Read tiv Ukwelegh 3 Bible Online

Ukwelegh 3 - tiv bible

Ukwelegh 3

¹Ka mo or u m nenge a ican sha akpa u iyugh Na je ne;

²A yem a mo, A na m zende ken ime, ape iwanger lu ga yô.

³Mimi je A shi geman uwegh Nagh didi sha u eren mo ican.

⁴A er inyam yam man kwav wam ve ndahar, A sombo akuhe am,

⁵A maa igyar, A kasem sha zarmle man ican.

⁶A erem m tsa ken ajiir a imegh, er mba ve kpe ica i gbe yô.

⁷A maa igyar, A kasem sha u m̱ de fetyô u duen ga yô; A haam mshirim ma yuhwan;

⁸shin er m vaa, m ker iwasen kpaa, A ungwa msen wam ga;

⁹A maa igyar, A kondo igbenda yam sha awen a kuan, A er igbenda yam i hure.

¹⁰Ngum er dwem u a uv a keghen kwagh nahan, man er begha ken ajiir a yeren nahan.

¹¹A goom a igbenda yam kera, A andem avur avur, A gemam, m hingir kundaa.

¹²A henda ada Na, A verem m hingir ishor i keren sha ivaan.

¹³A na avaan a ken gbande Na pevem ahi.

¹⁴M hingir kwagh u nahan tar hen ior av cii; man icam ve i lahan i shin wan didi.

¹⁵A ivim a akaayuan, A idem sha kon u yuan.

¹⁶A hembem anyi sha agboghol, a erem m shar shin mtwe.

¹⁷U kar a uma wam hen bem kera; mkpeyol hungul mo.

¹⁸M kaa mer: Agee am saa ishe, ishimaverenkeghen yam sha TER kpaa saa.

¹⁹Umbur ican yam man ijende yam i wue wue, kon u yuan man zarmle!

²⁰Uma wam ngu umbur ve her gbem, a var inya ker a mo.

²¹Kwagh ne m ngu umbur un, nahan m ngu a ishimaverenkeghen:

²²Ka sha erdoo u TER man i tim se ga ye, sha ci u mhôônom Nam ma zungwen ma been mayange ga,

²³ve mba hegh hanma sev; jighjigh Wou gba ikôr.

²⁴TER ka kwar wam, kape uma wam a lu kaan ne; nahan yô, ishimaverenkeghen yam ia lu sha a Na.

²⁵TER eren dedoo a mba ve veren ishima sha a Na, a uma u a keren Un la.

²⁶Doo u or nana ver ishima nana kegh myom u TER ving.

²⁷Doo u or nana tôô igbur er nan lu iyev la je.

²⁸Nana̱ tema tswen, nana̱ huan ving, zum u A penda nan i yô.

²⁹Nana̱ wa zwa u nan shin vuulevu; alaghga ishimaverenkeghen ia lu!

³⁰Nana̱ gema uasegh hen or u gbidyen nan; nana̱ ide sha aheen.

³¹Gadia TER Una ta or kera zan zan gbem ga.

³²Gadia shin er A na ishima i vihin, nahan kpaa mhôônom maa kôr Un sha mngee u erdoo Na la.

³³Gadia ka ishima Na u eren ônov mba iorov ican man u vihin ve ishima kpaa ga.

³⁴U ndyaren mbauikangenev mba shin tar cii shin angahar,

³⁵u geman ishô i or sha ishigh ki Uhembansha,

³⁶u nzughul a or sha ijir i nan yô, Ter rumun ga.

³⁷Ka anti nana kaa kwagh, man á kure sha mi aluer TER ngu a na zwa ga yôô?

³⁸Ka ken zwa u Uhembansha kwagh u bo man kwagh u doon ve dugh ye gaa?

³⁹Ka sha ci u nyi man or u uma nan hon iker sha ci u mtsaha u asorabo a nanaa?

⁴⁰Sé time nen sé kar igbenda yase, man shi sé hide nen hen TER.

⁴¹Sé kende nen asema ase man ave ase hen Aôndo u Sha.

⁴²Se per atindi, se hendan; U de se kwaghbo ga.

⁴³U cir iyugh iyol, U tôv se ityô; U wua, u zungwe mhôônom ga.

⁴⁴U cir ibeenegh iyol, sha u ma msen a̱ de kera karen aren her a We ga yô.

⁴⁵U gema se se hingir ingbôrakembegh man ihôghonov ker atô u akuraior.

⁴⁶Mbaihomov asev cii aver zwa gbanger sha a vese.

⁴⁷Mciem man ihungwa i hônon va ta sha a vese, mvihi man mtim kpaa.

⁴⁸Mliam ndôôr mo ashe er ukungômbamngerev nahan, sha ci u mtim u wankwase u ior av.

⁴⁹Ishe yam haa mliam, tôndo ga, i mem kpaa ga,

⁵⁰zan zan TER shir ashe Sha, kenger shin inya nenge.

⁵¹Ishe yam ngi nan uma wam ican sha ci u ônkasev mba ken gar wam cii.

⁵²Ve zendam tsung er ka inyon nahan, ve mba ve lu mbaihomov av, a ityôikaa ga la.

⁵³Ve tim uma wam kera shin ijôr ve gema awen ve haa sha mo.

⁵⁴Mngerem uvem ityough; tsô m kaa mer, m saa ve.

⁵⁵M yila sha iti You, TERE, shin ihungwa i zan.

⁵⁶U ungwa imo yam; de kera cirin togh Ough sha u ungwan iôôn yam man mliam am kpaa ga.

⁵⁷U va ikua ikua sha iyange i m yila U; U kaa wer: De cie ga.

⁵⁸TERE, U ta ikaa ken a mo, u paa uma wam.

⁵⁹TERE, U nenge kwaghbo u i erem ne; ôr ijir yam.

⁶⁰U nenge iyev ve i oron cii, man mbaawashima vev mba ve we sha a mo cii.

⁶¹U ungwa iheen ve, TERE, man mbaawashima vev mba ve we sha a mo cii,

⁶²ka ityumbujôôgh i mbahendan a mo, man mhen ve u ve shi henen sha a mo didi la.

⁶³Yô, kenger ve, mtem ve man mmough ve; m hingir ve icam i sha ilyahan.

⁶⁴Ú va or ve iyev, TERE, sha inja i tom u ave ve.

⁶⁵Ú cighir ve ishima, ifan You ia lu sha a ve.

⁶⁶Ú tôv ve ityô sha iyugh man Ú tim ve, shin atô a Usha mba TER.