Read tiv Esekiel 35 Bible Online

Esekiel 35 - tiv bible

Esekiel 35

¹Kwaghôron u TER va her a mo, kaa er:

²Wan u or, ver ishigh you sha uwo u Seir, ôr kwaghôron u profeti sha u,

³kaa a u wer: Ter AÔNDO ngu kaan nahan er: Nenge, M ngu num a we, we uwo u Seir, Me naregh uwegh sha a we, Me gema u ú hingir ice, man kwagh u kpilighyol.

⁴Me gema agar a ou aa hingir alôgh, man we yô, ú hingir ice, man ú fa er Mo M lu TER ye.

⁵Sha ci u u lu a ihom ken ishima gbem, man u gema Mbaiserael u na ve sha agee a sanker sha iyange i ican ve, sha shighe u mtsaha ve, u masetyô la;

⁶nahan yô, er M lu u uma ne, kape Ter AÔNDO A kaa ne, Me gema u, ú hingir awambe; awambe aa tôv u ityô; er u venda awambe ga yô, awambe aa tôv u ityô.

⁷Me gema uwo u Seir, ua hingir kwagh u kpilighyol man ice; Me wua mbakaren duen man mbanyôron cii.

⁸Me na iwo na ia mgbough a mba i woo ve ken a na la; ka sha agungu a ou, man shin apev a ou, man shin iwagh you, mba i woo ve sha sanker la vea gba ye.

⁹Me gema u, ú hingir ice gbem sha won, agar a ou kpaa, á kera tema ker ga; nahan man nea fa er Mo M lu TER ye.

¹⁰Sha ci u u kaa wer: Akuraior ahar ne, man ityar ihiar ne, ia hingir i yam, sé ngohol i—shin er TER lu her nahan kpaa—

¹¹nahan yô, er M lu u uma ne, kape Ter AÔNDO A kaa ne, Me er a we sha ishima i vihin you man iwuhe you i u tese ihom you a ve la; nahan Me pase iyol Yam her a ve, zum u Me ôr u ijir la.

¹²Nahan ú fa er Mo TER M ongo ityuhwanev mbi u toho iwo i Iserael la yô, er u kaa wer: I hingir ice ve, i na se i, sha u se̱ ya.

¹³Ne kende ayol a en sha sha u lun ihom a Mo, sha mkaanem enem, man ne seer kwaghôron sha a Mo; M ungwa.

¹⁴Ter AÔNDO ngu kaan nahan er: Shighe u tar cii ua ember la, Me gema u, ú hingir ice.

¹⁵Er u ember sha dyako u ya u Iserael, sha ci u a hingir ice yô, kape Mo kpaa, Me er a we ne; ú hingir ice, we uwo u Seir kua Edom cii, ka un jimin cii; nahan man né fa er Mo M lu TER ye.