Read tiv Daniel 1 Bible Online

Daniel 1 - tiv bible

Daniel 1

¹Sha inyom i sha utar i mtemtor u Yehoyakim, tor u Yuda la, Nebukadinesar tor u Babilon va hen Yerusalem, va kase un tser.

²TER gema Yehoyakim tor u Yuda na sha ikev na, kua ikav mbigenev mbi ken iyou i Aôndo kpaa; a kura mbi a yem a mi ken tar u Shinar ken iyou i aôndo na; a gema ikav mbila a koso ken iyou i aôndo na.

³Nahan tor ôr kwagh a Ashipenashi, orvesen u mbatomov mba ken iyou na, er, a̱ va a Mbaiserael mbagenev, mba ken tsombor u tor man mba ken ashagbaior kpaa:

⁴mbayevikaior mba ve lu a ihogholough iyol ga, mbadoonashe, mba ve vie sha hanma gbenda u mfe, mbalun a kwaghfan, man mbakaven akaa, mba ve kom u eren tom ken iyou i tor, sha u una tese ve ingeren man zwa u Mbakaldi yô.

⁵Tor ver ve kwar u kwaghyan u tor hanma iyange, man u wain u á maan yô, er, i̱ tese ve anyom atar, man sha mbee u shighe la, ve̱ er tor tom.

⁶Ken a ve yô, Mbayuda kpaa lu, ka: Daniel man Hanania man Mishael man Asaria.

⁷Tsô orvesen u mbaerentom ken iyou i tor la, ii ve ati; a ii Daniel er Belete-shasar man Hanania er Shaderaki man Mishael er Meshaki man Asaria er Abedi-nego.

⁸Kpa Daniel vande wan ken ishima er una hôngor iyol na sha kwaghyan u tor, shin sha wain u a maan la kpaa ga; nahan a pine orvesen u mbaerentom ken iyou i tor la er, a̱ na un ian sha u una hôngor iyol na ga yô.

⁹Aôndo na Daniel gema doo orvesen u mbaerentom ken iyou i tor la ishima, mhôônom kôr un a na.

¹⁰Tsô orvesen u mbaerentom ken iyou i tor la, kaa a Daniel er: M ngu cian terem tor, u a ver ne kwaghyan wen la, mer, alaghga una nenge ishiv yenev mbia hemba vihin a mbi mbayevikaior mba ve lu kwav môm a ven, nahan nea vihim ityough a tor.

¹¹Tsô Daniel gema kaa a wanakiriki, u orvesen u mbaerentom ken iyou i tor ver un er a̱ nengen sha Daniel man Hanania man Mishael man Asaria la, er:

¹²Yô, shi kar mbayev ou ayange pue, i̱ na se ikaiue, se̱ yaan, man mngerem kpaa se̱ maan.

¹³Nahan i̱ nenge mlu wase man mlu u mbayevikaior mba ve ye kwaghyan u tor la; ka kwagh u ú nenge la, ú er a mbayev ou ye.

¹⁴Nahan a rumun kwaghôron ve la, a kar ve ayange pue.

¹⁵Sha mbee u ayange pue la yô, i nenge ayol a ve hemba doon man ve hemba kehen a mbayevikaior mba ve yaan kwaghyan u tor la cii.

¹⁶Tsô or u nengen sha a ve la de u nan ve kwaghyan man wain u ma ve maan la, a gema a naan ve ikaiue.

¹⁷Mbayevikaior mba unyiin mban, Aôndo na ve kwaghfan man mfe sha hanma takerada man hanma gbenda u mfe cii; man Daniel lu a mkav u mbampase mba sha mnenge man u mnyam ma cien kpaa.

¹⁸Ayange a tor ver er i̱ va a ve la, nga been yô, orvesen u mbaerentom ken iyou i tor la za va a ve sha ishigh ki Nebukadinesar.

¹⁹Nahan tor ôr kwagh a ve; ken a ve cii; i zua a ma orgen er Daniel man Hanania man Mishael man Asaria nahan ga; nahan ve hingir mbaeren tor tom.

²⁰Sha hanma kwagh u kwaghfan man mkav, u tor a pin ve sha mi yô, a nenge ve hemba mbaahiriv man mbaasorov mba ken tartor na cii kwa pue.

²¹Daniel lu her zan zan inyom i hiihii i tor Shirushi.