Read tiv Yeremia 44 Bible Online

Yeremia 44 - tiv bible

Yeremia 44

¹Kwaghôron ne va hen Yeremia sha kwagh u Mbayuda mba ve tema ken tar u Igipiti cii, ka mba ve tema ken Migedol man ken Tahapanheshi man ken Nofe man ken tar u Pateroshi je la, er:

²TER u akum a Sha, Aôndo u Iserael, ngu kaan nahan er: Ne ayol an en je, ne nenge kwaghbo la cii, u M ve a mi sha Yerusalem kua sha agar a Yuda cii; nenge, ve hingir atse nyian, ma or kera tema ker ga,

³sha ci u iferkwagh ve, i ve er, ve bamem, ve za nande nagh, ve civir mbaaôndo mbagenev, mba ve fe ve ga la, shin ve, shin ne, shin uter enev kpaa.

⁴Nahan kpaa M tindi ne a mbatomov Av cii, uprofeti, pepe kua aikighe Mer: Shi de eren nen kwagh u ndôhôrshima ne, u uma Wam a nyagh un la ga.

⁵Kpa ve wa iko ga, man shi ve ver ato sha u geman undun iferkwagh ve, er vea de u nanden mbaaôndo mbagenev nagh la ga.

⁶Ka sha ci u nahan man ishima Yam i vihin man iyugh Yam i ve, i gbe yeghen sha agar a Yuda man sha akômaigbinda a Yerusalem ye; a hingir atse man taaikôngo er i lu nyian nahan.

⁷Hegen yô, TER, Aôndo u akum a Sha, Aôndo u Iserael, ngu kaan nahan er: Ka sha ci u nyi man ne eren zegeiferkwagh ne vihin uuma enev ayol a en, ne timin nomsoor man kwase man wanye kua wan u sha ikum ken Yuda je, ne kera shi ma or ga,

⁸er ne bamem sha aeren a ave a en, ne nanden mbaaôndo mbagenev nagh ken tar u Igipiti, henpe ne ze u za teman shir la, sha u i̱ tim ne kera man ne̱ hingir akuraior a shin tar cii kwagh u ityuhwanev man kwagh u aheenegh nahana?

⁹Aferakaa a uter enev, man aferakaa a utor mba Yuda, man aferakaa a kasev vev, man aferakaa a en ayol a en, man aferakaa a kasev enev, a ve er ken tar u Yuda kua sha akômaigbinda a Yerusalem la a hungul ne ve shinii?

¹⁰Zan zan nyian je mba a var inya ga, man shi mba cian ga, man mba zenden sha atindiakaa a Am kua akaawan a Am kpaa ga, a M ver ne kua uter enev sha ishi la.

¹¹Nahan yô, TER u akum a Sha, Aôndo u Iserael, ngu kaan nahan er: Nenge, M gema ishigh M ver sha aven ka sha u eren ne kwagh u vihin, ka sha u timin Yuda cii kera.

¹²Me kura asande a Yuda a a shi her a a ver ishigh u zan ken tar u Igipiti sha u za teman shir keregh la kera, ve cii vea saa ishe ken tar u Igipiti; vea kpe ku u sha sanker, ijen ia wua ve, hii sha mbakiriki zan zan ar sha mbavesen; vea kpe ku u sha sanker kua ijen vea hingir kwagh u i we un ifan man kwagh u cieryol man kwagh u ityuhwanev man kwagh u aheenegh.

¹³Gadia Me tsaha mba ve tem ken tar u Igipiti, er lu M tsaha Yerusalem nahan, sha sanker man sha ijen kua bouange;

¹⁴nahan ma or u ken asande a Yuda, a a ze ken tar u Igipiti sha u za teman shir ker, nana war ga, shin nana shi her, sha u hiden ken tar u Yuda, henpe i sar ve u hiden man u teman ker la kpaa ga; gadia vea hide ga, saa mbayevese môm môm la.

¹⁵Nahan nomso cii mba ve fe er kasev vev lu nanden mbaaôndo mbagenev nagh, kua kasev cii mba ve til heregh, ikpelaior kpishi, ka ior mba ve tem ken tar u Igipiti ken Pateroshi cii je la, ve gema ve kaa a Yeremia, er:

¹⁶Sha kwaghôron u u ôr se ken iti i TER la, sé wa u iko ga.

