Read tiv Esekiel 8 Bible Online

Esekiel 8 - tiv bible

Esekiel 8

¹Tsô sha inyom i sha ataratar, uwer u sha ataratar la, ayange a u ataan la, er m tema m lu ken ya wam, man mbatamen mba Yuda kpaa tema lu sha ishigh yagh yô, nahan uwegh ku Ter AÔNDO va lu sha a mo heregh.

²Tsô m nenge, man nenge, kwagh lu, mluashe na lu er ka usu nahan, hii hen iwenge yem shin inya lu er ka usu nahan; man shi hii hen iwenge na kôndo, lu er ka iengem i amber nahan.

³Tsô A naregh kwagh, lu er ka uwegh nahan, a kôrom sha ice i sha ityou; tsô Jijingi kendem sha gbihi tar shin, gbihi kwavaôndo sha, man A yem a mo hen Yerusalem ken mbampase mba Aôndo, hen ijiir i nyôron hen hundagar u ker atô, u u ver ishigh ken imbusutarimese la, henpe eev mbu nan iwuhe lu, mbu bamen sha iwuhe la.

⁴Nenge, iengem i Aôndo u Iserael lu heregh, lu er ka mpase u m vande nengen a mi shin pev la nahan.

⁵Tsô A kaa a mo er: We, wan u or, shi kende ashe sha ken vegher u ken imbusutarimese la. Tsô m kende ashe sha ken vegher u ken imbusutarimese la, man nenge, vegher u ken imbusutarimese hen hundagar u hen atse a nanden nagh sha mi la, eev mbu nan iwuhe mbula lu her, hen ijir i nyôron i hundagar la.

⁶Tsô A kaa a mo er: Wan u or, u ngu nengen kwagh u ve eren kpa; ka akaa a ndôhôrshima a vesen a ya u Iserael a lu eren heen ne, sha u M̱ pav a ijiir Yam i tseghan, M̱ yem ca. Kpa ú shi ú va nenge akaa a ndôhôrshima a vesen agen.

⁷Nahan A va a mo hen ijiir i nyôron hen tembe la; zum u m kenger yô, nenge, ihura lu ken kpekpe.

⁸Tsô A kaa a mo er: wan u or, time kpekpe, pev un; tsô er m time kpekpe yô, nenge, hunda lu.

⁹Nahan A kaa a mo er: Nyôr ker, nenge akaa a ndôhôrshima a bo a ve eren ker yô.

¹⁰Nahan m nyôr, m nenge; nenge, hanma kwagh u kpelan iyav inya, man ishôso i ndôhôrshima, man ieev i ya u Iserael cii, i kpela foto ve sha kpekpe, ningir tser.

¹¹Ior akunduatargber ken mbatamen mba ya u Iserael tile sha ishiv vev; Yaasania wan u Shafan kpaa lu a ve imôngo; hanma or lu a gbande u nan sha uwe, u nanden kwaghhumandoon a min; man ihuma i ibeenegh ki mnyim ma kwaghhumandoon la lu kôndon sha.

¹²Tsô A kaa a mo er: Wan u or, u nenge kwagh u mbatamen mba ya u Iserael ve lu eren ken ime, hanma or ken iyou i ieev mbi nan la kpa? Gadia mba kaan er: TER ngu nengen a vese ga; TER undu tar ne.

¹³Man shi A kaa a mo er: Shi ú va nenge akaa a ndôhôrshima a vesen agen a ve eren yô.

¹⁴Tsô A va a mo hen ijiir i nyôron i hunda u iyou i TER, u u ver ishigh sha imbusutarimese la; man nenge, ka heregh kasev tema lu vaan zungwen Tamushi ye.

¹⁵Nahan A kaa a mo er: We wan u or, u nenge kwagh ne kpa? shi ú va nenge akaa a ndôhôrshima a a hembe angan yô.

¹⁶Tsô A va a mo ken tembe u ken atô u iyou i TER la; yô, nenge, hen hunda u tempel u TER hen harga u puadwer a atse a nanden nagh sha mi la, ior lu her er ikundu kar utaan nahan, ve na ajime ken tempel u TER, ve ver ishiv sha ityoughkitaregh; ve lu guren iyange inya, veren ishigh sha ityoughkitaregh.

¹⁷Tsô A kaa a mo er: U nenge kwagh ne kpa, we wan u or? Ka ya u Yuda kwagh u kiriki er ve er akaa a ndôhôrshima a ve lu eren heen nee? Gadia ve iv tar ne sha ipila, man shi ve gema kpaa sha u vea bamem yô; man nenge, ve ver gbaakon sha ihinga ve.

¹⁸Sha ci u nahan yô, Mo kpaa Me yuwe, ishe Yam kpaa ia tange ga, man Me zungwe mhôônom kpaa ga; man shi vea genger imo vea vaa sha ato Am kpaa, nahan kpaa Me kera ungwa ve ga.