Read tiv Yeremia 26 Bible Online

Yeremia 26 - tiv bible

Yeremia 26

¹Sha hiihii u Yehoyakim, wan u Yoshia, tor u Yuda tema tor la, kwaghôron ne za va, a due hen TER, er:

²TER ngu kaan nahan er: Za tile sha tembe u iyou i TER, ôr kwagh a agar a Yuda cii a ka a va civir ken iyou i TER ne, ôr ve akaaôron a M kaa Mer ôr ve la cii; de shi ma kwaghôron môm kpaa ga.

³Alaghga vea ver ato, man hanmô ve nana undu gbenda u nan u ifer; sha u M̱ vaa afanyô, M̱ de kwaghbo u M we ishima Mer, Me er ve sha ci u ifer i aeren a ve la.

⁴Kaa a ve wer: TER ngu kaan nahan er: aluer ne venda u veren ato her a Mo, u zenden sha tindi Wam, u M ver ne sha ishi yô,

⁵man né venda u veren ato sha akaaôron a mbayev Av, uprofeti, mba M tindi her a ven pepe kua aikighe yô, kpa ne we iko ga la,

⁶nahan Me gema iyou ne ia hingir er Shilo nahan, man Me gema gar ne una hingir akuraior a sha won cii kwagh u lun a ifan iyol.

⁷Tsô upristi man uprofeti kua ior cii ungwa akaa a Yeremia lu ôron ken iyou i TER la.

⁸Zum u Yeremia kure akaa cii a TER kaa un er a̱ ôr ior cii la yô, upristi man uprofeti kua ior cii ve kôr un, ve kaa er: Kpen you keng.

⁹Ka nyi u ôr kwaghôron u profeti ken iti i TER wer: Iyou ne ia hingir er Shilo nahan, man gar ne kpaa una hingir ice je, or á kera tema ker ga nahana? Tsô ior cii va kohol hen Yeremia ken iyou i TER.

¹⁰Zum u atiator a Yuda ungwa akaa angan yô, ve mough ken iyou i tor, ve kôndo sha iyou i TER; ve va tema hen ape nyôron hunda u he u iyou i TER la.

¹¹Tsô upristi man uprofeti ôr kwagh a atiator kua ior cii, ve kaa er: Or ne kuma ku, gadia a ôr kwagh sha gar ne er ne ongo sha ato a en nahan.

¹²Nahan Yeremia ôr kwagh a atiator man ior cii, a kaa er: Ka TER je A tindim er m̱ ôr kwagh sha iyou ne kua gar ne, akaaôron a ne ongo la cii ye.

¹³Nahan yô, sôr nen ase igbenda yen kua aeren a en, man wa nen imo i TER, Aôndo wen, iko; nahan TER kpaa Una vaa afanyô, Una de kwagh u bo u A ter sha a ven la.

¹⁴Kpa mo yô, m ngun sha ikev yen ne; er nen a mo er ne nenge i doo ne, man i lu ne sha mi yô;

¹⁵kpa fa nen mimi je, aluer né wuam yô, né va a awambe a orishôôgh sha ityough yenegh kua sha gar ne, man sha mba ve tem ker; gadia mimi je, TER tindim her a ven er m̱ or akaa ne cii sha ato a en.

¹⁶Nahan atiator kua ior cii kaa a upristi man a uprofeti er: Or ne kuma ku ga, gadia a ôr se kwagh ken iti i TER, Aôndo wase.

¹⁷Mbagenev mba ken mbatamen mba hen tar la kpaa, ve mough ve tile sha, ve ôr kwagh a mkohol u ior ve kaa er:

¹⁸Mika Ormoresheti ôr kwaghôron u profeti sha ayange a Hisekia tor u Yuda, a ôr kwagh a ior i Yuda cii, a kaa er: TER u akum a Sha ngu kaan nahan er: Shion ne, á tsôghol un er sule nahan, man Yerusalem ne, una hingir atihi a alôgh, man uwo u tempel ne ua hingir er agungu a a lu ken ikô nahan.

¹⁹Nahan Hisekia tor u Yuda kua ior i Yuda cii, ve wua un kpa? A cia TER gaa, man a zamber a TER, TER kpaa vaa afanyô de kwagh u bo u lu ôr sha a ve la gaa? Se yô, se mba kpelan kwaghbo u vesen haan sha uuma asev je.

²⁰Man shi orgen kpaa lu, u yan ôr kwaghôron u profeti ken iti i TER yô, ka Uria wan u Shemaia u ken Kiriati-yearim; a ôr kwaghôron u profeti sha gar ne kua tar ne vough er Yeremia nahan.

²¹Zum u tor Yehoyakim a mbaageev nav cii, kua atiator a na cii, ve ungwa akaaôron a na la, tor gba keren u wuan un; kpa er Uria ungwa aun yô, a cia, a yevese a yem ken Igipiti;

²²tsô tor Yehoyakim tindi ior ken Igipiti, ka Elnatan wan u Akebor, man ior mbagenev a na imôngo, ve za ken Igipiti;

²³ve due a Uria ken Igipiti, ve va a na hen tor Yehoyakim, nahan a wua un sha sanker, a gbihi ikom na sha ijiir ape i iin ior mba ken inya yô.

²⁴Kpa Ahikam wan u Shafan wase Yeremia, nahan i kera na un sha ikev i ior er, ve̱ wua un ga.