Read tiv Esekiel 48 Bible Online

Esekiel 48 - tiv bible

Esekiel 48

¹Ka ati a ikwe ne: Hii shin imbusutarimese, sha gbenda u Hetelon zan zan za ar hen gbenda u zan Hamati la man Hasar-enon hen ikighir i Damaseku, vegher u shin imbusutarimese, hen kpe u Hamati, hii vegher u sha ityoughkitaregh zan zan za ar vegher u shin ityôtar, ka kwar u Dan, môm je la.

²U dondon sha Dan yô, hii hen vegher u sha ityoughkitaregh zan zan za ar vegher u shin ityôtar, kwar u Asher, môm.

³Man u dondon sha Asher yô, hii hen vegher u sha ityoughkitaregh zan zan za ar vegher u shin ityôtar, ka kwar u Nafetali, môm.

⁴Man u dondon sha Nafetali yô, hii hen vegher u sha ityoughkitaregh zan zan za ar vegher u shin ityôtar, ka kwar u Manase, môm.

⁵Man u dondon sha Manase yô, hii hen vegher u sha ityoughkitaregh zan zan za ar vegher u shin ityôtar, ka kwar u Eferaim, môm.

⁶Man u dondon sha Eferaim yô, hii hen vegher u sha ityoughkitaregh zan zan za ar vegher u shin ityôtar ka kwar u Ruben, môm.

⁷Man u dondon sha Ruben yô, hii hen vegher u sha ityoughkitaregh zan zan za ar vegher u shin ityôtar, ka kwar u Yuda, môm.

⁸Man u dondon sha Yuda yô, hii hen vegher u sha ityoughkitaregh zan zan za ar vegher u shin ityôtar, nagh ku nea na la kua lu: igbanger i ku, ia lu aseva dubu ikundu kar utaan, ilihen i ku ia lu vough a kwar môm u ken ikwar igen la, hii hen vegher u sha ityoughkitaregh zan zan vegher u shin ityôtar; icighanjiir una lu her atô u ku.

⁹Nagh ku né na TER yô, ku̱ lihe aseva dubu ikundu kar utaan, man ku̱ gbangese aseva dubu pue.

¹⁰Icighannagh kun kua lu sha ci u upristi; vegher u sha imbusutarimese ku̱ lihe aseva dubu ikundu kar utaan, man vegher u shin ityôtar ku̱ gbangese aseva dubu pue, vegher u sha ityoughkitaregh ku̱ gbangese aseva dubu pue, man vegher u ken imbusutariyan ku̱ lihe aseva dubu ikundu kar utaan; icighanjiir u TER una lu ker atô u ku.

¹¹Kua lu sha ci upristi mba i tsegh ve ken ônov mba Sadoki, mba ve lu wan iko sha tom Wam, ve kaha ga, zum u Mbaiserael kaha undu gbenda la, er ônov mba Levi kpaa ve kaha nahan la.

¹²Kua hingir ve ken nagh ku tar la, icighankwagh u hemban hen ikighirtar i Mbalevi.

¹³Mbalevi vea zua a tar sha ikighirtar i upristi, ua lihe di aseva dubu ikundu kar dubu utaan man ua gbangese aseva dubu pue; ilihen cii ia lu aseva dubu ikundu kar dubu utaan, man igbanger aseva dubu pue.

¹⁴Ve̱ de panden u, ve̱ teen ga, man shi ve̱ de musan u kpaa ga, ve̱ de gem ihembantar la ve̱ naan orgen ga, gadia ka TER icighankwagh je.

¹⁵Aseva dubu utaan a a shi her sha igbanger la, sha ishigh ki aseva dubu ikundu kar utaan la, ka icighankwagh ga, ka sha ci u gar, sha ci u ijiir i teman ya man akôngo; gar una lu her atô.

¹⁶Ka uikaren nav ne: vegher u ken imbusutarimese aseva dubu unyiin man deri utaan, man vegher u ken imbusutariyan aseva dubu unyiin man deri utaan, man vegher u sha ityoughkitaregh aseva dubu unyiin man deri utaan; man vegher u shin ityôtar aseva dubu unyiin man deri utaan.

¹⁷Gar una lu a akôngo: vegher u ken imbusutarimese aseva deri uhar man akunduahargber, man vegher u ken imbusutariyan kpaa aseva deri uhar man akunduahargber, man vegher u sha ityoughkitaregh aseva deri uhar man akunduahargber, man vegher u shin ityôtar aseva deri uhar man akunduahargber.

