Read tiv Daniel 2 Bible Online

Daniel 2 - tiv bible

Daniel 2

¹Sha inyom i sha uhar i mtemtor u Nebukadinesar la yô, mnyam cie Nebukadinesar, nahan nzughul un ken ishima, tôndo un mnyam kpaa.

²Tsô tor kaa er, i̱ yila un mbaahiriv man mbaasorov man mbasôronakombo kua Mbakaldi, ve̱ va kaa tor mnyam nam mara. Tsô ve nyôr ve va tile sha ishigh ki tor.

³Nahan tor kaa a ve er: Mnyam ciem, nzughul mo ken ishima, nahan kam pe fan mnyam mara.

⁴Tsô Mbakaldi ôr kwagh a tor, ve kaa er: (ken zwa u Aram) Tor a̱ lu uma gbem sha won! Ôr mbayev ou mnyam mara, nahan se kpaa sé pase u inja i ma.

⁵Tor gema kaa a Mbakaldi er: Ka imo yam ne: Aluer né pasem mnyam man kua inja i ma ga yô, á paa ne avur avur, man á gema uya enev vea hingir atihi a uihôgh.

⁶Kpa aluer né pasem mnyam mara kua inja i ma yô, nea ngohol iwua man injar man icivir i vesen her a mo; nahan yô, kaam nen mnyam mara kua inja i ma.

⁷Ve shi ve kaa sha kwa har la er: Tor a̱ ôr mbayev nav mnyam ma shonov, nahan sé pase un inja i ma.

⁸Tor gema kaa er: M fa mimi je, sar ne ka zuan a ian, sha ci u ne nenge awashima wam;

⁹aluer né pasem mnyam man ga yô, tindi ngu sha a ven môm tsô; gadia ne zua zwa ner, né ôrom kwagh u aiegh man u icughugh, zan zan kwagh á va gema kposo; nahan yô, kaam nen mnyam man, nahan mo kpaa me fa mer, ne fatyô u pasen mo inja i ma.

¹⁰Mbakaldi gema kaa sha ishigh ki tor er: Ma or ngu sha won u nana fatyô u pasen kwagh u tor ne ga, gadia mayange ma tor u vesen u lun a tahav ngu a vande pinen orahir shin orishor shin Orkaldi imbakwagh ne nahan je ga.

¹¹Kwagh u tor a pin ne ka u ican, ma or ngu u nana fatyô u pasen tor un ga, saa di mbaaôndo, mba ve tem a ior imôngo ga la.

¹²Sha kwagh ne yô, tor yuwe, ishima vihi un tsung, nahan a kaa er, i̱ wua mbafankwagh mba ken Babilon cii.

¹³Nahan tindi due er, i̱ wua mbafankwagh; tsô i gba keren Daniel man ahur a na sha u wuan ve.

¹⁴Nahan Daniel gema ôr kwagh sha inja man sha mfe a Arioki, orvesen u mbakurantor, u a due sha u wuan mbafankwagh mba ken Babilon la;

¹⁵a gema a kaa a Arioki orvesen u tor la er: Ka nyi tindi u tor ne a taver yum nahana? Tsô Arioki gema pase Daniel kwagh shon.

¹⁶Nahan Daniel nyôr, sôn tor er, a̱ ver un shighe, un una pase tor inja i ma.

¹⁷Tsô Daniel za hen ya na, za pase ahur a na, Hanania man Mishael kua Asaria kwagh la,

¹⁸sha u ve̱ sôn Aôndo u Sha, A̱ zungwe ve mhôônom sha kwaghmyer ne, sha er Daniel man ahur a na ve̱ de kera timin a mbafankwagh mbagenev mba ken Babilon la imôngo ga yô.

¹⁹Tsô i pase Daniel kwaghmyer ne ken mpase u sha mnenge, tugh. Nahan Daniel wuese Aôndo u Sha,

²⁰Daniel gema kaa er: I̱ wuese iti i Aôndo gbem sha won, gadia mfe man tahav yô, ka Un A lu a mi ye;

²¹ka Un A gem ashighe man a-an ye; ka A dugh utor shi A ver utor; ka A na mbafankwagh mfe, man mba ve lu a mkav yô, A na ve kwaghfan.

²²Ka Un A pasen akaacimin man a ken myer ye; A fa kwagh u a lu ken ime, iwanger ngi tem a Na.

²³We, Aôndo u uter Av, m sugh U, man m wuese We kpaa, U nam kwaghfan man tahav, man ahegen kpaa shi U tesem kwagh u se lu keren her a We yô; gadia U pase se kwagh u tor la.

²⁴Nahan Daniel za hen Arioki, u tor ver un er, a̱ tim mbafankwagh mba Babilon la; a kaa a na er: De kera timin mbafankwagh mba Babilon ga; za a mo hen tor; me pase tor inja i ma.

²⁵Tsô Arioki za a Daniel sha ishigh ki tor fese, man a kaa a na nahan er: M zua a or ken mbakwarev mba Yuda, u nana pase tor inja i mnya yô.

²⁶Tor gema kaa a Daniel, u i yilan un er Belete-shasar la er: U fatyô u pasen mo mnyam ma, m nenge la, man inja i ma?

