Read tiv Esekiel 47 Bible Online

Esekiel 47 - tiv bible

Esekiel 47

¹Tsô shi a hide a mo hen hunda u iyou; man nenge, mngerem lu duen shin kpandehunda, lu kuwan yemen vegher u sha ityoughkitaregh, gadia iyou la ver ishigh vegher u sha ityoughkitaregh; mngerem mara lu duen iyou la shin, vegher u hen uwegh ku yanegh, kar atse a nanden nagh sha mi vegher u imbusutariyan.

²Nahan a due a mo ken won sha hunda u shin imbusutarimese, a ningir a mo sha gbenda u ken won, a za a mo hen hunda u ken won u u ver ishigh sha ityoughkitaregh la; yô, nenge, mngerem lu kuwan vegher u ken uwegh ku yanegh.

³Er or la due yem vegher u sha ityoughkitaregh yô, a lu a kor sha uwe, a kar aseva dubu, a per a mo shin mnger, mngerem ar sha agbôônangahar.

⁴A shi a kar aseva dubu, man a per a mo shin mnger, mngerem ar sha iwenge.

⁵Shi a kar dubu, maa hingir ifi u m fatyô u peren ga, gadia mngerem va, hingir mngerem ma ôôn a ôô, ka ifi u or á fatyô u peren ga yô.

⁶Tsô a kaa a mo er: Wan u or, u nenge kwagh ne kpa? Nahan a hire a mo hen kpeifi.

⁷Tsô, m hidi yô, nenge, ikon lu hen kpeifi kpishi, ken kpe ne man ken ungula kpaa.

⁸Nahan a kaa a mo er: Mngerem man ma kuwan yemen tiôntar u sha vegher u sha ityoughkitaregh, ma sen shin Araba, ma asegh shin zegemnger; ma za nyôr shin zegemnger sha u mngerem mara ma̱ hingir ma dedoo yô.

⁹Tsô akaa a uma a zenden ininini henpe uifi mba uhar mban ve kar yô, aa lu uma; ishu ia ngee shimi kpishi; gadia mngerem nam va ar her, nahan mngerem ma zegemnger maa hingir ma dedoo, hanma kwagh una lu uma henpe ifi la a va ar cii.

¹⁰Nahan mbakôronishu kpaa vea tile sha kpe na; hii hen En-gedi zan zan za ar hen En-egelaim cii, á hingir ijiir i tsenen ukper; ishu ia ngee anza kposo kposo er ishu i ken zegemnger nahan, ia dumbur.

¹¹Kpa azande a na man aber a na yô, á sôr a ga; á de a, a̱ lu a bar her.

¹²Hen ifi la, sha akpe a na keen man keen, hanma inja i ikon i umen atam ia mende, ika i i ia use ga, atam a i kpaa aa bee ga; ia umen atam iwer iwer, sha ci u mngerem ma i ma dugh hen icighanjiir yô; atam a i kpaa aa lu kwaghyan, man ika i i kpaa ia lu sha ci u been angev.

¹³Ter AÔNDO ngu kaan nahan er: Ka ikighir i tar u né kar u sha ci u dyako u ikwe pue kar ihiar i Iserael ne— Yosev una zua a mbaaci uhar.

¹⁴Nea ya dyako sha u, ser ser; gadia M bum Mer, Me na uter enev u, nahan tar ne ua hingir dyako wen.

¹⁵Ka ikighir i tar ne: Shin vegher u imbusutarimese, hii hen Zegemnger u Tamen, sha gbenda u Hetelon zan zan za ar hen gbenda u karen zan Sedadi,

¹⁶Hamati, Berota man Shiberaim u a lu hen harga u tar u Damaseku a tar u Hamati la, man Hasar-hatikon u a lu sha ikighir i Hauran.

¹⁷Ikighir i̱ hii hen zegemnger i̱ yem zan zan za ar hen Hasar-enon hen tar u Damaseku; man hen imbusutarimese ka Hamati a lu ikighir ye; ka vegher u imbusutarimese je la.

¹⁸Vegher u sha ityoughkitaregh, hii hen harga u Hauran a Damaseku man hen harga u Gileadi a tar u Iserael, ka Yordan; kar nen, hii hen ikighir i imbusutarimese zan zan za ar hen zegemnger u sha ityoughkitaregh la; ka vegher u sha ityoughkitaregh je la.

¹⁹Man vegher u sha imbusutariyan u zan sha ian i imbusutariyan la, hii hen Tamar zan zan za ar hen mngerem ma Meriba-kadeshi, man hen uwagh u Igipiti zan zan za ar hen Zegemnger u Tamen. Ka vegher u sha imbusutariyan u zan sha ian i imbusutariyan je la.

²⁰Vegher u shin ityôtar, ka Zegemnger u Tamen, hii sha ikighir i imbusutariyan zan zan za ar sha vegher u gbenda u karen zan Hamati la. Ka vegher u shin ityôtar je la.

²¹Kar nen tar ne hen ayol a en sha ikwe i Iserael.

²²Kar nen tar sha ishor i eren sha ci u u̱ lu dyako wen, ne kua atôatyev a a lu shir her a ven, a a mar ônov her a ven yô; a̱ hingir her a ven vough er ônov mba ityôôv ken atô u ônov mba Iserael nahan; a̱ ya dyako a ven imôngo, ken ikwe i Iserael.

²³Tsô hanma kwe u ortyôtyev nan lu shir her yô, ka heregh né na nan dyako ye, kape Ter AÔNDO A kaa ne.