¹⁸Kwagh u a shi her sha ilihen, sha kpe u nagh ku tseghan la, una lu aseva dubu pue vegher u sha ityoughkitaregh, man aseva dubu pue vegher u shin ityôtar; una lu sha kpe u nagh ku tseghan la; iyiagh ki á zua a mi ker yô, kia lu kwaghyan u mbatomov mba ken gar.

¹⁹Mbatomov mba ken gar, mba ve dugh ken ikwe i Iserael cii, vea shiren u.

²⁰Nagh ku kenden sha cii kua lihe aseva dubu ikundu kar dubu utaan man kua gbangese aseva dubu ikundu kar dubu utaan; kape né na nagh ku tseghan kun; kua lu akuku vough a tar u gar la imôngo.

²¹Kwagh u a shi her la, una lu sha ci u tor, vegher u keen man vegher u keela u nagh ku tseghan man kwar u gar la, hii hen aseva dubu ikundu kar utaan a nagh kura la, yem zan zan ikighirtar vegher u sha ityoughkitaregh, man shin vegher u shin ityôtar kpaa, hii hen aseva dubu ikundu kar utaan la yem zan zan ikighirtar, vegher u shin ityôtar la, ilihen ia lu vough a kwar môm u ken ikwar igen la, ka kwagh u tor; nagh ku tseghan man icighanjiir u iyou la, vea lu ker atô.

²²Man shi hii hen kwar u Mbalevi man kwar u gar, u u lu her atô u tar u tor yô, tar u her atô u ikighirtar i Yuda a ikighirtar i Benyamin ua lu sha ci u tor.

²³Sha kwagh u ikwe i i shi la yô, hii vegher u sha ityoughkitaregh zan zan za ar vegher u shin ityôtar, ka kwar u Benyamin, môm.

²⁴Man u dondon sha Benyamin yô, hii vegher u sha ityoughkitaregh zan zan za ar vegher u shin ityôtar, ka kwar u Shimeon, môm.

²⁵Man u dondon sha Shimeon yô, hii vegher u sha ityoughkitaregh zan zan za ar vegher u shin ityôtar, ka kwar u Isakar, môm.

²⁶Man u dondon sha Isakar yô, hii vegher u sha ityoughkitaregh zan zan za ar vegher u shin ityôtar, ka kwar u Sebulon, môm.

²⁷Man u dondon sha Sebulon yô, hii vegher u sha ityoughkitaregh zan zan za ar vegher u shin ityôtar, ka kwar u Gadi, môm.

²⁸Man u dondon sha Gadi yô, hii vegher u ken imbusutariyan yem vegher u ken imbusutariyan la, ikighir ia hii hen Tamar yem zan zan za ar hen mngerem ma Meribata-kadeshi, zan zan za ar hen uwagh u Igipiti, zan zan za ar hen Zegemnger u Tamen.

²⁹Ungun ka tar u né kar u sha ishor i eren sha ikwe i Iserael je ne, sha ci u dyako, man ingin ka ikwar ve ser ser, kape Ter AÔNDO A kaa ne.

³⁰Ka ihinda i gar ne: vegher u ken imbusutarimese lihe aseva dubu unyiin man deri utaan;

³¹á ii ihindagar ati sha ikwe i ônov mba Iserael; ihinda itiar ia lu ken imbusutarimese: hunda u Ruben môm, man hunda u Yuda môm, man hunda u Levi môm;

³²vegher u sha ityoughkitaregh lihe aseva dubu unyiin man deri utaan; ihinda lu itiar: hunda u Yosev môm, man hunda u Benyamin môm, man hunda u Dan môm;

³³vegher u ken imbusutariyan lihe aseva dubu unyiin man deri utaan; ihinda lu itiar: hunda u Shimeon môm, man hunda u Isakar môm, man hunda u Sebulon môm;

³⁴vegher u shin ityôtar lihe aseva dubu unyiin man deri utaan; ihinda lu itiar: hunda u Gadi môm, man hunda u Asher môm man hunda u Nafetali môm.

³⁵Ikasen na cii lu aseva dubu pue kar dubu anigheni hii sha iyange la je á yila gar la iti er, Yehova-shama (TER ngu ker).