²⁷Daniel gema kaa sha ishigh ki tor er: Kwaghmyer u tor a pin la, mbafankwagh, shin mbaasorov, shin mbaahiriv, shin mbatsengan fan akaa kpaa, ve fatyô u pasen tor ga;

²⁸kpa Aôndo ngu Sha u A pasen akaamyer, man A pase tor Nebukadinesar kwagh u una va er sha ayange a masetyô la kpaa. Ka mnyam ou, man mbampase mba sha mnenge mba u nenge er u lu sha gambe wou ne:

²⁹We tor, mbamhen ou mba u hen sha gambe wou lu sha kwagh u una va er ken hemen; Wen u A pasen kwaghmyer la, A pase u kwagh u una va er yô.

³⁰Mo yô, i pasem kwaghmyer ne, ka sha ci u ma kwaghfan u a lu ken a mo hemba u hanma orgen ga, kpa ka sha u i̱ pase tor inja i ma, man sha u u̱ fa mhen u ken ishima you la.

³¹We tor, u lu kenger, yô, nenge, zegeuee. Eev mbula taver ashe, iengem i mbu hemba cii, mbu tile u sha ishi; mluashe u mbu cier iyol.

³²Eev mbula yô, ityough ki mbu lu sha zenaria u dedoo, vanger man ave a mbu lu sha azurfa, iyav man anam a mbu lu sha togula,

³³ahambe-angahar a mbu lu sha iyôgh ki iligh, akevangahar a mbu lu sha iyô nungwa inyatyuu.

³⁴Er u lu kenger yô, nenge, iwen bugh, ave a or bende sha i ga, i va ta eev mbula sha akevangahar a a lu iyôgh nungwa inyatyuu la, hembe a avur avur.

³⁵Tsô hen shighe la je, i hembe iyôgh ki iligh man inyatyuu man togula man azurfa man zenaria cii, hingir er ka imough i sha vande u gbidyen iyiagh inyom yô; ahumbe purugh a mi kera, je avindigh a i tsô kpaa kera lu ga, man iwen i i te sha eev mbula gema hingir zegewo, iv tar cii.

³⁶Ka mnyam ma shonom je ne, hegen sé pase tor inja i ma.

³⁷We tor, u ngu tor u utor je, ka Aôndo u Sha A ne u tor, man tahav man agee man icivir ye,

³⁸man hanma ijiir ape ior ve tem cii kua inyamtoho man inyon i sha kpaa, A na sha ikev you er u̱ tema tor sha ve cii; ka we je u lu ityough ki sha zenaria la ye.

³⁹Zum u ú va kar kera yô, tartor ugen ua mough u ua kuma sha u wou ga, man shi tartor ugen kpaa u sha utar u sha togula, u ua ya tor sha tar cii.

⁴⁰Man tartor u sha unyiin la ua taver, er iyôgh ki iligh nahan, er iyôgh ki iligh ka ki hembe akaa cii avur avur man ki cagh akaa cii nahan; man er iyôgh ki heren akaa cii nahan, kape kia hembe avur avur man kia her a cii la.

⁴¹Man er u nenge akevangahar kua ahôangahar, tiôn ugen a lu inyatyuu man tiôn ugen a lu iyôgh nahan, kape ua lu tartor u paven je la; agee a iyôô aa lu ker, er u nenge iyôgh ki nongo a inyatyuu nahan.

⁴²Man er ahôangahar la, tiôn ugen a lu iyôgh man tiôn ugen inyatyuu yô, kape tartor la, vegher ugen una oson a oso la.

⁴³Man er u nenge iyôgh ki nongo sha inyatyuu nahan, kape vea nungwa ayol a ve sha kwase u eren, kpa vea var ayol a ve ga, er iyôgh ki varen sha inyatyuu ga nahan.

⁴⁴Man sha ayange a utor mbala, Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikev i ma ikur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won;

⁴⁵vough er u nenge iwen bugh sha uwo, ave a or bende sha mi ga, i va hembe iyôgh avur avur kua togula man inyatyuu man azurfa man zenaria nahan. Aôndo u hemban la pase tor kwagh u una va er ken hemen yô; mnyam mara ka kwagh u keng, inja i ma kpaa ka mimi je.

⁴⁶Tsô tor Nebukadinesar gure kuma ishigh inya, ta Daniel inya, a shi a kaa er, i̱ va a nagh man akaahumandoon i̱ va na un.

⁴⁷Tor shi gema kaa a Daniel er: Mimi je, Aôndo wen ka Aôndo u mbaaôndo mbagenev cii, man Ter u utor kpaa, man Orpasenakaamyer, ka nahan man u fetyô u pasen kwaghmyer ne ye.

⁴⁸Tsô tor civir Daniel kpishi, na un uiwua mba vesen, a ver un tor sha tiôntar u Babilon cii, man shi orhemen u vesen u mbafankwagh mba Babilon cii.

⁴⁹Daniel ôr kwagh a tor, nahan tor ver Sedaraki man Meshaki man Abedi-nego mbatarev sha tiôntar u Babilon; Daniel yô, lu ken ya u tor.