Read tiv Hosea 12 Bible Online

Hosea 12 - tiv bible

Hosea 12

¹Eferaim kôr hur a ahumbe, ngu zan ahumbe a ken ityoughkitaregh ityô; ngu seer a seer aie man ipila iyange jimin cii; ve ya ikur a Ashiria, shi mba zan a mkurem ken tar u Igipiti kpaa.

²TER ngu a ayôôso a Yuda kpaa, Una tsaha Yakob sha ci u igbenda na, man Una na un injar sha aeren a na.

³Ken uya a kôr anngô na sha ikishinguhar, man er a kuma or yô, a nôngo wav a Aôndo;

⁴een, a nôngo wav a ortyom u Sha, a hemba un, a vaa, a zamber a na; a zua a Na hen Betel, ka heera A ôr kwagh a vese ye—

⁵ka TER, Aôndo u akum a Sha, iti Na er TER.

⁶Nahan we yô, hire hen Aôndo wou, lu a dooshima man perapera, ver ishima kegh Aôndo wou gbem.

⁷Ka orkasua je, uikaren mba icughuv mba sha uwegh nagh; u ngohol mtsera ganden ikaa inya doo un.

⁸Nahan Eferaim kaa er: M hingir ornyar ve, m tser a inyaregh; ken akaa am cii, i zua a ma kwagh u ifer ken a mo u lun isholibo ga.

⁹Kpa M ngu TER, Aôndo wou, hii ken tar u Igipiti je, Me shi Me na u u̱ tsa ken utenti, er sha ayange a iniongo i i ver i la nahan.

¹⁰Shi M ôr kwagh a uprofeti kpaa; ka Mo je M seer mbampase ye, man sha ikev i uprofeti la M ôr kwagh sha anzaakaa.

¹¹Er Gileadi vande lun iferkwagh yô, ve hingir gbilinkwagh cii; ken Gilgal mba nan nagh ku sôngon sha anomabua; atse ve a nanden nagh sha mi la aa hingir er atihi a awen ken ihighasule nahan.

¹²Yakob yevese yem ken tar u Aram, Iserael er tom sha u zuan a kwase, sha u zuan a kwase yô, a kura ilev.

¹³Ka sha ikev i profeti TER due a Iserael ken tar u Igipiti, man sha ikev i profeti kpaa i kura un ye.

¹⁴Eferaim na ishima i vihin tsung; nahan TER Una hide a awambe a ifer na sha ityough nagh, man Una or un iyev sha iheen na la.