Read tiv Daniel 4 Bible Online

Daniel 4 - tiv bible

Daniel 4

¹Tor Nebukadinesar, u zan hen ior man akuraior man ijô cii, mba ve tem sha won cii: Bem a̱ ngee her a ven.

²M nenge doo u me pase ikav man akaakpilighyol a Aôndo Uhembansha cii A erem yô.

³Uivande Nav vese je! Akaakpilighyol a Na kpaa cier iyol; tartor Na ka tartor u tsôron gbem, tahav Nav kpaa mbu sha ikov ikov!

⁴Mo Nebukadinesar m tema bem bem ken ya wam, lu kpen mo iyol ken iyou yam i tor.

⁵Mnyam ciem, ma cier mo iyol; mhen wam u sha gambe, man mbampase mba sha mnenge mba m nenge a mi la tam mciem iyol.

⁶Nahan, m wa tindi mer, i̱ va a mbafankwagh mba ken Babilon cii sha ishigh yagh, ve̱ pasem inja i mnyam mara.

⁷Tsô mbaahiriv man mbaasorov man Mbakaldi man mbatsenganôron akaa, ve nyôr, tsô m ôr ve mnyam ma shonom, kpa ve pasem inja i ma ga.

⁸Kpa ken masetyô yô, Daniel va nyôr sha ishigh yagh, u i yilan un er Belete-shasar, sha iti i aôndo wam, u jijingi u uicighanmbaaôndo a lu ken a na la; m ôr un mnyam am, m kaa mer:

⁹We Belete-shasar, orvesen u mbaahiriv, m fa jijingi u uicighanmbaaôndo ngu ken a we, man ma kwagh u myer u zan we iyol kpaa ngu ga; yô, ôrom mbampase mba sha mnenge mba m nenge a mi ken mnya, kua inja ve.

¹⁰Ka mbampase mba sha mnenge mba m nenge a mi sha gambe wam ne: M lu kenger, yô, nenge, kon ugen lu hen atô u tar, u tav tsung.

¹¹Kon la vese, u taver, tav je, za kôr sha kwavaôndo, i nenge a u zan zan ken ikighir i tar cii.

¹²Ika i u doo u nengen, atam a u ngee; u lu a kwaghyan sha ci u ior cii; inyamtoho zuan a mure shin itine i u, inyon i sha teman sha agbaa a u, man hanma kwaghuma cii zua a kwaghyan sha u.

¹³M nenge ken mbampase mba sha mnenge mba m nenge a mi sha gambe wam la, yô, nenge, icighanor, ka orkuran je la, sen Sha.

¹⁴A genger imo, a kaa er: Gber kon ne kera, paa agbaa a u, or ika i u, tsenda atam a u kera; inyamtoho i̱ kar shin itine i u kera, man inyon kpaa i̱ mough sha agbaa a u.

¹⁵Nahan kpaa, de ikpughur na a amise na shin inya, a ikangenev mbi sha iyô man togula ken gwergwe u ken ikôngo; avure a sha a̱ heen un, kwar na u̱ lu a ishôso imôngo ken toho;

¹⁶i̱ gema ishima na, i̱ de kera luun i or ga, i̱ na un ishima i inyamtoho, man ashighe a̱ kar un ataankarahar.

¹⁷Ka sha imo i mbakuran i wa tindi la, man ka sha mkaa u mba i tsegh ve la a lu ye, ka sha ci u mba ve lu uma, ve̱ fa. Uhembansha ngu a tahav sha tartor u ior, ka A gema u A na hanma or u i doo Un u nan nan yô, ka a ver or hemban gban ijime ken ior sha u kpaa.

¹⁸Mnyam man, mo tor Nebukadinesar m nenge ma; man we Belete-shasar, pasem inja i ma, gadia mbafankwagh mba ken tartor wam cii fatyô u pasen mo inja i ma ga; kpa we yô, u fatyô, gadia jijingi u uicighanmbaaôndo ngu ken a we.

¹⁹Tsô Daniel, u i yilan un er Belete-shasar la, tile ving, kondo un iyol, mbamhen nav cier un iyol. Nahan tor gema kaa er: We, Belete-shasar, de rumun mnyam shin mpase u ma a̱ cier we iyol ga. Belete-shasar gema kaa er: Terem, mnyam man ma̱ hide sha mba ve ker u ihom la, man mpase u ma kpaa sha mbaahendanev ou.