¹⁷Kpa se yô, hanma kwaghôron u a dugh se ken zwa yô, sé er un kpee je, sé nanden torkwase u Sha nagh, shi sé toon un iniav mbi man er se vande eren nahan, se kua uter asev man utor asev kua mbatarev asev, ken agar a Yuda man sha igbenda i Yerusalem; gadia hen shighe la se lu a kwaghyan kpishi man se lu doo doo, se nenge kwaghbo ashe ga.

¹⁸Kpa er se de u nan torkwase u Sha la nagh man u toon un iniav mbi man yô, se ban akaa cii man se tim sha sanker kua ijen.

¹⁹Man zum u se lu nanden torkwase u Sha nagh, man se lu toon un iniav mbi man la, kera lu sha mrumun u noov asev se lu kaan un ukuese mba ve lu er eev nav la nahan, man se lu toon un iniav mbi man gaa?

²⁰Nahan Yeremia kaa a ior cii, nomso kua kasev, mba ve na un imo ne cii er:

²¹Nagh ku ne lu nande ken agar a Yuda, man sha igbenda i Yerusalem la, ne man uter enev man utor enev, man atiator a en kua ior i hen tar la, TER kera umbur ku gaa, man kwagh shon nyôr Un ken ishima gaa?

²²Zan zan TER kera fatyô u wan ishima ga, sha ci u iferkwagh i aeren a en, man sha ci u akaa a ndôhôrshima a ne er la; ka sha ci u nahan tar wen hingir ice, man kwagh u cieryol man kwagh u ityuhwanev, or kera tema ker ga ye, er i lu nyian nahan.

²³Sha ci u ne nande nagh, man sha ci u ne er TER isholibo man ne wa imo i TER iko ga, man shi ne zende sha atindiakaa Na ga, man sha akaawan a Na, kua ushiada Nav kpaa ga; ka nahan man kwaghbo ne a tser ne ye, er i lu nyian nahan.

²⁴Shi Yeremia kaa a ior cii, kua kasev cii er: Ungwa nen kwaghôron u TER, ne Mbayuda mba ne lu ken tar u Igipiti cii,

²⁵TER u akum a Sha, Aôndo u Iserael, ngu kaan nahan er: Ne man kasev enev, ne ôr kwagh sha zwa wen shi ne kure un sha ave a en kpaa, ne mba kaan ner: Se kure mbambum asev mba se bum ser, sé nanden torkwase u Sha nagh man sé toon un iniav mbi man la kpee je; nahan yô, gba taver nen ishima sha mbambum enev tsô, man kure nen ve kpaa.

²⁶Nahan yô, ungwa nen kwaghôron u TER, ne Mbayuda mba ne tem ken tar u Igipiti cii; nenge, M bum sha iti Yam i vesen, kape TER A kaa ne, ma or u Yuda ken tar u Igipiti cii, nana kera ter iti Yam nana kaa er: Er Ter AÔNDO A lu u uma ne, ga.

²⁷Nenge, M ngu kuran ve sha u eren ve kwagh u bo, ka u dedoo ga; ior mba Yuda cii, mba ve lu ken tar u Igipiti ne, á tim ve sha sanker man sha ijen, zan zan je vea kar been.

²⁸Mba ve wer sanker, mba vea due ken tar u Igipiti, vea hide ken tar u Yuda yô, vea lu ior kpeghee tsô; man asande a Yuda cii a a yem ken tar u Igipiti sha u za teman shir ker la, vea fa kwaghôron u una tile her yô, shin á lu u Wam, shin á lu u ve.

²⁹Kwagh ne una hingir ne ikav, kape TER A kaa ne: Me tsaha ne ken ijiir ne, sha u ne̱ fa er kwaghôron Wam una tile her, sha u eren ne kwagh u bo yô;

³⁰TER ngu kaan nahan er: Nenge, Me gema Farao Hofera tor u Igipiti Me na un sha ikev i mbaihomov nav, man sha ikev i mba ve keren uma na la, er M na Sedekia tor u Yuda sha ikev i Nebukadinesar tor u Babilon, orihom na, u a lu keren uma na la nahan.