Read tiv Esekiel 3 Bible Online

Esekiel 3 - tiv bible

Esekiel 3

¹Nahan A kaa a mo er: Wan u or, ya kwagh u i ne u ne; ya ihurenruamabera ne, za, za ôr kwagh a ya u Iserael.

²Tsô m aver zwa, A nam ihurenruamabera la, m ya.

³Nahan A kaa a mo er: Wan u or, de iyav ou mbu̱ ya, iv gbor wou a ihurenruamabera u M ne u ne. Tsô m ya i; i nyohom ken zwa er iyough nahan.

⁴A kaa a mo er: Wan u or, za ase hen ya u Iserael, za ôr ve akaaôron a Am.

⁵Gadia i tindi u ka hen ior mba zwa ve u lu kposo ga man shi u cimin kpaa ga yô, kpa ka hen ya u Iserael,

⁶ka hen akuraior kpishi a zwa ve u lu kposo ga shi u cimin kpaa ga yô, er u fatyô u kaven akaaôron a ve ga ze. Mimi je, Mea tindi u her a ve yô, ma ve ver ato her a we.

⁷Kpa ya u Iserael yô, una ver ato her a we ga; gadia ve rumun u veren ato her a Mo ga; gadia ya u Iserael cii ka mbatavertyough man mbakehenasema kpaa.

⁸Nenge, M taver ishigh you er ishiv vev nahan man ityough you kpaa er ityouv vev nahan.

⁹M taver ityough you er daimondi nahan, taver hemba vande kpaa; de cie ve ga, man ishima i̱ de nyian we sha mdugh u ve dughun we ashe ga, shin er ve lu ya u hendan kwagh nahan je kpaa.

¹⁰A shi A kaa a mo er: Wan u or, akaaôron Am a Me ôr u cii, ngohol a ken ishima you, man ungwa a sha ato ou kpaa.

¹¹Yem tsô, za hen mbauikangenev, hen ônov mba ior ou, za ôr kwagh a ve kaa a ve wer: Ter AÔNDO ngu kaan nahan; shin vea ungwa shin vea venda u ungwan kpaa.

¹²Tsô Jijingi kendem sha man m ungwa ihuran i iov i vesen ken ijime yam i gba kaan er: I̱ wuese icivir i TER hen ijiir Na i teman.

¹³Man m ungwa iov i akper a akaauma la, er a lu benden ayol a a yô, man iov i akaver sha mi imôngo kpaa, ka ihuran i iov i vesen je.

¹⁴Tsô Jijingi kendem sha yem a mo; m yem a ishima i vihin, sha mtsee u jijingi wam, man uwegh ku TER lu sha a mo taveraa.

¹⁵Nahan m va hen mbauikangenev hen Telabiba mba ve tema hen kpeifi u Cebar, man hen ijir i ve tema la; m tema a ve ayange ataankarahar je, kundam iyol cii.

¹⁶Tsô ayange a ataankarahar la nga been yô, kwaghôron u TER va her a mo er:

¹⁷Wan u or, M ver u orkuran sha ya u Iserael, aluer wea ungwa kwaghôron sha zwa Wam yô, wa ve kwagh sha ci Wam.

¹⁸Aluer M kaa a iferor Mer, ú kpe kpee je, man ú kera wa nan kwagh ga, ú kera ôr kwagh, ú wa nan kwagh sha gbenda u nan u bo la sha u yiman uma u nan ga yô, iferor shon nana kpe ken ifer i nan, kpa awambe a nan yô, Me ker a her a we.

¹⁹Kpa aluer ú wa iferor kwagh, kpa nan gema nan undu ifer i nan man gbenda u nan u bo la ga yô, nana kpe ken ifer i nan; kpa we yô, u yima uma wou.

²⁰Man shi aluer ormimi nan gema nan undu perapera u nan, man nana er iferkwagh, man M ver kwagh u nôngon gbev sha ishigh ki nan yô, nana kpe; er u we nan kwagh ga yô, nana kpe ken isholibo i nan, á kera umbur aeren a perapera a nan, a yan nan lu er la ga; kpa awambe a nan yô, Me ker a her a we.

²¹Nahan kpaa aluer u wa ormimi kwagh wer, nana̱ de kera eren isholibo ga, man nana er isholibo ga yô, nana war kpee je, sha ci u nan wa kwaghwan wou la iko; we kpaa u yima uma wou.

²²Uwegh ku TER lu sha mo hen ijiir la; man A kaa a mo er: Mough sha, due za shin pev, ka heera man Me za ôr kwagh a we ye.

²³Tsô m mough, m due, m za shin pev; man nenge, iengem i TER tile her, er ka i m vande nengen a i hen kpeifi u Cebar la nahan; tsô m gba, m kuma ityough inya.

²⁴Tsô Jijingi nyôr ker a mo, A erem, m tile sha angahar a am; a ôr kwagh a mo, A kaa a mo er: Za, za wuhe iyol you ken iyou.

²⁵Kpa we, wan u or, nenge, vea ta u ikor man vea kange u sha i, sha er ú kera zende ker atô ve ga yô;

²⁶man Me er nombor wou ua var u sha ikighô, ú kondo iker, man ú kera lu or u wan ve tsaha ga, gadia ve mba ya u hendan je.

²⁷Kpa zum u Me ôr kwagh a we yô, Me bugh zwa wou, nahan ú kaa a ve wer: Ter AÔNDO ngu kaan nahan er: Or u nan ongo yô, nana̱ ungwa, man u nan vende u ungwan yô, nana̱ venda; gadia ve mba ya u hendan je.