Read tiv Yeremia 38 Bible Online

Yeremia 38 - tiv bible

Yeremia 38

¹Tsô Shefatia wan u Matan, man Gedalia wan u Pashur, man Yukal wan u Shelemia, man Pashur wan u Malkia, ve ungwa kwaghôron u Yeremia lu ôron a ior cii la, er:

²TER ngu kaan nahan, er: U nana hanger akughul ken gar ne yô, nana kpe ku u sha sanker man u sha ijen kua u sha bouange kpaa; kpa u nana due nana za kohol Mbakaldi yô, nana lu uma, uma u nan kpaa una hingir nan er ka ishar nan ye yô, nana lu uma.

³TER ngu kaan nahan er: Á na gar ne sha ikev i mbautyav mba tor u Babilon kpee je, una ngohol un kpaa.

⁴Tsô atiator kaa a tor er: Ma i shi woo or ne; gadia ngu nan ishima ngi yinan mbautyav mba ve shi ken gar ne kua ior cii, er a lu ôron ambaakaa ne a ve yô; gadia or ne ngu keren mkpeyol sha ci u ior ne ga, saa mvihi tsô.

⁵Nahan tor Sedekia kaa er: Nenge, ngu sha ikev yen: gadia tor á fatyô u yangen ne kwagh ga.

⁶Tsô ve tôô Yeremia, ve gbihi un shin ijôr i Malkia, wan u tor, i i lu ken tembe u mbakuran la; ve hungwa a Yeremia sha ikor. Shin ijôr la mngerem lu ga, lu angbiôr tseegh; nahan Yeremia hungwa shin angbiôr.

⁷Kpa zum u Ebedi-meleki Oretiopia, ortom u ken ya u tor, ungwa er ve gbihi Yeremia ken ihungwa yô—hen shighe la tor tema ken Hundagar u Benyamin—

⁸nahan Ebedi-meleki due hen ya u tor, a gba ôron kwagh a tor kaan er:

⁹Terem tor, ior mban ve er kwaghbo sha ieren i ve er a profeti Yeremia la cii, er ve gbihi un shin ijôr yô, ngu kpen ijen henpe a lu la je; gadia ma kwaghyan kera ngu ken gar ga.

¹⁰Nahan tor na Ebedi-meleki Oretiopia, zwa, er: Tôô ior utar heen, za dugh profeti Yeremia shin ijôr er a lu a kpe ga ne.

¹¹Nahan Ebedi-meleki maa tôô ior mbala, a nyôr ken ya u tor shin atô a iyou i koson inyaregh, a tôô ajav a ikondo man abamber a ikondo a anden shimin, a iligh sha ikor, a kende shin ijôr za ar hen Yeremia.

¹²Tsô Ebedi-meleki, Oretiopia, kaa a Yeremia er, wa ajav a ikondo man abamber a ikondo a anden la ken akutsahagh a ou, huwa ikor sha mi; nahan Yeremia er nahan.

¹³Tsô ve dugh Yeremia sha ikor, ve dugh un shin ijôr; Yeremia maa lu hen tembe u mbakuran.

¹⁴Nahan tor Sedekia tindi, i za kua a profeti Yeremia i va a na her a na hen ijiir i nyôron i sha utar i ken iyou i TER la; tsô tor kaa a Yeremia er: Me pine u kwagh; de yeren mo ma kwagh ga.

¹⁵Nahan Yeremia kaa a Sedekia er: Aluer mea pase u un, ú wuam keng gaa? Man aluer mea wase u mhen kpaa, ú wan iko her ga.

¹⁶Nahan tor Sedekia bum a Yeremia ken myer er: Er TER u A ne se uma ne, A lu u uma ne, Me wua u ga man shi me na u sha ikev i ior mban mba ve keren uma wou kpaa ga.

¹⁷Nahan Yeremia kaa a Sedekia er: TER, Aôndo u akum a Sha, Aôndo u Iserael, ngu kaan nahan er: Aluer wea due iyol you je, wea za hen atiator a tor u Babilon yô, uma wou una war, man gar ne kpaa á kera nande un sha usu ga, wea lu uma, we kua ya wou je;

¹⁸kpa aluer u venda u duen zan hen atiator a tor u Babilon yô, nahan á na gar ne sha ikev i Mbakaldi, vea nande un sha usu, we kpaa ú war sha ikev ve ga.

¹⁹Tsô tor Sedekia kaa a Yeremia er: M ngu cian Mbayuda mba ve za kohol Mbakaldi la, sha er ve̱ de nem sha ikev ve, ve̱ nahan mo tar ga.

²⁰Kpa Yeremia kaa er: Vea na u sha ikev ve ga. Shi ungwa imo i TER, sha kwagh u m kaa u la, ka nahan man á kpe u iyol man uma wou kpaa una war ye.

²¹Kpa aluer u venda u duen zan yô— TER tesem nahan er:

²²Nenge, kasev mba ve shi ken ya u tor u Yuda cii, á due a ve, á za a ve hen atiator a tor u Babilon, man kasev mbala je vea kaa er: Ahuraior a ou la tsugh u, ve hemba u je; er angahar a ou a nyer shin angbiôr yô, ve gema ijime a we.

²³Á due a kasev ou cii kua mbayev ou, á va a mi hen Mbakaldi; man we kpaa ú war sha ikev ve ga, kpa uwegh ku tor u Babilon kua kôr u, man ka we je u na á nande gar ne sha usu ye.

²⁴Tsô Sedekia kaa a Yeremia er: Or môm môm nana̱ de fe kwaghôron ne ga, man ú kpe ga ye.

²⁵Kpa aluer atiator á ungwa aun er m er kwagh a we, man vea va her a we, vea kaa we er: Shi pase se kwagh u u kaa a tor yô; de yeren se ma kwagh ga, sé wua u ga; man tor yô, ôr u nyi?

²⁶Nahan ú kaa a ve wer: M va a zamber wam sha ishigh ki tor mer, a̱ de kera ne, i̱ hide a mo hen ya u Yonatan m̱ za kpe her ga.

²⁷Tsô atiator cii va hen Yeremia, ve va pine un; nahan a ôr ve sha akaa a tor kaa un la cii. Tsô ve de un; gadia kwagh la due ken igbar ga.

²⁸Nahan Yeremia tema ken tembe u mbakuran zan zan sha iyange i i ngohol Yerusalem la.