Read tiv Yeremia 39 Bible Online

Yeremia 39 - tiv bible

Yeremia 39

¹Tsô zum u i ngohol Yerusalem kera yô—sha inyom i sha utaankarunyiin i Sedekia tor u Yuda la, sha uwer u sha pue, Nebukadinesar tor u Babilon man akumautya na cii va ta num sha Yerusalem, ve kase un;

²sha inyom i sha pue kar môm i Sedekia, sha uwer u sha unyiin man iyange i sha utaankarunyiin i uwer la, i pev gilgar—

³atiator a tor u Babilon cii va nyôr, za tema hen hunda ker atô, lu Nergal-shareser man Samgar-nebo man rabesari Sarsekim, kua rabemagi Nergal-shareser, kua atiator agen a tor u Babilon cii.

⁴Tsô er Sedekia tor u Yuda kua mbautyav cii nenge a ve yô, ve yevese, ve due ken gar tugh, sha gbenda u ken sule u tor, sha hunda u u lu hen haregh u ukpekpe uhar la; ve yem gbenda u u ver ishigh hen Araba la.

⁵Kpa mbautyav mba Mbakaldi zenda ve ityô, za kohol Sedekia shin kpuun kpuun u Yeriko; mba ker un yô, ve kôndo a na hen Nebukadinesar tor u Babilon hen Ribela ken tar u Hamati, a ôr un ijir heregh.

⁶Nahan tor u Babilon wua ônov mba nomso mba Sedekia ken Ribela sha ashe na je; ashagbaior a Yuda cii kpaa, tor u Babilon wua ve,

⁷man shi a ongor Sedekia ashe, man a kange un sha mshirim ma togula sha u yemen a na sha Babilon.

⁸Ya u tor kua uya mba ior mbagenev kpaa, Mbakaldi nande sha usu, man ve yôhôl gilgar u Yerusalem kpaa.

⁹Asande a ior a a shi her la, Nebusaradan orhemen u mbakurantor yem a ve uikangen sha Babilon.

¹⁰Kpa mbaatsanev mbagenev, mba ve lu a ma kwagh ga yô, Nebusaradan orhemen u mbakurantor undu ve ken tar u Yuda, a na ve ishule i kon i wain man ishule igen sha iyange shon la je.

¹¹Man Nebukadinesar tor u Babilon, na Nebusaradan, orhemen u mbakurantor, zwa sha kwagh u Yeremia er:

¹²Kua a na, ver ishima sha a na dedoo, de eren un ma kwaghvihin ga; ka kwagh u una kaa u la, er un ye.

¹³Nahan Nebusaradan, orhemen u mbakurantor, man rabesari Nebushaseban, man rabemagi Nergal-shareser, man mbahemenev mba tor u Babilon cii

¹⁴ve tindi, i za kua a Yeremia ken tembe u mbakuran, ve gema un ve wa sha ikev i Gedalia wan u Ahikam, wan u Shafan, sha u a̱ yem a na hen ya; nahan a hingir u teman a ior imôngo.

¹⁵Kwaghôron u TER shi va hen Yeremia er a lu hen tembe u mbakuran henpe i wuhe un la, er:

¹⁶Za, za ôr kwagh a Ebedi-meleki, Oretiopia la, wer: TER u akum a Sha, Aôndo u Iserael, ngu kaan nahan er: Nenge, Me er akaa a M ter sha gar ne, ka a bo, ka a dedoo ga, aa va er sha ashe ou sha iyange shon la.

¹⁷Kpa Me yima u sha iyange la, kape TER A kaa ne, á na u sha ikev i ior mba ve cier we iyol la ga.

¹⁸Gadia Me yima u kpee je, ú kpe ku u sha sanker ga, kpa uma wou una hingir we er ka ishar u ye yô; sha ci u u suur sha a Mo yô, kape TER A kaa ne.