi. Adenga alakema kuma sha alakema je kpa? Kape TER A kaa ne.

²⁹Kwaghôron wam ngu er usu nahan gaa? Kape TER A kaa ne, man er nondo u hemben awen nahan kpaa gaa?

³⁰Nahan yô, nenge, M ngu num a uprofeti, kape TER A kaa ne, mba ve iin akaaôron a Am hen ayol a ve la.

³¹Nenge, M ngu num a uprofeti, kape TER A kaa ne, mba ve kaan sha zwa ve, er: Kape A kaa ne.

³²Nenge, M ngu num a mba ve er mnyam ma cien la, kape TER A kaa ne, man ve pasen ma, ve ne ior Av ve tsum sha aie ve, kua kwaghôron ve u sha ihagher la; nahan kpaa, Mo M tindi ve ga, M na ve zwa kpaa ga; man shi vea lu ior mban a ma inja je ga, kape TER A kaa ne.

³³Aluer ior mban, shin profeti, shin pristi, una pine u er: Ikav mbi TER ka nyi? Tsô u kaa a ve, wer: Ka ne je ne lu ikav ye! Me ta ne kera, kape TER A kaa ne.

³⁴Man sha kwagh u profeti man pristi man ior mban mba ve kaan er: “Ikav mbi TER” yô—Me tsaha or la kua ya u nan.

³⁵Kaa nen hanmô wen a or u wan ndor a nan man hanmô wen a anngô u nan nahan ner: TER kaa imo nana? Man, TER ôr kwagh er nana?

³⁶De kera seer teren nen kwagh u ikav mbi TER la ga; gadia kwaghôron u hanma or una hingir ikav mbi nan; gadia ne goom akaaôron a Aôndo u uma, TER u akum a Sha, Aôndo wase.

³⁷Kaa a profeti nahan wer: TER kaa imo nana? Man TER ôr kwagh nana?

³⁸Kpa aluer nea kaa ner: “Ikav mbi TER” yô, nahan yô, TER kaa nahan er: Er ne er kwagh ne, ne kaa ner: “Ikav mbi TER” yô, man M vande tindin ne a loho Mer: De kera kaan nen ner: “Ikav mbi TER” ga,

³⁹sha ci u nahan yô, nenge, Me tôô ne man gar u M na ne kua uter enev la, Me ta ne sha ishigh Yagh kera;

⁴⁰Me haa ne aheen a tsôron, man kunya u ua hungul mayange ga yô.