Read tiv Esekiel 5 Bible Online

Esekiel 5 - tiv bible

Esekiel 5

¹Man we, wan u or, tôô sanker u esen dedoo, gema un a̱ hingir we er atsem u orhondontyough nahan, hondo ityough man indyer you a mi; nahan tôô iyôgh ki karen myohom, pav ice la;

²nande tihi u môm ken atihi atar sha usu ken atô gar, zum u ayange a mkase u sha utya la aa bee kera yô; man shi tôô tihi ugen ken atihi atar la, gber i sha sanker ningir tser; man tihi môm ugen u sha utar la, tsenda i sha ahumbe, man Me tsuwa sanker ken ijime ve.

³Sange i côhin, kange ken riga wou.

⁴Shi pande i, haa ken atô u usu, nande i sha usu; ka her, usu ua due ua nyôr ken ya u Iserael cii ye.

⁵Ter AÔNDO ngu kaan nahan er: Ka Yerusalem je ne; M ver un ker ato u akuraior, ityar kase un tser.

⁶Kpa a hendan a akaaôron a jirigh a Am, a er ifer hemba akuraior, man a hendan a akaawan a Am kpaa, hemba ityar i i kase un la cii, gadia ve venda akaaôron a jirigh a Am, man akaawan a Am kpaa ve zende ken a ga.

⁷Nahan yô, Ter AÔNDO ngu kaan nahan er: Er ne hendan kwagh je, ne hemba akuraior a a kase ne la, man ne zende sha akaawan a Am ga, man shi ne we akaaôron a jirigh a Am iko ga, ne er sha akaaôron a jirigh a akuraior a a kase ne la tsô kpaa ga,

⁸nahan yô, Ter AÔNDO ngu kaan er: Nenge, Mo je kpaa, M ngu num a we, Me ôr ijir ker atô wou sha ishigh ki akuraior.

⁹Man ker atô wou kpaa Me er kwagh u M lu a vande eren ga yô, imbakwagh i mayange Me kera er i nahan ga, sha ci u akaa a ou a ndôhôrshima cii.

¹⁰Nahan yô, uter vea ya inyam i ônov vev ker atô wou, man ônov di kpaa vea ya uter vev; Me ôr u ijir man shi Me sambe asande a a shi ken a we la sha ahumbe, hanma ian cii.

¹¹Nahan yô, mimi je, er M lu u uma ne, kape Ter AÔNDO A kaa ne: mimi je, sha ci u u hôngor icighanjiir wam, sha akaa a ou a hôngorough la cii, man sha akaa a ou a ndôhôrshima la cii, nahan Mo kpaa Me gema ishe yam kera, ia tange u ga, man shi Me kera zungwe mhôônom kpaa ga.

¹²Kwe wou u môm ken ikwe itiar ua kpe bouange, man ijen ia wua ve ker atô wou; shi kwe wou ugen ken ikwe itiar á wua u sha sanker, á ningir á tser, shi kwe ugen ken ikwe itiar Me sambe u sha ahumbe hanma ian cii, man shi Me tsuwa sanker ken ijime ve.

¹³Kape á kure ishimavihin Yam jimin cii ne, man Me er ishimavihin Yam a ve ia mem, man á yôhôl uma Wam iyol kpaa; nahan vea fa er Mo TER M er kwagh sha gbashima Wam yô, zum u Me kure ishimavihin Yam jimin cii sha a ve la.

¹⁴Man shi Me gema u ú hingir tihi u alôgh man kwagh u aheenegh ken akuraior a a kase u yô, sha ashe a hanma or u nan kar her yô.

¹⁵Kape ú hingir kwagh u aheenegh man ilyahan, ityesen man kwagh u kpilighyol, hen akuraior a a kase u ne, zum u Me ôr u ijir sha ishima i nyoon man sha iyugh man sha mbamtsaha mba sha ishima i vihin. Ka Mo TER M kaa nahan ye;

¹⁶zum u Me tindi ve a avaan a bo a ijen a van a mtim la, a Me tindi sha u timin ne; man Me seer a seer ne ijen man Me vihi kwaghyan wen u ne suur sha mi la kera;

¹⁷man Me tindi ne a ijen man inyamikume, ia kura ne ônov kera; angev mbu bov man awambe vea zende ken a we, man Me va u a sanker kpaa; ka Mo TER M kaa nahan ye.