Read tiv Ukwelegh 4 Bible Online

Ukwelegh 4 - tiv bible

Ukwelegh 4

¹Nenge, er zenaria a hingir cing yô, zenaria u mimi gema hingir kposo! I tsenda awen a icighanjiir sha ityough ki hanma gbenda.

²Ônov mba Shion mba injaav, mba i kar ve sha zenaria u wang ne, nenge, i kenger ve, ve hingir er mbaagu mba inyaav nahan, tomaveegh u ormaantyegh.

³Ugbaseela kpaa mba nan ônov vev atumba, sha u ve̱ ambe, kpa wankwase u ior av yô, mhôônom kôr un ga er ukonkofi mba ken taaikôngo nahan.

⁴Nombor u wanikundan u man atumba var un sha ikighô sha ci u imura; anmbayev mba sônon kwaghyan, kpa ma or ngu nan ve ga.

⁵Mba lu ve yaan akaadoon la, mba saan ishe sha gbenda; mba lu iyese ve sha murufu la, mba yaven sha atihi a uihôgh.

⁶Gadia iferkwagh i wankwase u ior av kehe hemba kwaghbo u Sodom, u i yôhôl un kera fese, ma or za ave sha mi kpaa ga la.

⁷Mbainjaa nav wanger je hemba senou, ve kungu je hemba atumba, ve nyian ayol je hemba ukorali, mluyol ve lu er safir nahan.

⁸Mluashe ve ile hemba akausu; i kera fa ve sha igbendagar ga; kwav ve var ve ken akuhe, u uma, hingir er kon nahan.

⁹Guda mba i woo ve sha sanker, a mba ijen i woo ve la, mba ve use, i kuma ve due kera, sha ci u mban u iyiav mbi ken sule yô.

¹⁰Ave a kasev mba ve lu asema legh legh la jiidi ônov vev, ve hingir kwaghyan ve je sha mtim u i tim wankwase u ior av kera la.

¹¹TER kure ishima i vihin Na la cii, A haa iyugh Na i tsung la; A keer usu ken Shion, u u hie amagh a na.

¹²Utor mba shin tar man ior mba sha won cii na jighjigh er, orhendan man orihom vea nyôr hen ihinda i Yerusalem ga.

¹³Lu sha ci u asorabo a uprofeti nav man afer a upristi nav, mba ve haa awambe a mba perapera inya ken atô na yô.

¹⁴Ve zende ze ze ze er mbaapirashe nahan sha igbenda ken igbenda i gar, ve hôngor sha awambe je or kera fatyô u benden akondo a ve ave ga.

¹⁵Yem nen kera! Wanger ga! Kape ior lu geren ve akenge la, kar nen sha, kar nen sha, de kera benden nen ave ga! Zum u ve yevese man ve hingir mbazenden wue wue yô, ior mba ken akuraior kaa er: ve̱ de kera shi tem heen ga.

¹⁶Ishigh ki TER sambe ve kera, Una kera wa ve iko ga. Ior kera civir upristi ga, mbatamen kpaa i zungwe ve mhôônom ga.

¹⁷Ashe ase nga vihin sha u keghen iwasen, kpa ka gbilin tsô; sha mkegh wase, se kegh ikurior i ia fatyô u yiman se ga yô.

¹⁸Ve tôv se angahar zan zan je se kera fatyô u karen sha ityembe i gar wase ga; mkur wase mgbôghom, ayange ase iv, mkur wase va ve.

¹⁹Mbatôvon se ityô ve zende fefa hemba ugafa mba purugh sha kwavaôndo, ve dondo se ijime sha iwo, ve kegh se ken taaikôngo.

²⁰Iôôn i ahenga ase, un u TER A shigh un mkurem la, ve kôr un shin ahungwa a ve, u se fa ser, ka ken mure na sé tema ken akuraior ye.

²¹Ember, lu saan saan, we wankwase u Edom, we, u u tem ken tar u Ushi; we kpaa, iyongo ne ia kar ia ar her a we, ú ma, ú hunde, ú er ikondo kera iyol you, ú hingir idyelegh.

²²Mtsaha u iferkwagh you kure ve, we wankwase u Shion; shi Una kera kimbir yemen a we ken uikangen ga; Una tsaha u sha iferkwagh you, we wankwase u Edom, Una tese asorabo a ou ken igbar.