Read tiv Hosea 13 Bible Online

Hosea 13 - tiv bible

Hosea 13

¹Zum u Eferaim ôr kwagh yô, ikarikase gbidye iyol; i kende un sha ken Iserael; kpa a hingir u lun a ibo iyol sha ci u a civir Baal yô, nahan a kpe.

²Hegen kpaa mba eren asorabo zan hemen hemen, mba keren ieev, akombo a i er a sha azurfa ve sha mfe, a cii ka tom u mbafaneev; mba kaan sha a er: Mba ve ne nagh yô, mba susu anibuav.

³Nahan yô, vea hingir er ibeenegh ki pepegh yô, man er avure a ka a ndoor fese nahan, er imough i ahumbe a purugh a i kera sha vande u gbiren iyiav nahan, man er mnyim ma duen ken ityam i mnyi yô.

⁴Nahan kpaa, Mo M ngu TER, Aôndo wou, hii ken tar u Igipiti je, u fa ma aôndo ugen ga saa Mo; Oryiman ugen ngu ga saa Mo.

⁵Ka Mo M fa u ken desereti, ken tar u ombor ye.

⁶Zum u ve zua a kwaghyan yô, ve ya ve ide; er ve ide yô, asema a ve kende sha; ka sha ci u nahan Mo M hungul ve ye.

⁷Nahan M hingir her a ve er ka begha nahan; M kegh sha gbenda er anyam nahan;

⁸Me ta sha a ve er dwem u i kor un ônov kera yô, Me ande vanger ve; Me ya ve er begha nahan; inyamikume ia tuse a ve.

⁹Mtim wou yô, Iserael ka er u hendan a Mo, Mo u M lu iwasen you yô.

¹⁰Tor wou ngu han ase, sha u una yima u ken agar a ou cii, man mbaajiriv ou mba hana, mba u kaa sha kwagh ve wer: Nam tor kua mbatarev laa?

¹¹M na u tor sha ishima i vihin, man shi M kar a na kera sha iyugh Yam.

¹²I kohol afer a Eferaim i kange a, i ver isholibo na i̱ lu her.

¹³Martoghol kôr un; un ka wan u fan kwagh ga, gadia zum u shighe kuma yô, a kera due ga.

¹⁴Me paa ve sha tahav mbu Sheol; Me paa ve sha ku; we ku, ka han ubombauangev ou ve lu? We, Sheol, ka han mtim wou a lu? Afanyô a vaan a yer sha ishigh Yagh.

¹⁵Shin er una ume atam ken atô u anmgbianev nav nahan kpaa ahumbe a ken ityoughkitaregh aa va, ahumbe a TER, aa due ken desereti; nahan hwembe na ua uma, imbor na kpaa ia uma; aa kura un ikav nav mbi injaav cii kera.

¹⁶Samaria una ya ibo na, gadia a hendan a Aôndo na; á wua ve sha sanker, á ta anikundanev vev inya á her ve, á pav kasev vev mba ve lu iyav la iyav.