Read tiv Esekiel 36 Bible Online

Esekiel 36 - tiv bible

Esekiel 36

¹We, wan u or, ôr kwaghôron u profeti sha iwo i Iserael, kaa wer: Ne iwo i Iserael, ungwa nen kwaghôron u TER.

²Ter AÔNDO ngu kaan nahan er: Sha ci u orihom ngu teren ne kaan er: Ehe! Ajiir a taven sha a tsuaa la je kpaa, a hingir kwagh wase;

³nahan yô, ôr kwaghôron u profeti kaa wer: Ter AÔNDO ngu kaan nahan er: Ka sha ci u, een, ka sha ci u ve gema ne, ne hingir ice, man ve mena ne sha hanma vegher, sha er ne̱ hingir dyako u akuraior aa shi la, man er ve teren ne man ior ve lamen sha a ven yô,

⁴nahan ne iwo i Iserael, ungwa nen kwaghôron u Ter AÔNDO. Ter AÔNDO ngu kaan a iwo man a agungu man iwagh man apev, man atihi a alôgh, man agar a i undu a, a a hingir ishar man kwagh u aheenegh hen akuraior a a shi her a kase ve la,

⁵sha ci u nahan yô, Ter AÔNDO ngu kaan nahan er: Mimi je, sha myegh u iwuhe Yam, M ôr kwagh a asande a akuraior kua a Edom cii, mba ve tôô tar Wam hingir ve dyako, a iember i ken ishima ve cii man a tarnahan, sha u tan u kera er u̱ hingir ishar;

⁶nahan, ôr kwaghôron u profeti sha tar u Iserael, kaa a iwo man agungu man iwagh man apev, wer: Ter AÔNDO ngu kaan nahan er: nenge, M ôr kwagh sha iwuhe Yam man sha iyugh Yam; sha ci u mlaha u akuraior a laha ne la.

⁷Nahan Ter AÔNDO ngu kaan nahan er: M bum Mer, mimi je, akuraior a a kase ne ne, aa ya kunya u a.

⁸Kpa ne iwo i Iserael, nea ta agbaa, man nea ume atam sha ci u ior Av Iserael; gadia ve mgbôghom u hiden.

⁹Gadia nenge, M ta ken a ven, Me va her a ven kpaa, man á vughul ne, á lôô ne;

¹⁰Me na ior vea ngee sha a ven, ka ya u Iserael cii, ka un jimin cii; agar aa lu a mbateman ker, man á hire á maa ajiir a a hingir atihi a alôgh la;

¹¹Me na ior kua uzendenya vea ngee sha a ven, vea mar ônov vea ngee; shi Me na ne mbateman sha a ven er tsuaa nahan, man Me er a ven dedoo á hemba ayange a hiihii la; nahan man né fa er Mo M lu TER ye.

¹²Een, Me na ior vea zende sha a ven, ka ior Av Iserael je la; vea ngohol ne, né hingir dyako ve, man né kera kura ve ônov kera ga.

¹³Ter AÔNDO ngu kaan nahan er: Sha ci u mba kaan a we er: We u ngu tar u yan ior, man u kuran ônov mba ior ou kera,

¹⁴nahan yô, ú kera seer u yan ior ga, man ú kera seer u kuran ônov mba ior ou kera kpaa ga, kape Ter AÔNDO A kaa ne.

¹⁵Me na, ú kera ungwa mlaha u akuraior a lahan we la ga, man shi ú kera ya kunya u ior ga, man shi ú kera na ior ou gbev mbu nôngon ga, kape Ter AÔNDO A kaa ne.

¹⁶Shi kwaghôron u TER va her a mo er:

¹⁷Wan u or, zum u ya u Iserael tema ken tar ve u ayol a ve la, ve hôngor a u sha gbenda ve man aeren a ve; gbenda ve lu sha ishigh Yagh er kwase u nan lu wang ga, sha shighe u nan dugh won yô.

