Read tiv Yeremia 8 Bible Online

Yeremia 8 - tiv bible

Yeremia 8

¹Sha shighe la, kape TER A kaa ne, vea dugh akuhe a utor mba Yuda shin iwar ve, akuhe uityombaiorov nav, man akuhe a upristi man akuhe a uprofeti, man akuhe a mba ve tem ken Yerusalem,

²man vea gbulugh a sha ishigh ki iyange man ki uweregh kua ki akum a Sha cii, a a doo ve ishima man ve eren a tom, shi ve dondo sha a man ve keren a, man ve gur a inya kpaa la; á kohol akuhe la ga, man shi á ii a kpaa ga, aa hingir ihôghonov mbi sôron sule a min hen inya sha tar la.

³Asande a tsombor u bo cii, a a shi her la, uma a ku yô, ku ua lu ve guda, ka mba ve wer ken ajiir a M zende ve cii je la, kape TER u akum a Sha A kaa ne.

⁴Man shi kaa a ve wer: TER ngu kaan nahan er: Aluer or á gba yô, nana kera mough sha gaa? Shin or á kaha á undu gbenda yô, nana kera hide ga ase?

⁵Ka sha ci u nyi je ior mba Yerusalem mban mhirjime ve a lu mhirjime u gbemee? Ve kôr icugh gbang, ve venda u hiden.

⁶M ver ato, M ungwa; mba ôron kwagh vough ga; ma or nan vaa afanyô sha ci u isholibo i nan ga; ka ve kaa er: Ka nyi m ere? Hanma or je, nan kôr gbenda u nan, er nyinya u a nur ayem sha u zan ken utya yô.

⁷Ôô-ôô u sha aôndo je kpaa, fa ashighe na; man atii man gbargbar man hulô mba we iko sha shighe u mve ve, kpa ior Av yô, ve fa tindi u TER ga.

⁸Ka nyi man ne kaan ner: Se mba mbafankwagh je, man tindi u TER ngu a vese? Kpa nenge, pensel u aiegh u mbangeren ngu eren tom u aiegh.

⁹Mbafankwagh va ahenge, kunda ve iyol, i kôr ve; nenge, ve venda kwaghôron u TER; nahan ka hanma inja i kwaghfan je ve lu a mini?

¹⁰Nahan Me gema kasev vev Me na ior mbagenev, ishule ve kpaa Me na mba ve hembe ve ityav yô; gadia hanmô ve cii, hii sha u kiriki zan zan ar sha u vesen, maa ve iyol sha mtsera u dang; man hii sha profeti zan zan ar sha pristi kpaa, hanmô ve cii, nan ngu eren kwagh sha icugh.

¹¹Mba nenge pe been wankwase u ior Av angev sha sha tseegh mba kaan er: Bem, bem! Kpa bem ngu ga.

¹²Ve va ahenge sha ci u ve er kwagh u ndôhôrshima yô; nahan kpaa kunya ngu ken ve côhin je ga, gadia ve fa ahenge a van kpaa ga; nahan yô, vea gba a mbagban imôngo; sha shighe u Me va tsaha ve la, vea nôngo gbev, kape TER A kaa ne.

¹³Me kohol ve, Me kura kera, kape TER A kaa ne; atam a wain kera nga sha kon u wain ga, man atam a tur kpaa kera nga sha kon u tur ga, ika kpaa ngi usen kera; akaa a M ne ve yô, nga karen her a ve kera.

¹⁴Ka nyi man se gbe teman tsôô? Kohol nen, sé nyôr nen ken agar a lun a ugir, sé za kpe nen ker; gadia TER, Aôndo wase, A na, se saa ishe, man A na se mngerem ma meghem er, se̱ ma, sha ci u se er TER isholibo yô.

¹⁵Se mba veren ashe ser, bem a̱ va, kpa ma kwagh u dedoo va ga; man sha ayange a mwar, kpa nenge, gema ka mkondoyol!

¹⁶Hii hen Dan mba ungwan m-osoahenga u anyinya; sha mngor u imo a mbaageev nav la, tar cii gbidye akarkase iyol; ve va, mba va yan tar kua akaa a a lu ken u cii, gar kua mba ve tem ker yô.

¹⁷Gadia nenge, Me tindi iyô i vihin kwagh ken a ven, i i we iko sha imo i mbanumben a i ga yô, ia nyuma ne, kape TER A kaa ne.

¹⁸Ma m sur ishima yam, ishima i vihin ma i pandem kera! Ishima hingir mo ker dang je.

¹⁹Ungwa! Imo i mlia i wankwase u ior Av ken tar u icaa tsung je; TER kera ngu ken Shion gaa? Tor na kera ngu keregh gaa? Ka nyi man ve bamen Mo sha ieev vev mbi gban man sha akaagbilinigh a tar ugene?

²⁰Sunda kar kera, inyom bee ve, kpa se yô, se zua a mwar ga.

²¹Sha mvihi u i vihi wankwase u ior av kera la, ishima vihim kpen kpen; m zungwe, kondom iyol.

²²Ma balsem kera ngu ken Gileadi je gaa? Ma ortwer kera ngu keela gaa? Ka nyi man angev mbu wankwase u ior av mbu been ga nahana?