Read tiv Yeremia 33 Bible Online

Yeremia 33 - tiv bible

Yeremia 33

¹Kwaghôron u TER va hen Yeremia u sha kwa har, er a lu ken tembe u mbakuran, ape i wuhe un la,

²TER u A eren kwagh ne, TER u ka A sôr kwagh A ver er á va er sha mi vough la, TER ka iti Na je la, ngu kaan nahan er:

³Vaa, yilam, M̱ vengese, M̱ pase u akaa a vesen, a a gande u timen, a u fe a ga yô.

⁴Gadia TER, Aôndo u Iserael, ngu kaan sha kwagh u ayou a ken gar ne, kua ayou a utor mba Yuda a i yôhôl a sha ci u atihianyaagh man sanker la, nahan er:

⁵Mba van sha u nôngon ityav a Mbakaldi, kpa ka di sha u ivin a sha akom a ior tsô, mba M woo sha ishima Yam i vihin man sha iyugh Yam i tsung; gadia ka sha ci u ifer ve la cii, M yer gar ne ishigh Yagh ye.

⁶Nenge, Me va un a mkpeyol man mwar, Me bee ve angev; Me pase ve mngee u bem u been ga.

⁷Me gema mlu u Yuda man mlu u Iserael, Me maa ve er tsuaa nahan.

⁸Me wanger ve sha ifer ve cii, i ve erem yô; Me de ve aferakaa ve cii, a ve erem la, man mper u ve per atindi a Am kpaa yô.

⁹Tsô gar ne una hingir Mo iti i iember, man kwagh u iwuese man u icivirigh, sha ishigh ki akuraior a sha won cii, a aa ungwa akaadoon a M eren a ve la cii; man aa cia, aa gbidye akarkase iyol sha ci u akaadoon cii man mkpeyol cii mba M ne un la.

¹⁰TER ngu kaan nahan er: Sha ijiir ne, i ne kaan ner: Ka ice, or man zendenya ve lu her ga ne, ken agar a Yuda man sha igbenda i ken Yerusalem, u a hingir ice, or kera lu ga, or u teman her kpaa nan lu ga man zendenya kpaa ga, á shi á ungwa

¹¹imo i iember ker, man imo i sar sar, man imo i orkwasehe man imo i kwasehe man imo i mba ve kaan er: Wuese nen TER ka u akum a Sha, gadia TER ka u doon je, gadia erdoo Na ngu zan zan gbem sha won. Ka imo i mba ve ve a iniav mbi ishughun ken iyou i TER je la. Gadia Me gema mlu u tar la, ua hingir er tsuaa nahan, kape TER A kaa ne.

¹²TER u akum a Sha ngu kaan nahan er: Sha tar u u lu ice ne, or kera lu ga man zendenya kpaa ga, man ken agar a u la cii, shi ijiir i mbakuranilev i ve sôôso ilev her la, ia lu; ape vea er akumauile a ve a yav her yô.

¹³Ken agar a ken tar u Iwoogh man ken agar a ken tar u shin Pev man ken agar a ken tar u Imbusutarimese, man ken tar u Benyamin man ken iningirtar i Yerusalem kua ken agar a Yuda, akumauile shi aa kar sha ishigh ki u a er iyenge la, kape TER A kaa ne.

¹⁴Nenge, ayange nga van, kape TER A kaa ne, a Me kure kwaghôron u doon u M er sha ya u Iserael kua sha ya u Yuda la.

¹⁵Sha ayange la man sha shighe la Me na Gbaa u perapera Una ta hen Davidi; ka Un Una ôr ijiir sha mimi man Una er perapera shin tar ye.

¹⁶Sha ayange shon la á yima Yuda, man Yerusalem una tema bem bem; iti i á yila un a mi yô, er: TER ka perapera wase.

¹⁷Gadia kape TER A kaa ne, er: Or nana ban Davidi u nana tema sha ikônough ki torough ki ya u Iserael mayange ga;

¹⁸upristi mba ken nongo u Levi kpaa vea ban a or u nana̱ tile sha ishigh Yagh sha u nan iniav mbi nanden ga, man sha u nanden iniav mbi sha samuyia man sha u nan nagh ku sôngon ayange ayange la ga.

¹⁹Kwaghôron u TER shi va hen Yeremia er:

²⁰TER ngu kaan nahan er: Aluer nea fatyô u bunden ikuryan yam atetan man a tugh, je er tetan man tugh ve̱ de kera lu sha ashighe a ve ga yô,

²¹nahan á fatyô u bunden ikuryan Yam a Davidi, wanakiriki Wam, je er una kera lu a wan u nana̱ tema tor sha ikônough nagh ki torough ga yô; man a Mbalevi mba ve lu upristi, mbatomov Av la kpaa.

²²Er á fatyô u ôron akum a Sha ga nahan, man waarawa u zegemnger kpaa á fatyô u karen u ga, kape Me seer ingeegh ki vor u Davidi wanakiriki Wam kua Mbalevi mba ve eren Mo tom ne.

²³Tsô kwaghôron u TER va hen Yeremia, kaa er:

²⁴U ungwa kwagh u ior mban ve er, ve kaan er: Icombor ihiar i TER A tsough ne yô, A ta i kera, la kpa? Mba lahan ior Av je, kera mba ikurior sha ashe ve ga.

²⁵TER ngu kaan nahan er: Aluer M ya ikur a tugh man a tetan, M ver aeren a sha atindi atindi a Sha man a shin tar ga yô,

²⁶nahan vor u Yakob man u Davidi wanakiriki wam la kpaa Me gbihi u kera, je Me kera tôô or ken vor na u nana̱ tema tor sha vor u Aberaham man Isaka kua Yakob ga; gadia Me gema mlu ve la, Me zungwe ve mhôônom.