Read tiv Yeremia 42 Bible Online

Yeremia 42 - tiv bible

Yeremia 42

¹Nahan mbahemenev mba mbautyav cii, man Yohanan wan u Karea man Yesania wan u Hoshaia man ior cii, hii sha u kiriki zan zan ar sha u vesen kporom,

²ve kaa a profeti Yeremia er: Zamber wase a̱ shi gba u hen ikum, sôn TER, Aôndo wou, sha ci wase sha ci u asande a ior a a shi her ne, gadia ikpelaior ne nahan, se mase shin her kpeghee tsô, er ashe ou kpaa a lu nenge se nahan;

³sha er TER, Aôndo wou, A̱ tese se gbenda u se̱ za sha mi, man kwagh u se̱ er yô.

⁴Tsô profeti Yeremia kaa a ve er: M ungwa ve; nenge, me sôn TER, Aôndo wen, er ne kaa nahan; man hanma kwagh u TER Una kaa ne cii, me pase ne, me yer ne ma kwagh ga.

⁵Nahan ve gema ve kaa a Yeremia er: TER A̱ hingir shiada u mimi man u jighjigh, u nan se ibo, aluer sea kera er sha kwaghôron u TER, Aôndo wou, A tindi u a mi her a vese la cii vough ga yô.

⁶Shin á lu u dedoo shin á lu u bo kpaa, sé ungwa imo i TER, Aôndo wase, u se tindi u her a Na yô, sha u á kpe se iyol, zum u sé wa imo i TER, Aôndo wase, iko yô.

⁷Tsô ayange nga kar pue yô, kwaghôron u TER va hen Yeremia.

⁸Nahan a yila Yohanan wan u Karea, man mbahemenev mba mbautyav cii mba ve lu a na imôngo la, man ior cii, hii sha u kiriki zan zan ar sha u vesen,

⁹a kaa a ve er: TER, Aôndo u Iserael, u ne tindim her a Na ner, m̱ za a zamber wen hen ishigh Nagh la, ngu kaan nahan er:

¹⁰Aluer nea tema gil gil ken tar ne yô, nahan Me maa ne, Me yôhôl ne ga, Me môôr ne, Me wuhe ne ga; gadia M vaa afanyô sha kwaghvihin u M er ne la.

¹¹De cie nen tor u Babilon, u ne cie un la ga; de cie un ga kape TER A kaa ne; gadia Mo M ngu a ven sha u waren ne, man sha u yiman ne sha ikev na.

¹²Me na, né kôr un mhôônom, una zungwe ne mhôônom, man una de ne, né tema hen tar wen.

¹³Kpa aluer né kaa ner: Sé kera tema ken tar ne ga yô, nahan ne kera wa imo i TER, Aôndo wen, iko ga ve;

¹⁴nea kaa ner: Ei; kpa ka ken tar u Igipiti sé yem ye, henpe sé kera nenge a ityav ga, man sé ungwa imo i ikpamkor ga, man shi ijen i kwaghyan kpaa ia kera kôr se ga; ka keela je sé za tema ye:

¹⁵yô, hegen ungwa nen ase kwaghôron u TER, ne asande a Yuda a a shi her ne; TER u akum a Sha, Aôndo u Iserael, ngu kaan nahan er: Aluer nea ver ishigh u nyôron ken Igipiti kpee, man nea yem nea za tema shir keela yô,

¹⁶nahan sanker u ne cie un la, una za kohol ne keela ken tar u Igipiti je; man ka keela nea kpe kpaa ye.

¹⁷Kape nomso mba iorov mba ve ver ishigh u zan ken Igipiti sha u za teman shir ker la cii, vea kpe ku u sha sanker man ijen kua bouange la; ma or ve môm nana shi, shin nana war kwaghbo u Me va a mi sha a ve la ga.

¹⁸Gadia TER u akum a Sha, Aôndo u Iserael, ngu kaan nahan er: Er i hee ishima Yam i vihin man iyugh Yam sha mba ve tem ken Yerusalem nahan, kape á haa iyugh yam sha a ven je la, zum u nea nyôr ken Igipiti yô; nea hingir kwagh u i we un ifan, man kwagh u cieryol, man ityuhwanev, man kwagh u aheenegh; man nea kera nenge ijiir ne mayange ga.

¹⁹TER ôr kwagh a ven ve, ne asande a Yuda a a shi her ne: De ze nen ken Igipiti ga; fa nen doo doo, m wa ne kwagh nyian ve,

²⁰gadia ne tsume je ne vihi uuma enev kera; gadia ne tindim hen TER, Aôndo wen, ner: Sôn TER, Aôndo wase, sha ci wase, kwagh u TER, Aôndo wase, Una ôr cii yô, pase se, sé er un.

²¹M pase ne un nyian ve, kpa ne wa imo i TER, Aôndo wen, iko sha ma kwagh u A tindim a mi her a ven ga.

²²Hegen yô, fa nen dedoo, né va kpe ku u sha sanker man ijen kua bouange, ken ijiir i ne ver ishima u né za tema shir ker la.