¹⁸Nahan M haa ve iyugh Yam sha ci u awambe a ve hee sha tar la yô, man sha ci u ve hôngor a u sha akombo a ve;

¹⁹nahan M sambe ve ken akuraior, man i tsenda ve ken ityar ityar; ka gbenda ve man aeren a ve la, M ôr ve ijir sha mi ye.

²⁰Man zum u ve nyôr ken akuraior, henpe ve za la, ve hôngor a icighanti Wam; gadia ior ter ve er: Mban ka ior mba TER je, nahan kpaa ve due ken tar Na kera.

²¹Kpa mhôônom kôrom a icighanti Wam u ya u Iserael lu hôngor ken akuraior, henpe ve ze la.

²²Nahan yô, kaa a ya u Iserael wer: Ter AÔNDO ngu kaan nahan er: M ngu eren kwagh ne ka sha ci wou ga, we ya u Iserael, kpa ka sha ci u icighanti Wam u ne hôngor a mi ken akuraior, henpe ne yem la.

²³Me tsegha iti Yam i vesen i i hôngor a i ken akuraior la, i ne hôngor a i ken atô ve la; nahan akuraior aa fa er Mo M lu TER yô, kape Ter AÔNDO A kaa ne, zum u Me pase mtsegh Wam ken a ven sha ashe ve la.

²⁴Gadia Me sange ne ken akuraior, Me kura ne ken ityar ityar cii, Me va a ven ken tar wen.

²⁵Me mishi ne mngerem ma wang, nahan né wanger; Me wanger ne sha ihôngor yen kera cii, man sha akombo a en cii kpaa.

²⁶Me na ne ishima i he man Me wa jijingi u he ker a ven; Me dugh iwenshima ken iyol yen kera, man Me na ne ishima i inyam.

²⁷Me ver Jijingi Wam ker a ven, M na er né zenden ken akaawan a Am man né waan akaaôron Am a jirigh iko, né eren sha a vough kpaa.

²⁸Né tema ken tar u M na uter enev; né hingir ior Av, Mo kpaa, Me hingir Aôndo wen.

²⁹Me yima ne sha mhôngor wen cii; Me yila samuyia, ua ngee, Me kera na ne ijen ga.

³⁰Me seer atam a ikon man iyiagh ki ken sule, sha er né kera shi zuan a iheen sha ijen ken akuraior ga.

³¹Sha shighe la né umbur igbenda yen i bo, man aeren a en a a doo ga la; nahan kwagh wen una ndôhôr ne ishima, sha ci u afer a en, man akaa a en a ndôhôrshima la.

³²Ka sha ci wen M er kwagh ne ga, kape Ter AÔNDO A kaa ne, fa nen nahan; kunya u̱ kôr ne, va nen ahenge, sha ci u igbenda yen, we ya u Iserael.

³³Ter AÔNDO ngu kaan nahan er: Sha iyange i Me wanger ne sha afer a en cii yô, Me na agar aa lu a ior, man á maa ajiir a a hingir atihi a alôgh la.

³⁴Tar u u hingir ice la, á shire u, nahan ua kera lu ice sha ishigh ki ior mba karen hen u la ga.

³⁵Nahan vea kaa er: Tar u u lu ice ne, gema hingir er sule u Eden nahan; man agar a alu atihi a lôgh man atse man i yôhôl a la, i maa a ugil, ior tema ker.

³⁶Nahan akuraior a a shi her a kase ne la, aa fa er Mo TER M maa ajiir a i yôhôl a la, man M lôô kwagh u yan lu ice la; Mo TER M kaa nahan, shi Me er sha mi kpaa.

³⁷Ter AÔNDO ngu kaan nahan er: Kwagh ne yô, kam pe ya u Iserael ma a va senem er Me er ve un yô; Me seer ve ior er ikumuile nahan.

³⁸Er icighanikumuile nahan, er ikumuile ken Yerusalem sha shighe u uiniongo nav, kape agar a a hingir atse la aa iv a ikpelaior; ka nahan vea fa er Mo M lu TER ye.