Read tiv Esekiel 39 Bible Online

Esekiel 39 - tiv bible

Esekiel 39

¹We wan u or, ôr kwaghôron u profeti sha Gogi, kaa wer: Ter AÔNDO ngu kaan nahan er: Nenge, M ngu num a we, we Gogi tor u Roshi man Mesheki man Tubal;

²Me gema u ú hide ijime, Me hemen we, Me na u, ú mough hen akighiratar a imbusutarimese la, Me va a we sha iwo i Iserael.

³Me gbidye ada wou una osough sha uwegh ough ku imesegh, man me na avaan a ou a uwegh ough ku yanegh aa haa inya.

⁴Wea gba sha iwo i Iserael, we kua akum a ou cii, man ior mba ve lu a we imôngo la; Me gema u, Me na inyon i tswam i lun anza kposo kposo kua inyamtoho sha u i̱ ya u.

⁵Wea gba ken ikôngough ki kpuun kpuun; gadia M kaa nahan, kape Ter AÔNDO a kaa ne.

⁶Me haa usu sha Magogi man sha mba ve tem bem bem hen ityar i shin kpe u zegemnger; ka nahan man vea fa er Mo M lu TER ye.

⁷Me pase icighanti Wam ken atô u ior Av Iserael; man Me kera rumun Mer, i̱ hôngor a icighanti Wam ga; man akuraior aa fa er Mo M lu TER ye, Icighan ken Iserael.

⁸Nenge, ngi van, á va kure sha mi, kape Ter AÔNDO A kaa ne; ka iyange i M ter i je ne.

⁹Mba ve tem ken agar a Iserael vea due, vea keer usu sha ikav mbi tswamev, vea nande mbi: ka iperutya man mbaakuva man mbaada man avaan man agbur man udagi, vea keer usu a mi zan zan anyom ataankarahar;

¹⁰nahan vea kera ker ikon ken toho ga, man shi vea kera gber ikon shin akô kpaa ga, gadia vea keer usu sha ikav mbi tswamev; mba ve ya ve ishar la, ve di kpaa vea ya ve ishar, mba ve kura ve akaa la, ve di kpaa vea kura ve akaa, kape Ter AÔNDO A kaa ne.

¹¹Tsô sha iyange la, Me na Gogi ijiir i iwaregh ken Iserael, ka pev u mbakaren, u a lu zegemnger vegher u sha ityoughkitaregh la; ia yange mbakaren; ka heregh vea ii Gogi a ikpelaior na cii ye, nahan á ii ijiir la iti er: Pev u Hamon-Gogi (Ikpelaior i Gogi).

¹²Ior i Iserael vea ii ve iwer itiankarihiar je, sha u vea wanger tar la yô.

¹³Een, ior mba ken tar la cii vea ii ve; nahan á hingir ve kwagh u icivirigh, sha iyange i Me tese icivir Yam, kape Ter AÔNDO A kaa ne.

¹⁴Man vea ver ior mba, á lu tom ve u zenden ken tar la, iin mbakaren mba ve shi her hen inya la, sha u wanger u; ken masejime u iwer itiankarihiar la vea gema keren a ker.

¹⁵Tsô aluer ma or u zenden karen her tar la nana nenge a kuhe u or yô, nana ver ikav sha u, zan zan mbaiin vea ii u ken pev u Hamon-gogi.

¹⁶Hamona (ikpelaior) una hingir iti i gar kpaa. Kape vea wanger tar la je ne.

¹⁷We, wan u or, Ter AÔNDO ngu kaan nahan er: Ôr kwagh a hanma inja i inyon man hanma inja i inyamtoho, kaa wer: Kohol nen, va nen; va nen hanma vegher, va kohol nen hen nagh Agh ku M senge sha ci wen la, ka nagh ku vesen sha iwo i Iserael; ya nen inyam man ma nen awambe.

¹⁸Né ya inyam i mbaageev, man né ma awambe a utor mba sha won; anomaiyôngo man agumaiyôngo man ivo man anomabua, ve cii ka ilev mbi wan ahôm mbi Bashan.

¹⁹Né ya ahôm zan zan né ide, man né hunde sha nagh Agh ku M ser sha ci wen yô.

²⁰Nahan né ide hen tebul Wam sha anyinya man mbahendan anyinya man ior mba ageev, man sha mbanôngontyav anza kposo kposo, kape Ter AÔNDO A kaa ne.

²¹Me ver icivir Yam ken akuraior, man akuraior cii aa nenge ijirôron Yam i M er yô, man uwegh Agh ku M pende sha a ve la.

²²Ka nahan man ya u Iserael vea fa er Mo M lu TER, Aôndo ve ye, hii sha iyange la zan zan ken hemen.

²³Man akuraior aa fa er ya u Iserael a yem ken uikangen sha ci u ifer ve yô; ka sha ci u ve per atindi Am, man M yer ve ishigh Yagh M na ve sha ikev i mbaihomov vev, man ve cii i wua ve sha sanker ye.

²⁴M er a ve sha inja i ihôngor ve, man sha atindi a ve a peren la, M yer ve ishigh Yagh.

²⁵Nahan yô, Ter AÔNDO ngu kaan nahan er: Hegen Me dugh Yakob ken uikangen kera, Me hide a ve, Me zungwe ya u Iserael jimin cii mhôônom; Me gba iwuhe sha ci u icighanti Wam.

²⁶Vea hungul kunya ve, man mimiga u ve er a Mo sha mimi ga la, zum u vea tema bem bem ken tar ve, ma or nana ta ve mciem iyol ga la.

²⁷Zum u Mea due a ve ken akuraior man Mea kohol ve ken ityar i mbaihomov vev, Mea hide a ve la, Me pase mtsegh Wam ken a ve sha ishigh ki akuraior kpishi.

²⁸Nahan vea fa er Mo M lu TER, Aôndo ve, sha ci u M na, ve yem uikangen ken akuraior, man shi M kohol ve, M hide a ve ken tar ve kpaa; Me kera undu mô ve môm keela ga;

²⁹man shi Me kera yer ve ishigh Yagh ga, gadia M haa Jijingi Wam sha ya u Iserael, kape Ter AÔNDO A kaa ne.