²⁰Kon u u nenge, u u vese, taver, man u tav u za ker sha kwavaôndo man i nenge a u sha won cii la,

²¹u ika i u i doo u nengen, man atam a u kpaa a ngee, u lu a kwaghyan sha ci u ior cii, u inyamtoho i tem shin itine i u man inyon i sha kpaa i tem sha agbaa a u la, yô,

²²ka we tor; u vese, u taver, gadia icivir you seer je ar sha, man tartor wou kpaa tser tar cii.

²³Man er tor nenge icighanor, orkuran, lu senen Sha, kaan er: Gber kon ne kera wua u, nahan kpaa, de ikpughur na a amise shin inya, a ikangenev mbi sha iyô man togula ken gwergwe u ken ikôngo; avure a Sha a̱ heen un iyol, kwar na u̱ lu a ishôso imôngo ken toho; zan zan ashighe á kar un ataankarahar

²⁴ka inja i ma ne, tor; man ka imo i Uhembansha la, i i ve sha terem tor yô:

²⁵á zenda u ken ior kera, man ijiir i teman you ia lu a inyamtoho imôngo, man á er u, ú ya toho er ibua nahan, avure a Sha á heen we iyol, ashighe á kar u ataankarahar, zan zan ú fa er Uhembansha a lu a tahav sha tartor u ior yô, ka A gema u, A na or u i doo Un u nan yô.

²⁶Man er i kaa er, i̱ de ikpughurkon la a amise yô, tartor wou ua lu taveraa ken masetyô u ú fa er Sha a tem tor yô.

²⁷Nahan yô, tor, rumun kwaghwan u m we u ne, pav a asorabo a ou, gema eren perapera, man pav a aferakaa a ou kpaa, gema zungwe mbaatsanev mhôônom; tso alaghga á seer ayange a mkpeyol wou.

²⁸A kaa ne cii er tor Nebukadinesar.

²⁹Er iwer pue kar ihiar bee kera yô, a lu zenden sha tembeyough u sha, u iyou i tor ken Babilon.

³⁰Tor ôr kwagh kaa er: Ngun kera ka zege Babilon, u m maa sha u a̱ lu ijiir i teman i tor, sha tahav mbu agee am, sha ci u icivir i shagba wam ne gaa?

³¹Er tor lu ôron kwagh ave la je, tsô, imo due Sha, kaa er: We, tor Nebukadinesar, ka we i ôr kwagh ne a we er: I dugh u tor ve.

³²Á zenda u hen ior kera, ijiir you i teman la ia lu a inyamtoho imôngo; á na u ú ya toho er ibua nahan, ashighe aa kar u ataankarahar; zan zan ú fa er Uhembansha a lu a tahav sha tartor u ior yô, ka A gema u A na hanma or u i doo Un u nan nan yô.

³³Hen shighe la je i kure kwaghôron la sha Nebukadinesar; i zenda un hen ior kera, man a ya toho er ibua nahan, iyol na kpaa heen sha avure a Sha, zan zan ice na tav lihe er ingur i ugafa nahan, akughul a na kpaa hingir er akughul a inyon nahan.

³⁴Tsô er ayange kar kera yô, mo Nebukadinesar m kende ashe am Sha, tsô mfe wam hide her a mo, m wuese Uhembansha, m sugh Un, shi m civir Un u A lu uma gbem sha won yô; mtemtor Na ka u tsôron gbem man tartor Na kpaa ka u sha ikov ikov cii;

³⁵mba ve tem sha won cii mba er ka ma kwagh ga nahan; ka A er sha awashima Na a akum a Sha man a mba ve tem shin tar kpaa; ma or fatyô u yangen uwegh Nagh ga, shin u pinen Un er: Ka nyi U eren nahan, kpaa ga.

³⁶Hen shighe la je, mfe wam hide her a mo; icivir i tartor wam, shagba wam, man iengem yam gema hide her a mo; mbawasen mo mhen man mbatarev av kpaa kerem ityô, va her a mo; i taver tartor wam her, man i seer mo ivesen tsung.

³⁷Hegen yô, mo Nebukadinesar m ngu civir Tor u Sha; gadia aeren a Na cii ka a mimi je, man igbenda Na ka i perapera, man mba ve zenden sha ihagh yô, A fatyô u hiden a ve ijime.