Read tiv Esekiel 11 Bible Online

Esekiel 11 - tiv bible

Esekiel 11

¹Tsô Jijingi kendem sha, A va a mo hen hunda u iyou i TER, u sha ityoughkitaregh u u ver ishigh sha ityoughkitaregh la; nenge, hen kpehunda la ior lu ikundu kar utaan, m nenge Yaasania wan u Asur ker atô ve kua Pelatia wan u Benaia, atiator.

²Man A kaa a mo er: Wan u or, ka ior mba ve henen iferkwagh je ne, mba ve ne mhen u bo ken gar ne.

³Mba kaan er: Ka a kuma pe maan ayou ga; gar ne ka ityegh je, man se gema se mba inyam.

⁴Sha ci u nahan yô, ôr kwaghôron u profeti sha a ve, ôr kwaghôron u profeti, we wan u or.

⁵Tsô Jijingi u TER gba sha a mo, A kaa a mo er: Kaa wer: TER ngu kaan nahan er: Kape ne kaa ne, we, ya u Iserael; M fa akaa a a nyer ne ken ishima cii.

⁶Ne wua ior ngee ken gar ne, ne iv igbenda na a mba i woo ve yô.

⁷Nahan yô, Ter AÔNDO ngu kaan nahan er: Ior mba ne woo ve ker atô gar la, ka ve ve lu inyam ye, man gar ne di gema ka ityegh; ne yô, Me due a ven ker atô na kera.

⁸Ne cia sanker, kpa ka sanker Me va a mi sha a ven ye, kape Ter AÔNDO A kaa ne.

⁹Me due a ven ker atô na kera, Me gema ne, Me na sha ikev i ikurior igen, Me ôr ne ijir Me tsaha ne.

¹⁰Á wua ne sha sanker; Me ôr ne ijir ken tar u Iserael; man nea fa er Mo M lu TER ye.

¹¹Gar ne una lu ityegh yenegh ga, man ne kpaa né lu inyam ker atô na ga; Me ôr ne ijir ken ikighirtar i Iserael,

¹²man nea fa er Mo M lu TER ye; gadia ne zende sha akaawan a Am ga, man shi ne er sha akaaôron a jirigh a Am kpaa ga, kpa ne er sha aeren a akuraior a a kase ne la.

¹³Tsô er m lu ôron kwaghôron u profeti yô, Pelatia wan u Benaia maa kpe. Nahan m gure m kuma ishigh inya, m genger imo, m kaa mer: Uwu! Tere, AÔNDO! Ú bee asande a Iserael a a shi her ne purututu?

¹⁴Kwaghôron u TER va her a mo, er:

¹⁵We wan u or, ka anmgbianev ou, anmgbianev ou je, ityô you man ya u Iserael cii, ve cii, ka ve je man mba ve tem ken Yerusalem ve kaa a ve er: Mough yem nen ca a TER; ka se i ne se tar ne er u̱ lu u wase ye.

¹⁶Nahan yô, kaa wer: Ter AÔNDO ngu kaan nahan er: Shin er M yem a ve ca ken akuraior, man shi M sambe ve sha ityar ityar sha won, nahan kpaa, M hingir ve icighanjiir sha anyangem kpeghee sha ityar i ve yem ker la.

¹⁷Sha ci u nahan yô, kaa wer: Ter AÔNDO ngu kaan nahan er: Me kohol ne ken akuraior, Me due a ven ken ityar i i sambe ne ker la, Me na ne tar u Iserael.

¹⁸Vea hide heregh, vea due a akaa a hôngorough a u, kua akaa a ndôhôrshima cii, ken u kera.

¹⁹Me na ve u lun ishima i môm, Me ver jijingi u he ker a ve; Me dugh iwenshima ken iyol ve kera, Me na ve ishima i inyam;

²⁰sha u vea zende sha akaawan a Am man vea waan akaaôron a jirigh a Am iko, vea er sha a yô; vea hingir ior Av, Mo kpaa Me lu Aôndo ve.

²¹Kpa ve, mba ishima ve i ze sha akaa a ve a hôngorough man akaa a ve a ndôhôrshima yô, Me va a gbenda ve u bo sha ityouv vev, kape Ter Aôndo A kaa ne.

²²Tsô ucerubi kende akper a ve sha, akaver la kpaa lu a ve nongo; man iengem i Aôndo u Iserael lu sha a ve vegher u sha.

²³Iengem i TER mough ker atô u gar kera, va tile sha uwo u u lu gar vegher u sha ityoughkitaregh la.

²⁴Nahan Jijingi kendem sha, va a mo, ken mpase u sha mnenge u sha Jijingi u Aôndo, ken Kaldia, hen mba ve lu uikangen la. Nahan mpase u m nenge a mi la kôndo yem sha, undum.

²⁵Tsô m ôr ior mba ve lu uikangen la akaa a TER A tesem la cii.