Read tiv Yeremia 36 Bible Online

Yeremia 36 - tiv bible

Yeremia 36

¹Tsô sha inyom i sha unyiin i Yehoyakim wan u Yoshia, tor u Yuda la yô, kwaghôron ne due hen TER va hen Yeremia, er:

²Tôô ihurenruamabera, nger akaaôron a M er u cii, sha Iserael man sha Yuda kua sha akuraior cii, hii sha iyange i M ôr a we la, hii sha ayange a Yoshia zan zan nyian ne.

³Alaghga ya u Yuda una ungwa kwaghbo u M we ishima u eren ve la cii yô, vea gema, hanmô ve nana undu gbenda u nan u bo sha u M̱ de ve ifer ve man isholibo ve yô.

⁴Tsô Yeremia yila Baruki wan u Neria; nahan Baruki nger akaaôron a TER, a A ôr un la cii, ken ihurenruamabera sha zwa u Yeremia.

⁵Nahan Yeremia kaa a Baruki er: Mo yô, i yangem, m fatyô u nyôron ken iyou i TER ga;

⁶nahan yô, we za, za ôr ken ihurenruamabera, u u nger sha zwa wam la, akaaôron a TER, sha ato a ior, ken iyou i TER, sha iyange i hôron kwaghyan; man shi ôr a sha ato a ior mba Yuda cii, mba ve dugh ken agar a ve kpaa.

⁷Alaghga zamber ve una gba hen ikum i TER, man vea gema, hanmô ve nana undu gbenda u nan u bo la; gadia ishima i vihin man iyugh i TER i A ter sha ior mban i gba ikôr.

⁸Nahan Baruki wan u Neria er kwagh u profeti Yeremia kaa un la cii, a gba ôron ken ruamabera akaaôron a TER la, ken iyou i TER.

⁹Tsô sha inyom i sha utaan i Yehoyakim wan u Yoshia, tor u Yuda la, sha uwer u sha utaankarunyiin la, ior mba ken Yerusalem cii, kua ior mba ve due sha agar a Yuda cii, ve va hen Yerusalem; ve yôô er, i̱ hôr kwaghyan sha ishigh ki TER.

¹⁰Nahan Baruki gema ôr akaaôron a Yeremia a ken ruamabera la ken iyou i TER, ken kpar u Gemaria wan u orngeren Shafan, sha tembe u sha, ape nyôron hen hunda u he u iyou i TER la, sha ato a ior cii.

¹¹Zum u Mikaia wan u Gemaria, wan u Shafan, ungwa akaaôron a TER ken ruamabera la yô,

¹²a sen shin iyou i tor, hen kpar u orngeren; man nenge, atiator cii gema tema lu her, ka orngeren Elishama, man Delaia wan u Shemaia, man Elnatan wan u Akebor, man Gemaria wan u Shafan, man Sedekia wan u Hanania kua atiator cii.

¹³Nahan Mikaia pase ve akaaôron a a ungwa la cii, zum u Baruki ôr ruamabera sha ato a ior la yô.

¹⁴Nahan atiator cii tindi Yehudi wan u Netania wan u Shelemia, wan u Kushi hen Baruki, ve kaa er: Ihurenruamabera u u er sha ato a ior la, tôô un va a mi. Nahan Baruki wan u Neria za tôô ihurenruamabera la je, va her a ve.

¹⁵Tsô ve kaa a na er: Tema ase inya, ôr un sha ato ase. Nahan Baruki ôr un sha ato a ve.

¹⁶Tsô zum u ve ungwa akaaôron la cii yô, ve gema ve kenger ayol a ve, cier ve iyol, ve kaa a Baruki er: Akaaôron ne cii sé ôr tor a kpee.

¹⁷Ve gema ve pine Baruki er: Shi ôr ase yôô, u er nan man u nger akaaôron ne cii sha zwa na nahana?

¹⁸Tsô Baruki gema kaa a ve er: Ka sha zwa na je a pasem akaaôron ne, ve m nger a sha inki ken ruamabera ye.

¹⁹Nahan atiator kaa Baruki er: Za, we kua Yeremia, za yer nen, or môm nana̱ de fe henpe ne lu ga.

²⁰Tsô ve za hen tor, ve nyôr ken kwa; kpa ve vande veren ihurenruamabera la ken iyou i orngeren Elishama; man ve ôr tor akaaôron la cii sha ato na je.

²¹Nahan tor tindi Yehudi er a̱ za tôô ihurenruamabera shon a̱ va a mi; tsô a za tôô un ken iyou i orngeren Elishama. Yehudi va ôr un sha ato a tor, man sha ato a atiator cii, mba ve tile a tor yô.

²²Tor gema tema ken iyou i teman ker sha shighe u wuhegh, uwer u sha utaankarunyiin; usu lu yeghen shin icenge sha ishigh nagh.

²³Tsô Yehudi una ôr ityange i ruamabera itiar shin inyiin yô, tor a tôndo i sha ihô a gema a gbihi sha usu u shin icenge la, zan zan ihurenruamabera la hia cii sha usu u shin icenge la.

²⁴Cier ve iyol ga, ve ande akondo a ve ga, tor kpaa ga, mô u ken mbatomov nav mba ve ungwa akaaôron la cii kpaa ga.

²⁵Kpa Elnatan man Delaia kua Gemaria yô, ve zamber a tor er a̱ de nanden ihurenruamabera la ga; kpa a wa ve iko her ga.

²⁶Tsô tor kaa Yerameel wan u tor, man Seraia wan u Aseriel, man Shelemia wan u Abadeel er, ve̱ kôr orngeren Baruki man profeti Yeremia; kpa TER yer ve.

²⁷Tsô kwaghôron u TER va hen Yeremia, er tor vande nanden ihurenruamabera u a lu a akaaôron a Baruki nger sha zwa u Yeremia la kera yô, er:

²⁸Shi tôô ihurenruamabera ugen, nger akaaôron a tsuaa la cii keregh, a a lu ken ihurenruamabera u hiihii la, u Yehoyakim tor u Yuda a nande la.

²⁹Man sha kwagh u Yehoyakim tor u Yuda la yô, kaa wer: TER ngu kaan nahan er: We, u nande ihurenruamabera ne, u kaa wer: Ka sha ci u nyi man u nger keregh wer: Tor u Babilon una va kpee, una tim tar ne, man una na or man zendenya vea bee ken u nahana?

³⁰Nahan yô, TER ngu kaan sha kwagh u Yehoyakim tor u Yuda la er: Una lu a ma or u nana tema sha ikônough ki torough ki Davidi ga; á ta ikom na kera, ia lu ken oo atetan, tugh ia lu ken wuhe.

³¹Me tsaha un man vor na kua mbatomov nav sha ci u iferkwagh ve, man me va a kwaghbo sha a ve man sha mba ve tem ken Yerusalem man sha ior mba Yuda, u lu M ter sha a ve la cii, kpa ve wa iko ga la.

³²Nahan Yeremia tôô ihurenruamabera ugen, na orngeren Baruki wan u Neria, wen gema nger akaaôron a ken ruamabera u Yehoyakim tor u Yuda nande sha usu la cii ker sha zwa u Yeremia, shi a seer akaaôron agen sha mi kpishi a sha inja i angara.