Read tiv Esekiel 17 Bible Online

Esekiel 17 - tiv bible

Esekiel 17

¹Tsô kwaghôron u TER va her a mo, kaa er:

²Wan u or, ta kikya, ôr ya u Iserael injakwagh;

³kaa wer: Ter AÔNDO ngu kaan nahan er: Zegegafa a akper a vesen a lihen kpaa, mgbough a ingur iyol, i i nger anza kposo kposo yô, va hen Lebanon, va tôndo ityough ki kon u sedar;

⁴a tôndo agbaa a kiriki a sha azengel a na, a tôô a za a mi ken tar u i zenden kpenga ker yô; a za ver ken gar u mbayamen kasua.

⁵Shi a tôô ivor i ken tar la, a va lôô ken inya i dedoo; a va ver henpe mngerem ma ngee la; a lôô i er kon u hen kpemnger nahan;

⁶I vese, i hingir kon u wain u tan agbaa samber taven sha ga, agbaa a u shir a shir shin inya man amise a u kpaa lu shin tine i u; kape i hingir kon u wain la, u ta agbaa, u hôm.

⁷Zegegafa ugen kpaa lu, lu a uzegembaakperev, wa ingur kpishi; tsô nenge, kon u wain ne hurugh amise a u u zan hen a na, u naregh agbaa a u kpaa u zan hen a na, due shin inya henpe i lôô u la, sha u a̱ ur u mngerem.

⁸I lôô u ken inya i dedoo, henpe mngerem ma lu kpishi, sha u u̱ ta agbaa, u̱ ume atam, u̱ hingir kon u wain u dedoo.

⁹Kaa wer: Ter AÔNDO ngu kaan nahan er: Á kpe u iyol je kpa? Una kera wuhe amise a u, man Una kera gber atam a u; man uihômon mba u cii kpaa vea use gaa? Ka sha agee a vesen, shin sha mngee u ior man á wuhe u shin amise a u ga.

¹⁰Een, nenge, er i lee u nahan kpaa, á kpe u iyol je kpa? Ua kera use purututu zum u ahumbe a sha ityoughkitaregh a va sha u la ua use hen ijiir i u mende la je, gaa?

¹¹Kwaghôron u TER shi va her mo, kaa er:

¹²Shi ôr kwagh a ya u hendan kwagh ne, kaa wer: Akaa ne wanger ne gaa? Kaa a ve nahan wer: Nenge, tor u Babilon va hen Yerusalem, va kôr tor na man mbatarev nav, yem a ve her a na ken Babilon.

¹³A tôô ugen ken tsombor u tor, a ya ikur a na, a er un a bum; man shi mbautahav hen tar la a kura ve kera;

¹⁴sha u tartor la u̱ gba ijime, u̱ de kera kenden iyol i u sha ga, u̱ wa ikuryan na iko man ua tile her ye.

¹⁵Kpa ngula gema hendan a na gadia a tindi mbatyomov nav hen Igipiti, sha er ve̱ na un anyinya man mbautyav kpishi yô. Á kpe un iyol je kpa? U nan eren ambaakaa ne, nana̱ war je kpa? Er nan vihi ikuryan, nahan kpa shi nana wara?

¹⁶Er M lu u uma ne, kape, Ter AÔNDO A kaa ne, mimi je, ken ijiir i tor a tem, u a va ker un tor la, un u mbum na a laha la, man shi a vihi ikuryan na la, ka hen a na ken atô u Babilon je una kpe ye.

¹⁷Farao kpaa a akumautya na a vesen man ior kpishi, vea wase un ken utya ga, zum u á va ta atihi a inyaagh a maa ayouautya a taver, sha u wuan ior kpishi la.

¹⁸Gadia a laha mbum er a vihi ikuryan kera yô; man nenge, a vande nan uwegh je, nahan kpaa a er akaa angan cii; una war je ga.

¹⁹Nahan yô, Ter AÔNDO ngu kaan nahan er: Er m lu u uma ne, mimi je, mbum Wam u a laha, man ikuryan Yam i a vihi la, Me hire a mi sha ityough nagh.

²⁰Me samber kper Wam sha a na, á kôr un ken kwaghhônon Wam, Me va a na ken Babilon, Me za ôr un ijir keela sha ci u mimi ga ve, u ve er a Mo sha mimi ga la.

²¹Mbayevese ken a na cii, ken akum a na cii, sanker una wua ve, man mba ve shi her yô, á sambe ve sha ahumbe hanma vegher cii; nahan man né fa er i lu Mo TER M kaa kwagh ne ye.

²²Ter AÔNDO ngu kan nahan er: Mo kpaa, Me tôndo gbaa sha azengel a kon u sedar u taven sha la, Me môôr un; sha azengel a na la, Me asegh gbaa u kiriki u masen hômon, Me môôr un sha uwo u taven sha tser tser;

²³ka sha uwo u Iserael u taven sha la, Me môôr un ye; una ta agbaa, una ume atam, una hingir kon u sedar u dedoo; inyon atô kposo kposo ia tema shin itine i u; ka shin mure u agbaa a u ia tema ye.

²⁴Nahan ikon i ken toho cii ia fa er ka Mo TER M hidi a kon u taven la ijime, man M kende a kon u tav ga la sha, M er kon u ndor, u uma kera, man M er kon u ombor u hôm; ka Mo TER M kaa kwagh ne ye, shi Me er un kpaa.